Search form

1 Samuel 14

Jonatanpa filisteorã soldaorã peeda

1Ewari aba Saúl warra Jonatanpa mãgaji ichi escudo anipaparimaa:

—Chepáde aji. To chakꞌe sĩadaitꞌee filisteorã soldaorã pꞌanapata kꞌĩraikꞌa eere bairã.

Mamĩda Jonatanpa chi akꞌõremaa maarepida jara–e paji. 2Mãga nɨde Saúl baji Guibeá pꞌuuru kꞌidaa, nejõ bɨɨrɨ ekꞌari Migronde. Mama baji soldaorã seiscientos ome. 3Ma soldaorã ome pꞌaare Abías baji. Irua efod jɨ̃ nipapachi. Iru Ajitob warra paji. Finés warra Icabod chi chĩapa paji mãikꞌaapa Siló pꞌuurudepema pꞌaare pada Elí chi akꞌõchona paji.

Mama pꞌanadapꞌedaarã apidaapa Jonatán wãda kꞌawada–e pꞌanajida. 4Mãɨmisa iru isapai pana kꞌinia baji filisteorã soldaorã pꞌanadapꞌedaamãi. Mama panaitꞌee wãyaapachida ee kꞌõotꞌari jira bɨ omé esa–aukꞌa. Ma ee kꞌõotꞌari aba tꞌɨ̃jarapachida Bosés, chi apema Sene. 5Aba norte eere baji Micmás pꞌuuru kꞌĩrapite. Chi apema sur eere baji Guibeá pꞌuuru kꞌĩrapite.

6Ma wãrutade Jonatanpa ichi escudo anipaparimaa mãgaji:

—Wãdáma aji, jã Tachi Akꞌõrede ijãadakꞌaa beerã soldaorã pꞌanapatamaa. ¿Tachi Akꞌõrepa tachi kꞌaripai–epaa? Iru–itꞌee ne–inaa chaaree wẽ–e. Mapa tachi kꞌaripaitꞌee, chokꞌara nida pɨjida maa–e pɨrã chokꞌara–e nida pɨjida.

7Mãpai chi escudo anipaparipa mãgaji:

—Oopáde aji, pɨchia kꞌĩsia iru bɨkꞌa. Ne–inaa jõmaade mɨa kꞌaripaitꞌeeda aji.

8Mãpai Jonatanpa mãgaji:

—Sĩadáma aji, ãchi pꞌanɨmaa mãikꞌaapa ãchimaa tachi unupidáma aji. 9Ãrapa jararuta pɨrã ãchi nɨdamerã tachi pꞌanɨmãi, mama tachia nɨdaitꞌee, ãchimaa eede ɨtꞌaa wãdai kꞌãyaara. 10Mamĩda jararuta pɨrã ãchimaa wãdamerã, eede ɨtꞌaa wãdáma aji, ãrapa mãga jaradakꞌãri, jara kꞌinia bairã Tachi Akꞌõrepa ãchi tachimaa pꞌoyaapiitꞌee.

11Mãgá ãra omé eede ɨtꞌaa wãdade unupijida ma filisteorã soldaorã pꞌanapatapꞌedaarãmaa. Mãɨrãpa unu atadakꞌãri, mãgajida:

—¡Akꞌɨ́tɨ! Hebreorã uchia wãrutada ajida, ãchi miru pꞌanadapꞌedaa mãu tedeepa.

12Mãpai madepema soldaorãpa biajida Jonatanmaa mãikꞌaapa chi escudo anipaparimaa:

—Chétɨ taimaa. Parãmaa ne–inaa akꞌɨpidaitꞌeeda ajida.

Mãpai Jonatanpa chi escudo anipaparimaa mãgaji:

—Mɨ tꞌẽe chéji. Tachi Akꞌõrepa ãchi tachi israelitaarã juade baaipiitꞌeeda aji.

13Mãpai Jonatán ma eede ɨtꞌaa juapa jita wãji. Chi escudo anipapari iru tꞌẽe wãji. Mãgá Jonatán ma filisteorã ome unukꞌãri, ichia ãra eujãde baaipipachi. Mãpai chi escudo anipaparipa peetꞌaapachi. 14Ma chõodapꞌedaade Jonatanpa mãikꞌaapa chi escudo anipaparipa veinte filisteorã peekꞌoojida, eujã ma–ãriide.

Israelitaarãpa filisteorã soldaorã jërekꞌoodapꞌedaa

15Mãga unudakꞌãri, filisteorã soldaorã arii pꞌanadapꞌedaarã, ãchi pꞌanapatapꞌedaamãi jɨ̃apataarã mãikꞌaapa chi chĩara netꞌaa jãri nipapatapꞌedaarã paara aukꞌa pꞌerakꞌoodachida. Ma ewate aukꞌa awẽrachai wãyaaji. Mapa audupɨara pꞌerajida.

16Guibeá pꞌuuru kꞌidaa Benjamín ëreerã eujãde Saúl eere pꞌanadapꞌedaa soldaorã jɨ̃apatapꞌedaarãpa unudakꞌãri filisteorã soldaorã pariatua pꞌira erreu wãda, Saulmaa jara pëijida.

17Mãpai Saulpa mãgaji chi soldaorã poro waibɨarã, ichi kꞌõpꞌãya nipadapꞌedaarãmaa:

—Soldaorã juasiadapáde aji, kꞌawaadaitꞌee kꞌaita falta bɨ tachi eere pꞌanɨdepema.

Mãga oodakꞌãri, kꞌawaajida Jonatán mãikꞌaapa ichi escudo anipapari wẽ–e.

18Ma ewate pꞌaare Ahías ãchi ome bada perã, Saulpa irumaa mãgaji:

—Tachi Akꞌõre baaltekꞌa bɨ+ namaa aneepáde aji.

Mãga jaraji ma ewate Tachi Akꞌõre baaltekꞌa bɨ anipadapꞌedaa perã.

19Mamĩda Saúl ma pꞌaare ome pedeemaa bɨde, audupɨara biukꞌa para beeji filisteorã pꞌanadapꞌedaamãi. Mapa Saulpa ma pꞌaaremaa mãgaji:

—Aneenaapáde aji.

20Aramata Saulpa ichi soldaorã chipꞌe atapꞌeda, chõode wãjida. Mamĩda ma filisteorã audú kꞌĩra kꞌawa–e pɨkꞌa kꞌoodaidapꞌedaa perã, ãchi aukꞌaarã peekꞌoo wãpachida. 21Ma awara hebreorã,+ taarãweda filisteorã soldaorã pꞌanapatapꞌedaamãi pꞌanadapꞌedaarãpa mãga unudakꞌãri, wãyaakꞌoodachida israelitaarã, Saúl mãikꞌaapa Jonatán ome pꞌanadapꞌedaarã eere. 22Mãpai ma israelitaarã Efraín ëreerã eujãdepema ee jẽra bɨde mirudaidapꞌedaarãpa kꞌawaa atadakꞌãri ma filisteorã jĩchoo wãda, ichiaba ãra tꞌẽe wãjida chõode. 23Mãgá chõo wãjida Bet Avén waawí parutamaa. Mãgá ma ewate Tachi Akꞌõrepa israelitaarã kꞌaripaji ma filisteorã pꞌoyaadamerã.

Saulpa juraada

24Israelitaarãpa mãgá pꞌoyaajida mĩda, ãchi kꞌapꞌɨa tꞌũmaadachida, nekꞌoda–ee pꞌanadapꞌedaa perã Saulpa juraada kꞌaurepa. Ma ewate tapꞌedaweda soldaorã jõmaarã taide irua nãga juraaji: “Idi mɨ kꞌĩra unuamaa iru pꞌanapataarã pꞌoyaadai naaweda, apida nekꞌoru pɨrã, kꞌachiade baaiitꞌeeda” aji. Maperã apida nekꞌoda–e paji. 25Maapꞌeda ma soldaorã pakꞌuru jẽra bɨde tꞌĩudakꞌãri, eujãde jɨrrɨ miéle unu atajida. 26Jɨrrɨ miéle waibɨa baji mĩda, apidaapa seneda–e paji, waawee pꞌanadapꞌedaa perã Saulpa juraada kꞌaurepa. 27Mamĩda Jonatanpa kꞌawa–e baji chi akꞌõrepa juraada soldaorã taide. Mapa ma pakꞌuru jẽra bɨde wãyaa wãde, ma jɨrrɨ miéle unu atakꞌãri, ichi juade anipada pakꞌuru kꞌɨ̃pa ma jɨrrɨ mielede sutꞌaaji mãikꞌaapa senetꞌaaji. Mãpai aweda juatauradachi.

28Mamĩda mama bada soldaopa mãga unukꞌãri, jaraji:

—Soldaorã taide pɨ akꞌõrepa nãga juraaji: “Idi apida nekꞌoru pɨrã, kꞌachiade baaiitꞌeeda” aji. Maperã na soldaorã audú kꞌapꞌɨa tꞌũmaa pꞌanɨ.

29Mãpai Jonatanpa mãgaji:

—Mɨ akꞌõrepa mãga jarakꞌãri, tachi pꞌuuru pidaarãmaa ne–inaa kꞌachia oojida aji. Pɨchá akꞌɨ́ji. Na jɨrrɨ miéle ma–ãri senepꞌeda, mɨ juataura beeji. 30Jõmaarãpa chikꞌo jãri atadapꞌedaa filisteorã juadeepa kꞌodapꞌedaa paara, ¡ãra jõmaweda pꞌoyaakꞌajidada! aji.

31Ma ewate israelitaarãpa ma filisteorã peekꞌoo wãjida Micmadeepa Ayalón parutamaa. Mamĩda maapꞌeda israelitaarã soldaorã audú kꞌapꞌɨa tꞌũmaa pꞌaneejida. 32Maperã ma filisteorã netꞌaa jãri atadapꞌedaadepema ũkꞌuru ovejaarã, pꞌakꞌaarã mãikꞌaapa pꞌakꞌa chakꞌeerã eujãde peejida ãchia unu atadapꞌedaamãi. Maapꞌeda ma nechiara waasoo õkꞌoo kꞌojida, audú jarrapisia pꞌanadapꞌedaa perã. 33Mãga unudakꞌãri, awaraa soldaorãpa Saulmaa nepɨrɨnajida:

—Tachi Akꞌõre kꞌĩrapite soldaorãpa pꞌekꞌau kꞌachia oomaa pꞌanɨda ajida, nechiara õkꞌoo kꞌomaa pꞌanadairã.

Mãpai Saulpa mãgaji:

—Ne–inaa kꞌachia oomaa pꞌanɨda aji. Isapai namaa mãu choma pɨra anéetɨ. 34Ma awara mãgaji:

—Wã́tɨ eperãarã ome pedeede mãikꞌaapa jarátɨ ãchi pꞌakꞌa wa oveja aneedamerã. Nama otau tꞌɨapꞌedai chi waa uchiamerã mãikꞌaapa chi chiara kꞌodai. Mãgá Tachi Akꞌõre kꞌĩrapite waa pꞌekꞌau kꞌachia ooda–e paitꞌee nechiara waa ome kꞌo pꞌanɨ kꞌaurepa.

Ma pꞌãrikꞌuaweda ma eperã chaachaa ichia pꞌakꞌa iru bada aneejida mãikꞌaapa mama chi otau tꞌɨapꞌejida. 35Mãgá Saulpa Tachi Akꞌõre–itꞌee ma mãudee altar ooji. Ma altar ichia naapɨara ooda paji.

36Ma tꞌẽepai Saulpa ichi soldaorãmaa mãgaji:

—Na pꞌãrikꞌua wãdáma filisteorã jõkꞌoode mãikꞌaapa ãchi ne–inaa jõmaweda jãri ata wãdáma ewarirumaa. Jõmaweda peekꞌoodáma aji.

Ãchia pꞌanaujida:

—Pɨchia oo kꞌinia bɨkꞌa oopáde ajida.

Mamĩda pꞌaarepa mãgaji:

—Naapɨara Tachi Akꞌõremaa ɨtꞌaa iididáma aji.

37Mãpai Saulpa Tachi Akꞌõremaa ɨtꞌaa iidiji:

—¿Filisteorã tꞌẽe wãdaipia bɨkꞌã aji, wa mãga–e? ¿Pɨa tai israelitaarãmaa pꞌoyaapiitꞌeekꞌã? aji.

Mamĩda ma ewate Tachi Akꞌõrepa pꞌanau–e paji. 38Mapa Saulpa mãgaji:

—Soldaorã poro waibɨarã jõmaweda namaa chétɨ. Iidi wãdapáde aji, kꞌawaadaitꞌee idi kꞌãare pꞌekꞌau kꞌachiata oojida. 39¡Tachi Akꞌõre, israelitaarã kꞌaripapari kꞌĩrapite mɨa juraa bɨ, chi ma pꞌekꞌau kꞌachia ooda piuitꞌee, mɨ warra Jonatán pɨjida!

Ma soldaorã poro waibɨarãdepema apidaapa pꞌanauda–e paji. 40Mapa Saulpa mãgaji israelitaarã soldaorã jõmaarãmaa:

—Na eere akꞌɨnɨ̃ pꞌana chedapáde aji, mãikꞌaapa parã kꞌĩrapite mɨ, mɨ warra Jonatán ome akꞌɨnɨ̃ pꞌaneedaitꞌee.

Ma soldaorãpa pꞌanaujida:

—Pɨchia kꞌĩsia bɨkꞌa oopáde ajida.

41Mãpai Saulpa nãga ɨtꞌaa tꞌɨ̃ji:

—Israelitaarã Akꞌõre Waibɨa, ¿sãapꞌeda mɨa ɨtꞌaa iidida pꞌanau–e pajima? Mɨa wa mɨ warra Jonatanpa ne–inaa ooda kꞌaurepa pɨrã, suerte jemenedakꞌãri, Urim uchiapíji. Jõdee israelitaarãpa ne–inaa oodapꞌedaa kꞌaurepa pɨrã, suerte jemenedakꞌãri, Tumim uchiapipáde aji.+

Mãpai suerte jemenedakꞌãri, Jonatán Saúl ome uchiaji. Ma soldaorã kꞌaurepa–e paji.

42Mãpai Saulpa mãgaji:

—Suerte jemenétɨ kꞌawaadaitꞌee mɨ kꞌaurepa wa Jonatán kꞌaurepa.

Mãga oodakꞌãri, Jonatán uchiaji.

43Mãpai Saulpa Jonatanmaa iidiji:

—¿Kꞌãata oojima? aji. Jarapáde aji.

Mãpai Jonatanpa jaraji:

—Wãara mɨa jɨrrɨ miéle ma–ãri seneji mɨa pakꞌuru anipada kꞌɨ̃de. ¿Ma kꞌaurépata mɨ piuipia bɨkꞌã? aji. Mãga pɨrã, mɨ nama bɨda aji, waawee–e bɨ piuitꞌee.

44Mãpai Saulpa mãgaji:

—¡Jonatán, pɨ piu–e pɨrã, Tachi Akꞌõrepa mɨmaa kꞌachia ooipia bɨda aji, mɨ chupɨria kꞌawa–ee!

45Mamĩda israelitaarãpa mãgajida:

—¿Sãga Jonatán piuyama? ajida. ¡Iru kꞌaurepa tachi israelitaarãpa filisteorã pꞌoyaajida! ¡Iru piu–eda! ajida. ¡Tachi Akꞌõre ichita chokꞌai bɨ kꞌĩrapite taipa juraa pꞌanɨ, iru porodeepa puda apida baai–e paitꞌee! Irua ooda idi Tachi Akꞌõre juapa oojida ajida.

Mãga jaradapꞌedaa kꞌaurepa Saulpa Jonatán peepi–e paji. 46Ichiaba maapai Saulpa filisteorã waa jɨrɨ–e paji. Mapa filisteorã ãchi eujãdee erreu wãjida.

Saúl rey bɨde israelitaarã chõodapꞌedaa

47Mãgá Saúl israelitaarã poro waibɨa beeji. Chõopachida ãchi kꞌĩra unuamaa iru pꞌanadapꞌedaarã; moabitaarã ome, amonitaarã ome, edomitaarã ome, Sobá pꞌuurudepema reyrã ome mãikꞌaapa filisteorã ome. Ma chõode wãdapꞌedaa chaa pꞌoyaapachida. 48Ichiaba Saulpa ichi soldaorã ome chipꞌedaipꞌeda, amalecitaarã pꞌoyaajida. Mãgá ma nechɨayaa beerã israelitaarã eujãdeepa jërekꞌoojida.

Sauldeerã

49Saúl warrarã tꞌɨ̃jarapachida Jonatán, Isví+ mãikꞌaapa Malquisúa. Chi naapema kꞌau tꞌɨ̃jarapachida Merab; chi tꞌẽepema Mical. 50Saúl wẽra tꞌɨ̃jarapachida Ajinoán. Mãgɨ́ Ajimaz kꞌau paji. Saúl soldaorã poro waibɨa tꞌɨ̃jarapachida Abner. Mãgɨ́ Saúl chĩapa Ner warra paji. 51Saúl akꞌõre Quis mãikꞌaapa chi chĩapa Ner akꞌõre Abiel paji.

52Saúl chokꞌai bakꞌãri, taarã jura chõopachida filisteorã ome. Maperã Saulpa soldaorã juataura, sõcharra beerã ichita jɨrɨpachi ichi ome nipapataadamerã.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index