Search form

NÚMEROS 8

Lamparapi ninata japichinamanta

1Mandac Diosca Moisestaca: 2«Aarontaca: “Candeleropi cac canchis lamparacunata japichishpaca, ñaupa ladota achicyachichun churangui” nishpa, mandangui» nirca.

3Chaimantami Aaronca Mandac Dios Moisesta mandashca shinallatac lamparacunata japichishpa, ñaupa ladota achicyachichun churarca. 4Chai candelabroca curita martillohuan huactashpa ruhuashcami carca. Chaica Mandac Dios Moisesta mandashca shina, chaquipish, lamparacunata churanapish curita martillohuan huactashpa ruhuashcami carca.

Levitacunata Diospacllata ruhuanamanta

5Mandac Dios Moisesta rimashpaca: 6«Levitacunataca israelcunamanta chicanyachishpa, mapa illacllata ruhuangui. 7Paicunata mapa illacta ruhuangapacca cashna ruhuangui: Mapa illacta ruhuac yacuta paicunapac jahuapi chirapangui. Paicunapac cuerpotaca cuchillohuan aspishpa, churanatapish tacshachun mandangui. Chashna ruhuacpimi, paicunaca mapa illac tucunga. 8Chaimantaca shuc huagratapish, alli harinatapish aceitehuan masashpami apamuna can. Juchata pichachunca shuc huagratami apamuna can. 9Shinallatac levitacunatapish, israelcunatapish ñucahuan tupana huasi ñaupaman tandachingui. 10Ñuca ñaupapi levitacuna shayaricpica, israelcunami paicunapac uma jahuapi maquita churanga. 11Aaronca levitacunataca israelcunapac ofrendata shina ñucaman cunga. Chashna cucpimi, paicunaca Mandac Dios ñucata servinga.

12Chai quipami levitacunaca becicunapac uma jahuapi maquita churanga. Chashna churacpica, shuc becitaca juchata pichachun, shuctaca levitacuna jucha illac saquirichun, ñucaman cushpa tucui rupachingui. 13Chai quipaca Aaronpac, paipac churicunapac ñaupaman levitacunata pushamushpa, Mandac Dios ñucaman ofrendata shina cungui. 14Levitacuna ñucapaclla cachunmi paicunataca israelpuramanta chicanyachina cangui.

15Chashnami levitacunaca ñucahuan tupana huasipi servi callaringa. Paicunaca mapa illacta ruhuashpa, ñucaman cushca ofrenda shinami canga. 16Levitacunaca israelpuramanta ñucapaclla chicanyachishcami cancuna. Paicunataca tucui israelcunapac punta churicunapac randimi ñucapaclla cachun chicanyachircani. 17Tucui israelcunapac punta churicunapish, animalcunapish tucuimi ñucapaclla can. Paicunataca ñuca Egipto llactapi punta churicunatapish, punta animalcunatapish huañuchicushpami, paicunataca ñucapaclla cachun chicanyachircani. 18Levitacunataca tucui israelcunapac punta churicunapac randimi acllarcani. 19Ñucami levitacunataca israelpuramanta acllashpa, Aaronman, paipac churicunaman ñucahuan tupana huasipi israelcunapac randi servichun curcani. Paicunaca israelcuna ñucapaclla ucuman yaicushpa, llaquita apanatami jarcanga» nirca.

20Moisespish, Aaronpish, tandanacushca israelcunapish Mandac Dios levitacunata imata ruhuachichun Moisesta mandashca shinallatacmi ruhuarca. 21Levitacunaca mapa illac tucungapacmi paicunapac churanatapish tacsharca. Chashna ruhuacpimi, Aaronca paicunataca Mandac Diosman ofrendata shina curca. Chaimantami paicunaca juchata pichachun Diosman ofrendata curca. 22Mandac Dios Moisesta mandashca shinallatacmi levitacunaca Dios-huan tupana huasipi Aaronpac, paipac churicunapac ñaupapi servingapac yaicurca.

23Chashna cacpimi, Mandac Diosca Moisestaca: 24«Levitacunaca caicunatami ruhuana can. Ishcai chunga pichca huatayuc levitacunaca ñucahuan tupana huasipimi servinga. 25Cutin pichca chunga huatayuc levitacunaca ña mana servingapac yaicunachu can. 26Ashtahuanpish paicunapac huauquicunahuanmi ñucahuan tupana huasipi ricuccunata ayudanga. Mana servinachu can. Chashnami levitacunata servichun churana cangui» nirca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index