Search form

Maleko 13

Yesu numa tabuna koigwaligwalina ye hededenonohai

(Mataiyo 24:1-2; Luka 21:5-6)

1Yesu maiyana hekahekatao numa tabuna unai se pesa, na yona hekahekatao wa hesau ye hededelau Yesu unai ye wane, “Tanuwaga, numa lauyahidi ne wekudi woiyawaꞌudoidi ne sola ku kitadi yo hinage numa namwamuyomuyoudi ne!”* 2Yesu ye wane, “Teina numa yo woyo lakilakidi maudoidi ta kwa kitadi? Taba nige weku hesau ye kaitalae weku hesau kewana ne unai. Dius kadi waiunu kabo maudoidi se koigwaligwalihegehedi.”

Tanoubu yona huyagehe hekihekinoina

(Mataiyo 24:3-14; Luka 21:7-19)

3Muliyena kabo Olibe koyana unai Yesu maiyana hekahekatao se tutuli na numa tabuna se kaikaikewalaei. Na Petelo, Yamesi, Yowane yo Andeleya se bom se laoma Yesu unai na se henamaiyei se wane, 4“Teina ginauli ta kauyana kabo se tubu, yo hekihekinoidi saha kabo se tububaguna, ku hededehemasalaha kalimaiwai?” 5Yesu ye wane, “Komiu kwa kitakitanamwanamwa, madai se lupohaigomiu. 6Tamowai gwaudi kabo se laoma yau hesagu se hepaisowa na se wane, ‘Yau Keliso ede,’ na tamowai gwaudi se lupohaidi. 7Huyana iyala dagugudi o wasadi kwa lapuidi, tabu kwa matausi. Teina ginaulidi ta kabo se tubu, na tanoubu ta yona huyagehe meta sola. 8Magai hesau yo magai hesau kabo se haiꞌiyaꞌiyalaꞌuyoidi, basileiya hesau yo basileiya hesau kabo se haiꞌiyaꞌiyalaꞌuyoidi. Yo mwanikuniku teha hekadi udiyedi yo hasahasali hinage. Hekihekinoi ta yodi tubutubu meta kana kao doha sine diyadiyakana ye hetubu bena ye labalaba. 9Komiu kwa kitakitanamwanamwaegomiu! Tamowai kabo se woyalaegomiu kabalaulauhetala udiyedi, yo sunago kalodi udiyedi kabo se pidiligomiu. Yau debaguwai kabo se woyalaegomiu tamowai lakilakidiyao yo wasawasa udiyedi, na bena kabo kwa hededehemasalahagau siya kalidiwai.

10Bagubagunana komiu yo tauhemuliwatanigau maudoidi teina wasa namwanamwana ta bena kwa lauguguyaei basileiya maudoidi udiyedi, na kabo tanoubu yona huyagehe. 11Na taba huyana se paigomiu yo se laegomiu kabalauhetala udiyedi, meta tabu kwa nuwanuwatu kabo hedehedede saha udiyedi kwa hedehedede. Na saha Yaubada ye leyawa ne unai kwa hedehedede, matawuwuna komiu taba nige yomi nuwanuwatuyena kwa hedehedede, na Yaluwa Tabuna mo iya kabo ye hekatagomiu na kwa hedehedede.

12Tamowai kabo yona saeya kana ye walohai, yo tama kabo natuna kana ye walohai. Natu kabo tamadiyao yo sinadiyao maiyadi se haikawayagala na kadi se walohai na kabo se unuidi. 13Tamowai kabo se subugomiu yau debaguwai. Na kaiteya ye tolobayao ye lau ee kamkamna ne kana siga unai, Yaubada kabo ye hemauli.”

Kamkamnalakilaki huyana

(Mataiyo 24:15-28; Luka 21:20-24)

14Na kabo Yesu ye wane, “Ginauli hesau nuwamatamatausina iya yababa lakilakina tauginaulina* kabo kwa kita ye totolo nige yona kabatolo mamohoina unai—tauhasilina bena ye nuwatulobai! Huyana ne unai Yudeya taumiyaina taba se wasabu se lau kuduli udiyedi se kenowadam. 15Kaiteyana yona numa kewana unai ye pesadobi tabu ye mwalaesae numa kalona unai bena gogo hesau ye hai. 16Hinage kaiteya yona koya unai ye paipaisowa, tabu ye uyo yona numa unai kana kwama hesabana. 17Huyana ne unai taudiyadiyaka yo waiwaihiuwo labalabadiyao, siya kabo se kamkamnakalili. 18Na taba kwa tapwatapwalolo bena yomi huyawasabu ne tabu huyagwagwama unai. 19Tenem mayadaidi ne udiyedi kabo kamkamna lakilakina ye tubu. Yaubada tanoubu yona huyaginaulina wa unai na ye laoma ee teina nige kamkamna hesau doha teina, yo hinage taba nige ye tubuꞌuyo. 20Tenem mayadaidi ne Guiyau kabo ye hekubwadi. Ena nige ye hekubwadi, taba nige tamowai hesau gonowana ye miya. Na iya yona kaisunuwa tamowaidi hesabadi kabo huya ne ye hekubwa. 21Tenem huyana ne unai, ena tamowai hesau ye hededelaowa kalimiuwai ye wane, ‘Keliso iya ede teinai!’, o ‘Keliso iya ede temenai!’, yona hedehedede ne tabu kwa kawamamohoiyei. 22Matawuwuna ede Keliso lupolupodi yo peloweta lupolupodi kabo se masalaha. Siya kabo hekihekinoi yo laulau gigigigibwalidi se ginaulidi na udiyedi bena tamowai se lupohaidi, yo hinage se kaipate Yaubada yona kaisunuwa tamowaidi se lupohaidi. 23Unai komiu kwa kitahetetenamwanamwaegomiu! Ginauli maudoidi ya hededenonohaidiko kalimiuwai!”

Keliso yona uyoma

(Mataiyo 24:29-31; Luka 21:25-28)

24Na kabo Yesu ye wane, “Kamkamnalakilaki mayadaidi ne gehedi ne unai kabo mahana ye wahuwahuhuli, yo waikena taba nige ye dawaya. 25Galewa kipwaladi kabo se beku, yo galewa ginaulidi hekadi kabo se tabutabubu.* 26Na tamowai maudoidi kabo Tau Natuna se kita yada unai ye laoma ma gigibwalina yo ma namanamalina. 27Iya yona anelu kabo ye hetamalidi se lau yaumai hasi yodi kabalaoma udiyedi, yo tanoubu yo galewa kadi sigasiga udiyedi kabo yona kaisunuwa tamowaidi se woyagogoidima.”

Yesu yona huyaꞌuyoma kaiwa unai ye heyaheyasoniyei

(Mataiyo 24:32-35; Luka 21:29-33)

28Na kabo Yesu ye wane, “Kaiwa* heyaheyasonina hedehededena ne kwa kitalau unai. Huyana lagadi ne udiyedi se bwagu, kabo lugudi se laukaladi, meta kwa nuwatui yaikini huyana ye lage. 29Doha hinage, huyana teina ginauli maudoidi ta kabo kwa kitadi se tubu, meta kwa nuwatui Tau Natuna yona huyaꞌuyoma mayadaina* ye hanahanaumako numa kawakedana unai. 30Ya hededemamohoi! Teina isi ta taba nige ye gehe, ye lau ee teina ginauli maudoidi ta se tubu. 31Galewa yo tanoubu kabo se gehe, na yogu hedehedede ta taba nige kana siga.”

Bena ta nonononoha!

(Mataiyo 24:36-44)

32Na kabo Yesu ye wane, “Mayadaina yo mahanana* ne nige hesau kabina ye kata. Galewa aneludi yo Natuna hinage nige kabina se kata, na Tamana ye bom mo. 33Komiu bena kwa kitanamwanamwa yo kwa nonononoha, matawuwuna mahanana ne nige kabina kwa kata. 34Nuwatu ta heyaheyasonina meta doha teina: Tamowai hesau yona numa ye laugabaei ye lau magai kedalohaloha unai. Yona heyayai tauhaidi ye toledi yona numa se kitahetete. Hesau to hesau yodi gigibwali yo yodi paisowa ye moseidi, na keda taukitahetetena ye hededelau unai bena ye silasilawa. 35Unai komiu, huya maudoina kwa silasilawa, matawuwuna numa tanuwagana yona huyaꞌuyoma nige kabina kwa kata, nuwana kabo meimeilahi, o boniyai duwaduwalina, o pwaole se doudou, o malatomtom gagilina unai. 36Yona uyoma ne unai tabu bena ye lobaigomiu kwa kenokeno. 37Hedehedede ta ya hedede kalimiuwai yo tamowai maudoidi udiyedi ya hededelau ya wane, ‘Bena kwa silasilawa yo kwa nonononoha!’ ”

Mataiyo, Maleko, Apostolo long tokples Saliba long Niugini

© Wycliffe Bible Translators, Inc. All rights reserved.

More Info | Version Index