Search form

Luk 18

Avui Wasilakan ji sawekwan ji kremangrewa hala

1Jisas ma ol orin tiyandari man mashi las sauheimak or sawe normu mukura, unak Avui Wasilakan ermba ermbak li sawekwan li kremangrewan li halakmbahan. * 2“Yanga lasik majistret lar lindari ri. Majistret oto mbeek Avui Wasilakan or ajehe man jelyakurik hishindari ambu ri. 3Hako mumbla las kuyanga orok lindari sir. Sir ermba ermbak majistret otohik si raha karem sawendari sir, “Ma lar anin kavakavak or ukwak undua. Mir anin jelyaha orin sauntleshinak or halaka,” karem sawendari sira. 4Ermba ermbak si ifarafa si sawerik or misihi mbeek sirin jelyakurik hishindari ambu ri. Hako am or krehe ormu hishira, “An mbeek Avui Wasilakan a ajehe man jelyakwak a hishinda ambu nir. 5Hako os a hala nahi, mumbla roso mashi roso nom si ifarafa sawenak am a kreher. Uwa osik os si mbawa hom a uka.” ” 6Karem Wasilaka or mbaha ormu sawera, “Majistret kava kato mbahanda mashin ji misihi ji hishiyarika. 7Os Avui Wasilaka kamahanda ma ondo niri tandi ermba ermbak orin li sawe li tla nahi, wa am lirin kumaifakundar? Wahau. 8Jirin amu sawenduwa. Kolomalok lirin jelyakwa ri. Hako os Ma Jikisi Avui Wasilakahi oto indik or takuna wolo ma lal am orin li hishindiyanak or heyekundal?”

Sauheima ma frijip Avui Wasilakan fri saweri

9Ma lal karem hishinda ola. Lir jivik li nawak lal mbeek lir nanda hom nanda ambu lir. Undari osik Jisas ma ol erem hishindari man ormu sauheimak sawera, 10“Ma frijip Avui Wasilakan fri sawekmbaha tempel akak frimu layira. Lar Farisi, lar takis yan landa ria. 11Farisi oto orok or sihi wavu orhikop Avui Wasilakan karem ormu sawera, “Avui, an mbeek ma kava ondo hom a nanda ambu onik mirin armesarmek amu sawenduwa. Ma ondo hirnyaha kavakavan li uhu nokophirmbirinda lir. Hako an wahau. Tor torok liwa takis yan landa ma roton heyeka. An mbeek or hom a nanda ambu nir. 12Wik namtarmba namtarmbak tandi frijip akwan a halaha mirin a sawenda ona. Uhu mbele mbele ol a lawan 10-pelak a humasi owehe namtas mirin a handa nir,” karem ormu mbara. *

13Hako ma or takis yan landa ma oto homek or sihi mbeek metenje yok larasa mawuri ambu ri. Or maruknyaha ormu mbara, “Avui, an ma kava nir. Hako mir anjik holoka,” karem ormu mbara.” * 14Uhu Jisas mu mbara, “Jirin amu sawenduwa. Ma or takis yan landa ma oto Avui Wasilakahi misokomek jivik or naha indik aka orhik ormu ira. Hako Farisi oto, wahau. Mberem ushirik? Ma ol hi lihin hauowenda ondo Avui Wasilaka hi lihin or hakaowenda lir. Ma ol lihinjik hafakaha liwa, Avui Wasilaka hi lihin or hauowenda lir.” *

Hulaima nokopma jikisakri lihin Jisasik li laharari

(Mt 19:13-15; Mk 10:13-16)

15Hulaima nokopma jikisakri lihin Jisasik limu laharara. Unak lirin or toloho Avuin or sawenak lirin armek or ukmbahan. Hako orin tiyandari ma ondo oson li heyehe ma ondon olmu ngriara. 16Urik Jisas usharik pasir os or siri mishik jikisi ondon limu laharara. Urik orin tiyandari man ormu sawera, “Jir jikisi tondon halashinak anhik li raka. Jir avak pantlewa hala. Ma ol jikisakri rondo hom nawa ma ondo Avui Wasilakahi krahak li sihi yanga jivik ikwa lira. 17Omendingak jirin amu sawenduwa. Os jikisakri kanda rondo hom ji naha kraha Avui Wasilakahik ji si nahi ambu, jir mbeek yanga jivik i layikwa ambu jir, wahau.” *

Ma or mbele mbele ngashi oto Jisasin heyekurik or tari

(Mt 19:16-30; Mk 10:17-31)

18Urik malakama lar Jisasik or taha ormu silira, “Mir tisa jivi mira. Mberem a uhu os ermba ermbak linda oson avai laku?” * 19Urik Jisas mu orin sawera, “Mberem ushiwak an jivi, karem mi mbandu? Avui Wasilaka ortonom jivi ria. 20Angop mi heyenda sir, lo ol Moses mas or kayehendari ondon. Nokophirmbiriwa hala. Man mandingormewa hala. Hirnyawa hala. Man sembe mbaha haimba handambawa hala. Avoko nijava mihin tiyaha mashi frihin misika.” * 21Karem or mbarik ormu mbara, “An jikisakrik a nari wolokop sishihi raha ter nga mashi ondo amber angop a tiyarakonda nir.” 22Karem or mbarik ormu sawera, “Mbele las os mendek mi nawak amu heyenduwa. Mir mbele mbele mihi ondo amber mi mbashinak li frungawushinak ya oson mi laha erndakava ondon haka. Ushihi ra anin tiyaka. Os erem mi uwa mbele mbele kumak hevenik mi lakundan os mimu hundujenduwa.” 23Malakama oto mashi oson or misihi fumunyava orhi kava heyehe wavu orhi nga kavak er nari sir. Mberem ushirik? Or ya mbele mbele mushak nandari ora.

24Urik Jisas ma oton or heyehe ormu sawera, “Ma ol mbele mbele mushak nanda ondo Avui Wasilakahi siyok li sikmbaha li hishiwa, anala mendekwa sir. 25Kamel lar am kowen tlavanda nil washi orok layikundar? Wahau. Unda hom ma ol mbele mbele ngashi ondo Avui Wasilakahi siyok li sikmbaha li hishiwa, kava ukwa mende sir.” 26Karem or mbarik li misihi limu silira, “Ayo, os erem si na nahi, lawe avak os ermba ermbak linda oson laku?” 27Urik ormu mbara, “Mbele mbele ol ma undahi ambu ondo Avui Wasilaka or undahi lir.”

28Urik Pita mu mbara, “Misi, nir mbele mbele nihin angop er ni halarakoho mirin nimu tiyanduwa.” 29-30Urik ormu mbara, “Omendingak jirin amu sawenduwa. Ma ol Avui Wasilaka ma orhin or arangoshinak li likunda mashin sawe ikmbaha anin tiyanda ma ondon Avui Wasilaka armek or ukwa lir. Mbele mbele aka, nokove, mahasanje, avoko nijava, jikisi lihin li halanda ondohi farniyik misambi torok li liwa wolo warje nga nor hakwa lir. Undanak kumak ermba ermbak linda oson lakwa lir,” karem ormu mbara.

Jisas or haha indik or usahakundarin indik or saweri

(Mt 20:17-19; Mk 10:32-34)

31Jisas ol orin tiyandari ma 12-pela ondon ormu sawera, “Ji misi. Avak Jerusalemik ni ikwa nir. Unak mbele mbele amber os Ma Jikisi Avui Wasilakahik talakmbaha profet mas li kayehendari oso avak omek nakwa sir. * 32Avak orin Romik fehenda ma ondohi tavarenjek li hakwa ri. Uhu kavakavan li mbaha li okolehe li suntlayashikwa ri. * 33Uhu li wakoroho li mandingormekwa ri. Hako niri frijip fri ishinak indiyok usahakwa ria,” karem ormu mbara. 34Hako ma ol orin tiyandari ondo mashi os or mbari oso maintontlo sihi si wanyishirik mbeek yariri ambu lir. *

Jisas misokome tumundarin or mbarik jivik or nari

(Mt 20:29-34; Mk 10:46-52)

35Jisas or ihi kuyanga Jerikok am pasir or narik misokome tumundari ma lar nombo sumbuyok or lihi yanjik ormu silira. 36Or lihi nor misirik ma musha mendek li taltala irik ormu silira, “Mberem ji undua?” 37Urik limu sawera, “Jisas Nasaretik fehenda ormu randuwa.” 38Karem li mbarik kolok wasilakak ormu ushambara, “Jisas, nirambara Devithi mirin, an wavu mi hishiwa.” 39Hako ma ol maifuk tari ma ondo orin li ngriaha limu mbara, “Mir mayam li.” Hako, wahau. Indik wasilaka mendek or ushaha ormu mbara, “Nirambara Devithi mirin, An wavu mi hishiwa.” 40Urik Jisas or taha pasir or sihi nor mbashirik orin limu laharara, os or siri mishik. 41Urik Jisas mu orin silira, “Mberem a miri ukmbaha mi hishindu?” Urik ormu mbara, “Wasilaka, a heyekmbaha namu hishinduwa.” 42Urik Jisas mu sawera, “Misokome mihi avak mi heyekwa sir. Anin mi hishiowewa nombo orok misokome mihi avak jivik nakwa sir.” 43Urik kolok misokome orhi si huririk or heyehe hi Avui Wasilakahin or hauowehe Jisasin ormu tiya ira. Urik ma amber oson li heyehe lir nga nakrem hi Avui Wasilakahin limu hauowera.

Mashi Avui Wasilakahi

©Wycliffe Bible Translators, Inc.All rights reserved.

More Info | Version Index