Search form

1 Samuel 15

Israelitaarã amalecitaarã ome chõodapꞌedaa

1Ewari aba Samuelpa Saulmaa nãga jaraji:

—Tachi Akꞌõrepa mɨ pëiji pɨ rey bɨmerã ichi pꞌuuru pidaarã, israelitaarã tꞌãide. Mapa ũríji Tachi Akꞌõrepa pɨmaa jara kꞌinia bɨ. 2Jõmaarã Akꞌõre Waibɨapa nãga jara bɨ: “Mɨa amalecitaarã kꞌachia ooitꞌeeda a bɨ, ãchia jaradapꞌedaa perã israelitaarã ãchi eujãde wãyaanaadamerã, Egipto eujãdeepa uchiadakꞌãri. 3Maperã wã́ji ãchi ome chõode. Jõmaweda jõtꞌáatɨ, ãchi netꞌaa ome. Chupɨria kꞌawaanáatɨ. Peekꞌóotɨ ɨmɨkꞌĩraarã, wẽraarã, warrarã, ewaa tꞌo beerã paara. Ichiaba ãchi oveja, pꞌakꞌa, camello mãikꞌaapa burro jõmaweda peekꞌoodapáde” aji.

4Mãpai Saulpa Israeldepema chõo kꞌawaa beerã tꞌɨ̃ pëiji. Telayin pꞌuurude chipꞌepipꞌeda, juasiaji. Doscientos mil ɨmɨkꞌĩraarã jĩte wãpataarã paji. Ma awara Judá ëreerã eujãdepema soldaorã diez mil paji. 5Ma soldaorã ome Saúl wãji amalecitaarã pꞌuuru waibɨamaa. Ma pꞌuuru kꞌaitꞌa to chakꞌe badamãi miru pꞌaneejida.

6Mama pꞌanɨde Saulpa nãga jara pëiji quenitaarã, amalecitaarã tꞌãide pꞌanapatapꞌedaarãmaa: “¡Ãyaa wãdapáde aji, amalecitaarã ikꞌaawaapa! Maa–e pɨrã parã aukꞌa ãra ome jõdaitꞌee. Taipa parã chupɨria kꞌawaadaitꞌee, parã aukꞌaarãpa tai chonaarã kꞌaripadapꞌedaa perã Egipto eujãdeepa uchiadakꞌãri.”

Mãga ũridakꞌãri, ma quenitaarã ãyaa wãjida amalecitaarã tꞌãideepa. 7Mãpai Saúl mãikꞌaapa ichi soldaorã amalecitaarã ome chõonajida Javilá eujãdeepa Sur eujã parumaa. Mãgɨ́ Egipto eujã oriente eere bɨ. Saúl eere pꞌanadapꞌedaarãpa mãɨrã pꞌoyaajida. 8Ma amalecitaarã rey Agag jita atajida. Mamĩda awaraa amalecitaarã jõmaweda espadapa peekꞌoojida. 9Agag peeda–e paji. Ma awara ovejaarã piara bee, pꞌakꞌaarã piara bee, oveja chakꞌeerã mãikꞌaapa pꞌakꞌa chakꞌeerã poreera bee peeda–e paji. Ichiaba netꞌaa piara bee jõtꞌaada–e paji. Mamĩda ne–animalaarã mãikꞌaapa netꞌaa servi–ee bee jõtꞌaajida.

Tachi Akꞌõrepa Saúl yiaraa iru bada

10Ma tꞌẽepai Tachi Akꞌõrepa Samuelmaa nãga jaraji:

11—Párita Saúl rey bɨjikꞌate aji, mɨde ijãa amaa beeda perã mãikꞌaapa mɨa jaradakꞌa ooamaa beeda perã.

Samuelpa mãga ũrikꞌãri, tꞌãri ãriidachi mãikꞌaapa kꞌãi–ee ewariji ɨtꞌaa iidimaa. 12Tapꞌedaweda Samuel Saulmaa wãitꞌee paji. Mamĩda wãi naaweda, irumaa nãga nepɨrɨ chejida: “Saúl wãji Carmel pꞌuurudee mãu choma bɨde, ichia chõo pꞌoyaada kꞌirãpadamerã. Mamãikꞌaapa iru wãjida ajida, Guilgaldee.”

13Mapa Samuel Saúl badamaa wãji. Saulpa iru unukꞌãri, mãgaji:

—Mɨa kꞌinia bɨ Tachi Akꞌõrepa pɨ bendiciamerã. Irua jaradakꞌa mɨa oojida aji.

14Samuelpa pꞌanauji:

—Mãgara ¿kꞌãata jara kꞌinia bɨma aji, ovejaarã mãikꞌaapa pꞌakꞌaarã biapi mɨa ũri bɨ?

15Saulpa pꞌanauji:

—Soldaorãpa amalecitaarã eujãdeepa aneejida. Ovejaarã mãikꞌaapa pꞌakꞌaarã pipɨara bee chokꞌai ata bɨjida, Tachi Akꞌõre, pɨ Akꞌõre Waibɨa–itꞌee paapidaitꞌee. Mamĩda apemaarã peekꞌoojidada aji.

16Mãpai Samuelpa mãgaji:

—¡Kꞌĩupꞌee béeji! Mɨa nepɨrɨitꞌeeda aji, Tachi Akꞌõrepa mɨmaa kꞌawapida pꞌãrikꞌua.

Saulpa mãgaji:

—Jarapáde aji.

17Mãpai Samuelpa mãgaji:

—¿Wãara–ekꞌã, aji, pɨ–itꞌee pɨ awaraarã kꞌãyaara ekꞌariara baji mĩda, Tachi Akꞌõrepa israelitaarã ëreerã chaa pɨ jua ekꞌari bɨji mãikꞌaapa pɨ awara bɨji ãchi rey pamerã? 18Irua jaraji jã amalecitaarã pꞌekꞌau kꞌachia ooyaa beerã jõtꞌaadamerã. 19¿Sãapꞌeda irua jaradakꞌa oo–e pajima? Ma kꞌãyaara ãchi ne–animalaarã, netꞌaa paara pꞌe wãjida. Mãga oodakꞌãri, Tachi Akꞌõre kꞌĩrapite ne–inaa kꞌachia oojidada aji.

20Mãpai Saulpa pꞌanauji:

—Mɨa oojida aji, Tachi Akꞌõrepa jaradakꞌa. Amalecitaarã peekꞌooji. Jĩpꞌa ãchi rey Agag chokꞌai bëiji. 21Jõdee mɨ soldaorãpa jã ovejaarã, pꞌakꞌaarã mãikꞌaapa netꞌaa pipɨara bee atajidada aji, Guilgalde panadakꞌãri, Tachi Akꞌõre, pɨ Akꞌõre Waibɨa–itꞌee paapidaitꞌee.

22Mãpai Samuelpa mãgaji:

—Tachi Akꞌõrepa audupɨara kꞌinia bapari eperãarãpa oodamerã ichia jara bɨkꞌa, ichi–itꞌee ne–animalaarã paa jõpidai kꞌãyaara. Piara bɨ oodaitꞌee irua jara bɨkꞌa ovejaarã traa paadai kꞌãyaara. 23Chi oo–e bɨpa irua jara bɨkꞌa pꞌekꞌau kꞌachia oomaa bɨ. Nãgee pꞌekꞌau oopataarã́kꞌata bɨ: ne–inaa oopataarã kꞌawaadaitꞌee ne–inaa pꞌasaitꞌee bɨ; ichi kꞌinia ne–inaa kꞌachia oopataarã mãikꞌaapa ne–inaa juapa ooda kꞌĩrapite ɨtꞌaa tꞌɨ̃pataarã. Irua jara bɨkꞌa pɨa oo–e bairã, irua waa kꞌinia–e bɨ pɨ rey bamerã.

24Mãpai Saulpa mãgaji:

—Wãara, mɨa pꞌekꞌau kꞌachia oojida aji. Tachi Akꞌõrepa jaradakꞌa mãikꞌaapa pɨa jaradakꞌa oo–e paji, mɨa soldaorã waawee bada perã. 25Ɨ̃rá mɨa chupɨria iidi bɨ pɨa perdonaamerã mɨa pꞌekꞌau kꞌachia ooda. Mɨ ome chepáde aji, Tachi Akꞌõremaa ɨtꞌaa tꞌɨ̃de.

26Mãpai Samuelpa mãgaji:

—Mɨ pɨ ome wã–eda aji. Pɨa Tachi Akꞌõrepa jaradakꞌa oo–e pada perã, irua pɨ waa kꞌinia–e bɨ israelitaarã rey bamerã.

27Samuel pꞌɨrrabaikꞌãri wãitꞌee, Saulpa iru ɨ̃rɨpema pꞌaru i jita ataji. Mãgá jitarude iru pꞌaru i jẽdachi.

28Mãpai Samuelpa Saulmaa mãgaji:

—Nãga pɨkꞌa idiweda Tachi Akꞌõrepa pɨ rey mimia jãri atajida aji, teeitꞌee awaraa israelita, pɨ kꞌãyaara pipɨara bɨmaa. 29Tachi Akꞌõre, israelitaarã Akꞌõre Waibɨa ichita baparipa seewa jarakꞌaa mãikꞌaapa ne–inaa ooitꞌeeda akꞌãri, mãga oopari. Iru eperãkꞌa bɨ–epɨ ne–inaa ooitꞌeeda apꞌeda, oo–e paitꞌee.

30Mãpai Saulpa waya mãgaji:

—Wãara mɨa pꞌekꞌau kꞌachia oojida aji. Mamĩda mɨa pɨmaa chupɨria enenee nɨ̃bɨ israelitaarã poro waibɨarã kꞌĩrapite mɨ kꞌĩra nejasiapinaamerã. Mɨ ome chepáde aji, israelitaarã kꞌĩrapite Tachi Akꞌõremaa ɨtꞌaa tꞌɨ̃de.

31Mãgá Samuel Saúl ome ãpɨtee cheji. Mãpai Saúl Tachi Akꞌõremaa ɨtꞌaa tꞌɨ̃ji.

32Maapꞌeda Samuelpa mãgaji:

—Amalecitaarã rey Agag aneedapáde aji.

Agag kꞌãiwee cheji Samuel kꞌĩrapite, kꞌĩsia bada perã ichi piu kꞌachia piu–e paitꞌee.

33Mamĩda Samuelpa Agagmaa nãga jaraji:

—Pɨa wẽraarã chokꞌara warra wẽe pꞌanapiji, pɨ espadapa ãra warrarã peekꞌãri. Ɨ̃rá aukꞌa pɨ nawe warra wẽe beeitꞌeeda aji.

Mãpai Samuelpa peetꞌaaji mãikꞌaapa chi kꞌapꞌɨa tꞌɨapꞌekꞌooji. Mãga ooji Guilgalde Tachi Akꞌõre kꞌĩrapite.

34Maapꞌeda Samuel Ramadee wãji. Jõdee Saúl wãji ichi temaa Guibeade. 35Waa kꞌĩra unuda–e paji. Samuel kꞌĩra pia–ee bapachi, Saulpa oo–e pada perã Tachi Akꞌõrepa jaradakꞌa mãikꞌaapa Tachi Akꞌõrepa waa kꞌinia–e pada perã Saúl rey bamerã.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index