Search form

1 Samuel 12

Samuelpa israelitaarãmaa jarada

1Tꞌẽepai Samuelpa israelitaarã jõmaarãmaa nãga jaraji:

—¡Ũrítɨ! Mɨa oodoo parãpa iididapꞌedaakꞌa. Rey kꞌinia pꞌanɨda adakꞌãri, mɨa rey bɨji parã akꞌɨ bapariimerã. 2Nama bɨda aji, pãchi rey. Irua parã akꞌɨ bapariitꞌee mãikꞌaapa parãmaa jaraitꞌee kꞌãata oodaipia bɨ. Mɨ audú chonaa bɨ. Poro tꞌorroo bɨ. Mɨ warrarã parã tꞌãide pꞌanɨ. Kꞌũtrãaweda mɨa parã kꞌaripadoo ɨ̃rá parumaa. 3Mɨ nama iru pꞌanɨ. Ɨ̃raweda jarátɨ Tachi Akꞌõre kꞌĩrapite mãikꞌaapa irua rey jɨrɨtꞌerada kꞌĩrapite mɨchi–itꞌee ataji pɨrã awaraarã pꞌakꞌa wa burro, maa–e pɨrã parãdepema apidaamaa ne–inaa kꞌachia ooji pɨrã, maa–e pɨrã pꞌaratꞌa jitaji pɨrã eperã aba piara akꞌɨitꞌee awaraarã kꞌãyaara. Jaradapáde aji. Mɨa ma pari pꞌaaitꞌee.

4Mãpai arii pꞌanadapꞌedaarãpa pꞌanaujida:

—Mãga ookꞌaa pajida ajida. Pɨa taimaa ne–inaa kꞌachia apida oo–e paji, tai kꞌachia iru ba–e paji pɨchi jua ekꞌari mãikꞌaapa pꞌaratꞌa jitakꞌaa paji ne–inaa kꞌachia oo–e bɨ ɨmɨateeitꞌee.

5Mãpai Samuelpa mãgaji:

—Mãgara Tachi Akꞌõrepa mãikꞌaapa irua jɨrɨtꞌerada reypa ũri pꞌanɨ parãpa nepɨra apida mɨ ome wẽe pꞌanɨ.

Ãrapa pꞌanaujida:

—Mãgada ajida.

6Ma awara Samuelpa israelitaarãmaa nãga jaraji:

—Moisés kꞌapꞌɨa mãikꞌaapa Aarón kꞌapꞌɨa Tachi Akꞌõrepa parã chonaarã Egipto eujãdeepa uchiapiji. 7Ɨ̃rá Tachi Akꞌõre kꞌĩrapite akꞌɨnɨ̃ pꞌanéetɨ charra kꞌĩrapite akꞌɨnɨ̃ pꞌaneekꞌajidakꞌa, mɨa parã ɨmɨateeitꞌee perã. Ũrítɨ mɨa parãmaa kꞌirãpapiru misa irua ooda parã chonaarã ome mãikꞌaapa parã kꞌaripaitꞌee.

8’Jacob ichideerã ome Egipto eujãde pꞌanadapꞌeda, taarã pakꞌãri, Egipto pidaarãpa ãra kꞌachia iru pꞌanapachida ãchi jua ekꞌari. Maapai parã chonaarãpa Tachi Akꞌõremaa chupɨria iidipachida, irua ãchi kꞌaripamerã. Mãpai Tachi Akꞌõrepa Moisés Aarón ome pëiji. Ãrapa parã chonaarã Egipto eujãdeepa uchia atajida mãikꞌaapa aneejida na eujãdee. 9Mamĩda nama pꞌanɨde parã chonaarãpa ichi kꞌinia Akꞌõre Waibɨa kꞌĩra atuajida. Maperã irua ãra baaipiji Jazor pꞌuurudepema soldaorã poro waibɨa Sísara juade, ma awara filisteorã juade mãikꞌaapa Moab eujãdepema rey juade. Mãɨrã jõmaweda parã chonaarã ome chõopachida. 10Mamĩda ma tꞌẽepai parã chonaarãpa kꞌawaajida ãchia ne–inaa kꞌachia oodapꞌedaa Tachi Akꞌõre kꞌĩrapite, ɨtꞌaa tꞌɨ̃ pꞌanadakꞌãri awaraarã akꞌõre waibɨa apata Baal mãikꞌaapa Astarté kꞌĩrapite. Mãpai chupɨria iidijida Tachi Akꞌõrepa ãchi uchiapimerã ãchi kꞌĩra unuamaa iru pꞌanadapꞌedaarã jua ekꞌariipa. Irumaa aupai ɨtꞌaa tꞌɨ̃daitꞌeeda ajida.

11’Maapai Tachi Akꞌõrepa pëiji Yerubaal,+ Barac, Jefté mãikꞌaapa mɨ, Samuel, parã akꞌɨpataadamerã irua parã uchiapiru misa parã kꞌĩra unuamaa iru pꞌanapatapꞌedaarã jua ekꞌariipa, mãgá parã kꞌãiwee pꞌanapataadamerã.

12’Mamĩda parãpa kꞌawaadakꞌãri amonitaarã rey Najapa kꞌĩsia iru bada parã ome chõoitꞌee, mɨmaa iidijida parã rey jua ekꞌari bɨmerã. Mãga iidijida parãpa rey pipɨara iru pꞌanɨ mĩda; mãgɨ́ parã Akꞌõre Waibɨa. 13Nama bɨ rey parãpa jɨrɨtꞌeradapꞌedaa. Tachi Akꞌõrepa parãmaa rey teeji. 14Ɨ̃rá parãpa Tachi Akꞌõre waaweedaipia bɨ, irumaa aupai ɨtꞌaa tꞌɨ̃pataadaipia bɨ mãikꞌaapa irua jara bɨkꞌa oodaipia bɨ. Parãpa, parã reypa paara ichita oodaipia bɨ Tachi Akꞌõrepa kꞌinia bɨkꞌa. Mãga ooruta pɨrã, pia pꞌanapataadaitꞌee. 15Mamĩda iru pedee ũridaamaa pꞌaneeruta pɨrã mãikꞌaapa irua jara bɨkꞌa ooda–e pɨrã, irua parã, parã rey paara miapiitꞌee, parã chonaarã miapidakꞌa.

16’Ãyaa wãnaadapáde aji, unudaitꞌee perã ne–inaa pi–ia Tachi Akꞌõrepa ooitꞌee bɨ parã kꞌĩrapite. 17Naapai trigo ewapata kꞌoi chekꞌaa perã. ¿Wãara–ekꞌã? aji. Mɨa Tachi Akꞌõremaa ɨtꞌaa iidiitꞌee pa jĩwaapimerã mãikꞌaapa kꞌoi chepimerã. Mãgá parãpa kꞌawaadaitꞌee Tachi Akꞌõre kꞌĩrapite ne–inaa kꞌachia oojida, iru awara rey iididakꞌãri.

18Aramãgá Samuelpa Tachi Akꞌõremaa ɨtꞌaa iidiji. Ma ewateweda Tachi Akꞌõrepa pa jĩwaa nɨ̃beepiji mãikꞌaapa kꞌoi chepiji. Mãga unudakꞌãri, israelitaarã jõmaarãpa Tachi Akꞌõre mãikꞌaapa Samuel waawee pꞌaneejida.

19Mapa Samuelmaa mãgajida:

—Tachi Akꞌõre, pɨ Akꞌõre Waibɨamaa chupɨria iidíji, tai, pɨ mimiapataarã pari, irua tai piupinaamerã. Tai–itꞌee rey iididakꞌãri, waapɨara kꞌachia oojidada ajida, naaweda oodapꞌedaa kꞌãyaara.

20Mãpai Samuelpa mãgaji:

—Pꞌeranáatɨ. Wãara, parãpa ne–inaa audú kꞌachia oojida. Mamĩda ichita Tachi Akꞌõrede ijãapatáatɨ mãikꞌaapa tꞌãripa oopatáatɨ irua jara bɨkꞌa. 21Waa jɨrɨnáatɨ awaraa akꞌõre waibɨa apataarãmaa ɨtꞌaa tꞌɨ̃pataadaitꞌee. Mãɨrãpa parã maarepida kꞌaripada–e, servi–e pꞌanadairã. 22Tachi Akꞌõrepa ichita oopari ichia jara bɨkꞌa. Mapa ichi pꞌuuru pidaarã ituaba atabëi–e. Irua kꞌinia bɨ parã ichi pꞌuuru pidaarã padamerã. 23Mɨata ichita ɨtꞌaa iidiitꞌee parã pari, mãgá pꞌanapataadamerã. Mɨa mãga oo–e pɨrã, Tachi Akꞌõre kꞌĩrapite pꞌekꞌau kꞌachia ooitꞌee. Parãmaa jarateeitꞌee iru o piade nipapataadamerã. 24Aba parãpa Tachi Akꞌõre waaweedaipia bɨ mãikꞌaapa tꞌãripa irua jara bɨkꞌa oopataadaipia bɨ. Kꞌirãpadaipia bɨ irua ne–inaa jõmaweda ooda parã kꞌaripaitꞌee. 25Mamĩda atꞌãri ne–inaa kꞌachia oo pꞌaneeruta pɨrã, parã mãikꞌaapa pãchi rey paara jõdaitꞌee.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index