Search form

NÚMEROS 9

Pascua fiesta micuimanta

1Israelcuna Egipto llactamanta llucshishca huata callari quillapi, Sinaí shitashca pambapi Mandac Dios Moisesta rimashpaca: 2«Israelcunaca Pascua fiesta micuitaca chai punzhallapitacmi ruhuana can. 3Mandashca shina, callari quilla chunga chuscu punzha chishita Pascua micunata ruhuashpa, cushicushpa micunguichic. Chaitaca ruhuana punzhallapitacmi ruhuana» nirca.

4Chashnami Moisesca israelcunataca Pascua micuita ruhuachun mandarca. 5Chaimantami israelcunaca huata callari quilla, chunga chuscu punzha chishita Sinaí urcupi Pascua micuita ruhuarca. Chashnami israelcunaca Mandac Dios Moisesta mandashca shinallatac ruhuarca.

6Ashtahuanpish maijanca huañushcapi tuparishpa mapa cashcamantami Pascua micuitaca mana micui pudircacuna. Chaimantami paicunaca Moisespacman, Aaronpacman 7shamushpaca:

—Ñucanchicca huañushcapi tuparishpa mapami canchic. Ñucanchicca, ¿ima nishpatac caishuc israelcunahuan pacta ofrendata cuna punzhallapitac Mandac Diosman mana cui pudinchic?— nirca.

8Shina nicpimi Moisesca:

—Mandac Dios cancunamanta imata nicta shuyaichic— nirca.

9Chai quipami Mandac Diosca Moisestaca:

10—Israelcunataca: “Cancunapuramanta, mana cashpaca cancunapac huahuacunamantaca huañushcapi tuparishpa mapayashca cashpapish, carupi cashpapish Mandac Dios ñucata yuyarishpa Pascua micuita ruhuai pudinmi. 11Chaica quipa quilla, chunga chuscu punzha chishimi Pascua micuita ruhuashpa, jayac quihuahuan, levadura illac tandahuan micuna can. 12Chaitaca cayandi punzhapacca mana huacaichinachu, shinallatac chai animalpac tullutapish mana paquinachu. Ima shina mandashca shinami ruhuana can.

13Maijan manapish mapa cashpa, manapish caru llactapi cashpa Pascua micuita mana ruhuacca israelpuramanta anchuchishcami canga. Mandac Dios ñuca mandashca punzhapi ofrendata mana cushcamantami llaquichishca canga.

14Cancunahuan causac shuctac llactata runacunapish Mandac Dios ñucata yuyarishpa, Pascuata ruhuashpaca ima shina mandashca shinami ruhuana can. Chai quillcashpa mandashcacunallatatacmi cancunahuan causac shuctac runacunapish, quiquin llactamanta caccunapish ruhuana can” ningui— nirca.

Dios-huan tupana huasi jahuata puyu tapashcamanta

(Ex 40.34-38)

15Dios-huan tupana huasita shayachi punzhapica mandashcata huacaichina Arca tiyacuc carpa huasitami puyu taparca. Tutaca nina shinami, huasi jahuapica tutamantacaman carca. 16Chashnami punzhanta puyu tapashca shina carca. Tutaca nina rupacuc shinami ricurirca. 17Dios-huan tupana huasi jahuamanta puyu anchuricpica, israelcunapish ric callarircami. Puyu maipi shayaricpica, paicunapish carpa huasicunata shayachishpami tiyaric carca. 18Mandac Dios mandacpimi, israelcunaca ric carca. Mandac Dios mandacpimi, maipi tiyarina cacpica, tiyaric carca. 19Mandac Diospac carpa huasi jahuapi puyu unai punzhacunata cacpica, israelcunaca Mandac Dios mandashcata cazushpami, mana ric carca. 20Maijan cutinca asha punzhallatami Dios-huan tupana huasi jahuapica puyuca caclla carca. Chai puyu ña anchuricpica, Mandac Dios mandashcata cazushpami israelcunaca chai puyuta catishpa ric carca. Puyu maipi shayaricpica, chaipimi paicunapac carpa huasicunata shayachishpa tiyaric carca. 21Maijan cutinca chishimanta cayandi tutamantacamanmi puyuca tapashca carca. Chashna cacpipish, tutamanta puyu anchuricpica, ricllami carca. Mana cashpaca, 22chishita puyu anchuricpica, ricllami carca. Puyuca maijan cutinca ishcai punzhata, shuc quillata, mana cashpaca shuc huatata Dios-huan tupana huasi jahuapi cacpica, israelcunaca maiman mana rishpami chaillapitac caclla carca. Ashtahuanpish puyu anchuricpimi, puri callari carca. 23Israelcunaca Mandac Dios mandacpimi, maipi tiyarina cacpipish, tiyaric carca. Mandac Dios mandacpimi, ric carca. Chashnami Moisesman Mandac Dios mandashca shinallatac tucuita ruhuarca.

Dios Rimashcata Quillcashcami

Dios Rimashcata Quillcashcami © Sociedades Bíblicas Unidas 2010

Texto Biblia en Quichua Cañar © Sociedades Bíblicas Unidas, 2010.

More Info | Version Index