Search form

1 Samuel 11

Saulpa amonitaarã pꞌoyaada

1Ma tꞌẽepai amonitaarã rey Najapa ichi soldaorã chipꞌe atapꞌeda, wãjida Galaad eujãdee Jabés pꞌuurudepemaarã ome chõode. Ma pꞌuuru wapꞌɨra iru pꞌanɨde, ma pꞌuurudepemaarãpa irumaa jara pëijida:

—Tai ome pedéeji chõoda–ee pꞌanapataadaitꞌee. Mãga ooru pɨrã, pɨ jua ekꞌari pꞌanapataadaitꞌeeda ajida.

2Ma amonita Najapa pꞌanauji:

—Pia bɨpɨ. Pacto oodáma chõoda–ee pꞌanapataadaitꞌee. Mamĩda mɨa parã jõmaarã juaraarepema tau ẽetꞌaaitꞌeeda aji, ma kꞌaurepa israelitaarã kꞌĩra nejasia pꞌaneedamerã.

3Jabés pꞌuurudepema poro waibɨarãpa pꞌanaujida:

—Kꞌãima siete nɨ́ji, taipa jara pëiruta misa israelitaarã jõmaarãmaa tai kꞌaripa chedamerã. Apidaapa tai kꞌaripa cheda–e pɨrã, pɨa jara bɨkꞌa oodayada ajida.

4Mãpai ma poro waibɨarãpa eperãarã pëijida Guibeadee, Saúl baparimaa. Mãpemaarãmaa nepɨrɨdakꞌãri, jẽe para beeji. 5Mãga nɨde Saúl pacheji ichi pꞌakꞌa arado jidiupataarã ome mãikꞌaapa ma pꞌuurudepemaarã mãgá unukꞌãri, iidiji:

—¿Eperãarã sãgajidama? aji. ¿Sãapꞌeda jẽe para nɨ̃bɨma? aji.

Mãpai nepɨrɨjida Jabés pꞌuurudepemaarãpa jara pëidapꞌedaa. 6Saulpa mãga ũrikꞌãri, Tachi Akꞌõrepa ichi Jaure irumaa pëiji. Mapa Saúl kꞌĩraudachi ma amonitaarã ome. 7Pꞌakꞌa omé atapꞌeda, peekꞌooji mãikꞌaapa tꞌɨapꞌekꞌooji. Ma pꞌakꞌa kꞌapꞌɨa piuda tꞌɨapꞌeda beeda awara–awaraa pëiji israelitaarã jõmaarãmaa mãikꞌaapa ma nechiara ateedapꞌedaarã ome nãga jara pëiji: “Na pꞌakꞌa ome oodakꞌa ooitꞌeeda aji, chi mɨ eere mãikꞌaapa Samuel eere chõode cheda–e pꞌanɨɨrã pꞌakꞌaarã ome.”

Israelitaarãpa mãga ũridakꞌãri, pꞌerakꞌoodachida. Mapa eperã abapai pɨkꞌa chejida Saúl eere chõodaitꞌee. 8Bézec pꞌuuru kꞌaitꞌa chipꞌedaidapꞌeda, Saulpa ichi eere pꞌanadapꞌedaa soldaorã juasiakꞌãri, trescientos mil Israeldepemaarã paji. Jõdee treinta mil Judadepemaarã paji.

9Ma tꞌẽepai Saulpa jaraji ma Jabedeepa chedapꞌedaarãmaa:

—Jabés pꞌuurudepemaarãmaa nãga jaranátɨ: “Nu imatꞌɨpa pai naaweda taipa parã kꞌaripanadaitꞌeeda” aji.

Mãpai ãra wãjida. Saulpa jara pëida nepɨrɨnadakꞌãri, Jabés pꞌuurudepemaarã o–ĩadachida. 10Mãpai seewata amonitaarã rey Najamaa nãga jara pëijida: “Nu pɨ jua ekꞌari pꞌaneedaitꞌeeda ajida, pɨa tai ome oomerã pɨchia kꞌinia bɨkꞌa.”

11Aɨ norema Saulpa ichi soldaorã tꞌooda õpeede tꞌooji. Ɨ̃datɨpodopa wãjida amonitaarã carpa eebai jira bɨdapꞌedaamaa mãikꞌaapa mãɨrã peekꞌoo wãjida imatꞌɨpa parumaa. Chi chokꞌai uchiadapꞌedaarã waaweepa jĩchoo wãjida. Mãgá eperãarã omé araa pꞌaneeda–e paji.

Israelitaarãpa Saúl kꞌinia pꞌanadapꞌedaa ãchi rey pamerã

12Maapꞌeda israelitaarã ũkꞌuruurãpa Samuelmaa mãgajida:

—¿Kꞌairãpa jarajidama ajida, Saúl tachi rey panaamerã? ¡Ma eperãarã taimaa teepáde ajida, peekꞌoodaitꞌee perã!

13Mamĩda Saulpa mãgaji:

—Idi apida piuda–eda aji, Tachi Akꞌõrepa idi tachi israelitaarã kꞌaripada perã.

14Mãpai Samuelpa jõmaarãmaa nãga jaraji:

—Guilgaldee wãdáma aji, Saúl rey bɨdaitꞌee.

15Mãgá israelitaarã jõmaweda Guilgaldee wãjida. Mama Tachi Akꞌõre kꞌĩrapite Saúl ãchi rey bɨjida. Ichiaba ne–animalaarã peedapꞌeda, Tachi Akꞌõre–itꞌee paapijida ãchi aukꞌaarã ome jedekꞌodaitꞌee. Mama Saúl mãikꞌaapa israelitaarã o–ĩa pꞌaneejida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index