Search form

Maleko 7

Kulutubu laugagayodi lauwatanina unai tamowai Yaubada yona laugagayo se utusi

(Mataiyo 15:1-9)

1Paliseya tamowaidi yo laugagayo taulauhekata hekadi Yelusalema unai se laoma na se lagegogoma Yesu unai. 2Yona hekahekatao hekadi se kitadi se kaikai, na nige se nimadeuli doha kadi kulutubu yodi kabikabi mamohoina unai. 3Paliseya tamowaidi yo Dius tamowaidi maudoidi kadi kulutubu miyamiyadi se hekasisiyedi, unai taba nige se kaikai kana siga nimadi se deulidi doha kulutubu yodi kabikabi mamohoina unai. 4Ena yodi kabalokulokune unai se uyoma meta se nimadeulibaguna na kabo se kaikai. Kulutubu yodi kabikabi yo laugagayo se bado bena se hekasisiyedi. Hinage kabikabi hekadi doha keyaka yo waila kabayaiyai yo gulewa deudeulidi udiyedi.

5Unai Paliseya tamowaidi yo laugagayo taulauhekata Yesu se henamai se wane, “Idohagi to kowa yom hekahekatao kulutubu miyamiyadi nige se miyawatanidi, na ma nimabikibikidi se kaikai?” 6Yesu ye hededelau udiyedi ye wane, “Komiu taukailupolupo, Aisaiya peloweta kami hedehedede ye hededehemasalaha wa meta mamohoi, doha ye kuliyako ye wane,

‘Siya kawadi unai mo se hedebasaegau, na nuwadi unai se lausuwalaegau.

7Siya yodi hedebasaegau nige kaniyona, matawuwuna tamowai yodi laugagayo mo se hekahekatadi.’ (Aisaiya 29:13)

8Yaubada yona laugagayo kwa tolehesuwaladi, na tamowai yodi laugagayo kwa kabihekahinidi.”

9Na kabo ye wane, “Komiu laugagayo tolebuina unai kwa katakalili ede Yaubada yona laugagayo kwa tolehesuwala na komiu kami kulutubu kabikabidiyao mo kwa lauwatanidi. 10Mose ye hededeyako ye wane,

‘Tamam yo sinam ku hekasisiyeidi.’ (Esodo 20:12)

Yo ye wane,

‘Ena hesau tamana yo sinana ye hededeheyababadi, iya kabo se unuhemwaloi.’ (Lewitikasi 20:9)

11Na komiu yomi laugagayo doha teina: Ena tamowai hesau sinana yo tamana yodi kainauya ye nonohai na nige ye mosei udiyedi na ye mosei Yaubada unai, 12kwa hedede temeta laulau ne bena ye dudulai. 13Unai komiu yomi laugagayo kwa lauwatani na Yaubada yona laugagayo kwa tolehesuwala. Yo hinage Yaubada yona laugagayo hekadi hinage kwa tolebuidi gonogonowana doha teina.”

Ginauli sahasahadi tamowai se hebiki

(Mataiyo 15:10-20)

14Na kabo Yesu tamowai maudoidi wa ye yoganedi se laoma iya unai, na ye hededelau udiyedi ye wane, “Komiu maudoimiu yogu hedehedede kwa lapunamwanamwaei yo bena kwa nuwatulobai. 15-16Tamowai saha ye kai na ye dobi bogana luwanawai meta nige ye hebiki Yaubada matanawai. Na ginauli saha nuwanawai ye pesama meta iya ye hebiki ede.” *

17Kabo Yesu maiyana hekahekatao boda wa se laugabaedi na se mwalaesae numa hesau unai, na kabo palabole kaniyona wa se henamaiyei. 18Iya ye hededelau udiyedi ye wane, “Idohagi to nige kwa nuwatulobai? Komiu taba kabina kwa kata saha tamowai ye kai na ye dobi bogana luwanawai nige ye hebiki. 19Kana kao ede nige ye dobi nuwana unai, na ye dobi bogana luwanawai, na kabo ye miyagabaei.” (Teina hedehedede ta unai Yesu ye hededehemasalaha meta kai maudoidi se aꞌa.) 20Kabotaki ye wane, “Saha tamowai nuwanawai ye pesama meta iya ye hebiki ede, 21matawuwuna saha nuwanawai se pesama wa siya ede teina: nuwatu yabayababadi, laulaubikibiki,* kaiwahali, kaiunu, 22ganawali, samagogo, henunu, kailupolupo, matabado, kaikalomagigili, monunu, nuwasaesae, yo walobayao. 23Teina ginauli yabayababadi maudoidi ne meta tamowai nuwana unai se laoma yo siya tauhebikina ede Yaubada matana unai.”

Dagela waihiuna yona sunuma

(Mataiyo 15:21-28)

24Temenai kabo Yesu ye dahalai ye lau Taiya yo Sidona* tehana ne unai. Na ye mwalaesae numa hesau kalona unai. Yona nuwatu meta bena tabu iya se kita. Na iyamo nige gonowana ye tauwadam.

25-26Magai wa unai waihiu hesau, iya dagela waihiuna Siliya tehana tupwana Penisiya unai ye laoma. Natuna sinekuku meta yaluwa yababana ye luwu iya unai. Na waihiu wa Yesu wasana ye lapui ede ye laoma ye tulibono iya talanuwana unai na ye kaibwada Yesu unai taba yaluwa yababana wa natuna wa unai ne ye hededehepesa. 27Na Yesu ye hededelau iya unai ye wane, “Sola wawayao ya hekaibagunaedi. Tabu wawayao kadi kai ya gabalae kedewa* udiyedi, temeta nige ye namwa.” 28Waihiu wa ye hededebui ye wane, “Guiyau, mamohoi! Na iyamo wawayao saha se kaidi na mapuladi se bekudobi hatahata gunina ne unai meta kedewa kabo se kaidi.” 29Na kabo Yesu ye hededelau unai ye wane, “Yom hedehedede ta ye namwakalili. Unai ku lau yom numa. Yaluwa yabayababana wa natum ye pesagabaeyako.” 30Waihiu wa kabo ye uyo numa, metai natuna wa ye kita ye kenokeno, na yaluwa yabayababana wa ye pesagabaeyako.

Yesu tamowai beyakolakolana yo ye unaꞌuna ye henamwanamwa

(Mataiyo 15:29-31)

31Yesu Taiya kana sigasiga ye laugabaei na ye lau Sidona yo ye dobi Galili Gabwana, na kabo ye lage Dekapolisi tehanawai. 32Temenai tamowai beyakolakolana yo ye unaꞌuna se woyaiyama Yesu unai. Na se kaibwada Yesu unai bena nimana ye tolesae iya unai. 33Boda wa luwadiyena Yesu tamowai wa ye woyahesuwala. Kabo ye kabilau beyana duhadi udiyedi, yo ye kaiso nimana unai na ye kabilau memenana unai. 34Ye kitasae galewa ne unai na katekamkamna nuwana ye mwayau, na ye hededelau tamowai wa unai ye wane, “Epata”,* kaniyona ede, “Ku malapai.” 35Mahanana ne unai beyana se malapai yo memena unai gonowana ye hedehededenamwanamwa.

36Yesu boda wa ye guguyaidi na ye hededebayaolau udiyedi tabu wasana se hededehelaki. Iyamo nige gonowana se lapulau unai, na huya maudoina se hededehelakikaliliyei. 37Tamowai maudoidi se nokokalili se wane, “Ginauli maudoidi ye ginaulidi meta se namwa. Tamowai beya kolakoladi ye hemalapaidi, yo tamowai unaꞌunadi ye saguidi na se hedehedede.”

Mataiyo, Maleko, Apostolo long tokples Saliba long Niugini

© Wycliffe Bible Translators, Inc. All rights reserved.

More Info | Version Index