Search form

NÚMEROS 5

Tucui mapacunata anchuchinamanta

1Mandac Diosca Moisestaca: 2«Israelpuramanta maijan lepra ungüihuan cacpi, yurac yacu cacharirishca cacpi, huañushcapi tuparishpa mapayashca cacpica, carpa huasimanta caruman llucchishpa cachachun mandangui. 3Huarmicunatapish, caricunatapish chashna mapayashcataca llucchishpa cachacpimi, ñuca cancunapac chaupipi causana carpa huasica mapa illac canga» nirca.

4Israelcunaca Mandac Dios Moisesta mandashca shinallatacmi chashna mapayashcacunataca carpa huasimanta llucchishpa cacharca.

Pitapish mana llaquichinamanta

5Mandac Dios Moisesta rimashpaca: 6«Israelcunamanta maijan huarmipish, caripish ñucata mana cazushpa, shuccunata llaquichicca juchayucmi tucun. 7Chai juchata huillashpa, llaquichishca runaman pagana cashcata cushpapish chungamanta ishcaihuan yallitami cuna can. 8Chai llaquichishca runa mana tiyacpi, cuchulla familiapish mana tiyacpica, Mandac Dios ñucamanmi cuna can. Juchamanta ovejata curaman cushca jahuami chashna cuna can.

9Israelcuna ñucaman cungapac chicanyachishcaca curapacllami canga. 10Imatapish ñucapaclla cachun chicanyachishcaca curapacmi canga. Maijancuna curaman cushcaca, curapacllatacmi canga» nirca.

Cusandi huarmindi celanacucpi, imata ruhuanamanta

11Mandac Dios Moisesta rimashpaca: 12«Maijanpac huarmi cusata mana cazushpa, huainayashpa puricucpi, 13maijan cari paihuan chayaricpi, mana yacharishca cacpipish mapayashcami saquirin. Chaita pipish mana japishca cacpi, 14cusaca huarmita celangami. Shuc-huan chayarishpa mapayashca cacpi, mana cashpaca manapish shuc-huan cacpi, yanga juchanchicushpaca, 15huarmita curapacman apashpami, ishcai kilo cebada ofrendata cuna can. Celanacushcamanta cushca cashcamantami chai ofrendapica aceitetapish, inciensotapish mana churana can. Chai cushcaca juchallishcata mana juchallishcata ricuchingapacmi ñucaman cushca can.

16Chai huarmitaca curami Mandac Dios ñucapac ñaupaman chayarichun mandanga. 17Chai quipami curaca allpa vasopi ñucapaclla chicanyachishca yacuta japishpa, ñucahuan tupana huasi ucu pambamanta ñuto allpata japishpa, chai yacupi churanga. 18Chaimantaca curami huarmitaca Mandac Dios ñucapac ñaupapi uma acchata cacharinga. Juchallishcamanta cuna ofrendatami chai huarmipac maquipi churanga. Chai ofrendami juchallishcatapish, mana juchallishcatapish ricuchinga.

Cutin curaca llaquichic jayac yacutami maquipi charicunga. 19Chai quipaca huarmitaca: “Can shuctac carihuan mana chayarishca, shinallatac cusapac randi shuc carihuan mana mapayashca cacpica, cai llaquichic jayac yacuta ubiacpipish, imata mana ruhuangachu” ninga. 20Ashtahuanpish cusapac randi shuctac carihuan chayarishpa mapayashca cacpica, 21(curallatacmi chai huarmitaca: “Ima llaquipish japichun, Mandac Dios mana alli nishpa, huicsata punguillichishpa, huahuatapish mana chari pudicta ruhuachun ninga.) 22Cai llaquichic yacu huicsaman yaicushpami huahuatapish mana charicta ruhuashpa, huicsatapish punguillichinga” nishpa gentecunapac ñaupapi ari nichinga.

Shina nicpimi, chai huarmica: “Chashna cachun, chashna cachun” ninga.

23Curaca shuc libropimi chai llaquichishca cachun nishcataca quillcanga. Chai quillcashcataca jayac yacuhuanmi pichanga. 24Chai quipaca chai huarmimanmi chai llaquichic jayac yacuta ubiachinga. Shina ubiachicpimi, chai jayac yacuca huarmipac huicsaman llaquichingapac yaicunga.

25Celashcamanta cushca ofrendata huarmipac maquimanta cura japishpa, altar ñaupapi cuyuchishpami Mandac Dios ñucaman cunga. 26Chai quipami chai yuyarichic ofrendata japishpa, altar jahuapi rupachinga. Chai quipaca chai yacutaca huarmimanmi ubiachinga. 27Chashna ubiachicpimi, chai huarmi cusapac randi shuctac carihuan chayarishpa mapayashca cacpica, llaquichingapac huicsaman yaicunga. Chashna llaquichicpimi, mana huatata chari pudishpa, huicsapish punguillinga. Chaimantaca paica gentecunapac ñaupapi mana alli nishcami canga. 28Ashtahuanpish chai huarmi shuctac carihuan chayarishpa, mana mapayashca cacpica, ima mana tucushcachu nishcami canga. Shinallatac huahuatapish charingami.

29Caica shuc huarmi cusapac randi shuctac carihuan chayarishpa mapayacpi, 30mana cashpaca cusa celacpi, imata ruhuana cashcata mandashcami. Chai huarmita Mandac Dios ñucapac ñaupapi shayachishpami curaca tucui cai mandashcata ruhuanga. 31Cusaca mana juchanchishcachu canga. Huarmimi juchanchishca cashcamanta llaquita apanga» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index