Search form

1 Samuel 1

Elcaná ichideerã ome

1Efraín+ eujã ee jẽra bɨdepema Ramatayin pꞌuurude Zufdeepa uchiadapꞌedaarã pꞌanapachida. Irudeepa uchiada ɨmɨkꞌĩra aba tꞌɨ̃jarapachida Elcaná. Elcaná akꞌõre Jeroán paji. Jeroán akꞌõre Eliú paji. Eliú akꞌõre Tohu paji. Tohu akꞌõre Zuf paji. Ãra jõmaweda Efraín ëreerãdepema paji. 2Elcanapa wẽra omé iru baji. Aba tꞌɨ̃jarapachida Ana; chi apema Penina. Peninapa warra tꞌopachi. Mamĩda Anapa warra tꞌokꞌaa paji.

3Año chaa Elcaná ichi pꞌuurudeepa uchiapachi Siló pꞌuurudee wãitꞌee Jõmaarã Akꞌõre Waibɨamaa ɨtꞌaa tꞌɨ̃de mãikꞌaapa iru–itꞌee ne–animalaarã paapide. Maapai Silode Elí mãikꞌaapa chi warrarã Ofni, Finés ome Tachi Akꞌõre pꞌaareerã paji. 4Elcanapa ne–animalaarã peepꞌeda, Tachi Akꞌõre–itꞌee paapikꞌãri, Penina eerepema mãikꞌaapa chi warrarãmaa, kꞌaurãmaa chi chiara ũkꞌuru teepachi. 5Mamĩda chi pipɨara bada Anamaa teepachi, iru audú kꞌinia iru bada perã, Tachi Akꞌõrepa irumaa warra tꞌopikꞌaa paji mĩda. 6Peninapa unukꞌãri chi ɨmɨkꞌĩrapa Ana audú kꞌinia iru bɨ, Ana oo iru beepachi kꞌĩsia paraa beemerã, Tachi Akꞌõrepa warra tꞌopikꞌaa pada perã.

7Año chaa Tachi Akꞌõre temaa wãdakꞌãri, Peninapa Ana mãgá oo iru beepachi. Maperã Ana jẽepachi mãikꞌaapa nekꞌokꞌaa paji. 8Chi ɨmɨkꞌĩra Elcanapa mãga unukꞌãri, iidipachi: “Ana, ¿sãapꞌeda jẽe nɨ̃bɨma? apachi. ¿Sãapꞌeda kꞌĩra pia–ee nɨ̃bɨma mãikꞌaapa nekꞌo–ee nɨ̃bɨma? ¿Pɨ–itꞌee mɨ piara bɨ–ekꞌã apachi, warrarã diez kꞌãyaara?”

Anapa ɨtꞌaa iidida

9Ewari aba Siló pꞌuurude pꞌanɨde, nekꞌodapꞌeda mãikꞌaapa ne–inaa todapꞌeda, Ana bainɨ̃ beeji mãikꞌaapa wãji Tachi Akꞌõre tedee. Pꞌaare Elí mama su–akꞌɨ baji Tachi Akꞌõre tedepema puerta kꞌaitꞌa. 10Ana tꞌãri pꞌua nɨ̃bɨde mãikꞌaapa jẽe nɨ̃bɨde Tachi Akꞌõremaa ɨtꞌaa tꞌɨ̃maa beeji 11mãikꞌaapa nãga ooitꞌeeda aji: “Jõmaarã Akꞌõre Waibɨa, mɨ pɨ mimiapari. Pɨa mɨ akꞌɨpꞌeda, chupɨria kꞌawaaru pɨrã mãikꞌaapa mɨmaa warra tꞌopiru pɨrã, mɨa pɨ–itꞌee mãgɨ́ warra awara bɨitꞌee pɨ tede mimia bapariimerã. Akꞌɨpiitꞌee mɨa wãara mãga ooitꞌee, ma warra puda tꞌɨɨkꞌaa paitꞌeeda” aji.

12Ana taarã ɨtꞌaa tꞌɨ̃maa bada perã Tachi Akꞌõre kꞌĩrapite, Elipa akꞌɨji iru itꞌaimaa kꞌawaitꞌee pedeemaata bɨ wa mãga–e. 13Mamĩda Anapa ichi tꞌãridepai ɨtꞌaa tꞌɨ̃maa baji. Mapa chi itꞌai aupai mimikꞌa baji mĩda, Elipa iru pedee ũrikꞌaa paji. Maperã Elipa kꞌĩsiaji itꞌúapata piu bɨ.

14Mãpai nãga jaraji:

—¿Sãapaita pɨ itꞌuapa piu–ee baitꞌeema? aji. ¡Waa vino tonaapáde! aji.

15Anapa pꞌanauji:

—Mãga–epɨ. Mɨa vino maa–e pɨrã awaraa itꞌua asia to–e bɨ. Jĩpꞌa kꞌĩsia paraa nɨ̃bɨ. Mapa mɨ tꞌãri pꞌua nɨ̃bɨ Tachi Akꞌõremaa jaramaa bɨ. 16Mɨ pɨ mimiapari. Kꞌĩsianáaji mɨ wẽra kꞌachia. Mɨ taarã ɨtꞌaa tꞌɨ̃maa bajida aji, audú kꞌĩsia nɨ̃bairã mãikꞌaapa audú tꞌãri pꞌua nɨ̃bairã.

17Mãpai Elipa mãgaji:

—Mãgara kꞌãiwee wãpáde aji. Mɨa kꞌinia bɨda aji, israelitaarã Akꞌõre Waibɨapa pɨa chupɨria iididakꞌa oomerã.

18Anapa pꞌanauji:

—Mɨa kꞌinia bɨda aji, pɨa mɨ, pɨ mimiapari ichita mãgá pia akꞌɨ bamerã.

Ma tꞌẽepai Ana ãpɨtee cheji ichi badamaa mãikꞌaapa tꞌãri o–ĩa nekꞌoji. Maadakꞌãriipa waa kꞌĩra pia–ee bakꞌaa paji. 19Aɨ norema tapꞌedaweda Tachi Akꞌõremaa ɨtꞌaa tꞌɨ̃de wãdapꞌeda, ãpɨtee chejida ãchi temaa Ramade. Ma tꞌẽepai Elcaná waya chi wẽra Ana ome araa kꞌãiji. Tachi Akꞌõrepa Ana chupɨria kꞌawaaji. 20Mãgá Ana biakꞌoo beeji. Chi ewarimaa pakꞌãri, ɨmɨkꞌĩra warra tꞌo ataji mãikꞌaapa mãgaji: “Iru tꞌɨ̃ bɨitꞌeeda aji, Samuel,+ mɨa Tachi Akꞌõremaa iru iidida perã.”

Anapa Samuel Tachi Akꞌõre–itꞌee awara bɨda

21Ma tꞌẽepai Elcaná ichideerã ome waya Siló pꞌuurudee wãji ichia ooitꞌeeda adakꞌa oode, mãikꞌaapa ne–animalaarã Tachi Akꞌõre–itꞌee paapide ichia año chaa paapipariidakꞌa. 22Mamĩda Ana wã–e paji, aɨ naaweda chi ɨmɨkꞌĩramaa nãga jarada perã:

—Mɨ wã–eda aji, warra ju amaa–emaa. Ju amaakꞌãrita, mɨa teenaitꞌee mãikꞌaapa Tachi Akꞌõre–itꞌee awara bɨitꞌee, mama iru tede bapariimerã.

23Chi ɨmɨkꞌĩra Elcanapa pꞌanauji:

—Pɨa kꞌĩsia bɨkꞌa oopáde aji. Béeji warra ju amaaru misa. Mɨa kꞌinia bɨ Tachi Akꞌõrepa pɨ kꞌaripamerã mãgá oomerã pɨa irumaa jaradakꞌa.

Mãgá Ana teeda beeji chi warra ju amaarumaa. 24Samuel ju amaakꞌãri, atꞌãri ma–ãri bɨta, Anapa ateeji Tachi Akꞌõre temaa Siló pꞌuurude. Ichiaba ateeji pꞌakꞌa ɨmɨkꞌĩra año õpee iru bɨ, harina litro veintidós mãikꞌaapa vino ne–ede tꞌɨda. 25Ma pꞌakꞌa peedapꞌeda mãikꞌaapa Tachi Akꞌõre–itꞌee paapidapꞌeda, chi warra ateejida pꞌaare Elimaa.

26Mãpai Anapa mãgaji:

—Pꞌaare, mɨa juraa bɨ mɨta paji chi nama pɨ kꞌaitꞌa taarã Tachi Akꞌõremaa ɨtꞌaa tꞌɨ̃maa bada. 27Tachi Akꞌõremaa iidiji irua mɨmaa warra teemerã. Irua mɨ chupɨria kꞌawaapꞌeda, na warra teeji. 28Mɨa jaraji warra teeru pɨrã, ma warra aneeitꞌeeda aji, ichi piurumaa iru–itꞌee mimiamerã. Nama bɨda aji.

Elipa mãga ũrikꞌãri, Tachi Akꞌõre kꞌĩrapite bedabaidachi mãikꞌaapa ɨtꞌaa tꞌɨ̃ji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index