Search form

1 Samuel 16

Tachi Akꞌõrepa David israelitaarã rey bɨda

1Tꞌẽepai Tachi Akꞌõrepa Samuelmaa nãga jaraji:

—¿Sãapai pɨ waa jẽe–e paitꞌeema aji, Saúl pari? Mɨa iru yiaraa iru bɨ, waa kꞌinia–e bairã iru rey bamerã. Ne–animal cachode aceite tꞌɨ bɨpꞌeda, wã́ji Belén pꞌuurudepema Isaí+ temaa. Mɨa ichi warra aba jɨrɨtꞌerajida aji, israelitaarã rey pamerã.

2Samuelpa pꞌanauji:

—Mɨ, ¿sãga wãyama? aji. ¡Saulpa kꞌawaa ataru pɨrã, mɨ peetꞌaayada! aji.

Mãpai Tachi Akꞌõrepa pꞌanauji:

—Pꞌakꞌa chakꞌe atéeji, mãikꞌaapa nãga jaráji: “Tachi Akꞌõre–itꞌee paade cheji.” 3Ma awara jara pë́iji Isaí chemerã ma pꞌakꞌa chakꞌe paakꞌãri. Iru chekꞌãri, mɨa jaraitꞌee pɨa kꞌãata ooipia bɨ. Aceite weeipia bɨ eperã mɨa akꞌɨpiru ɨ̃rɨ. Mãgá iru awara bɨpáde aji.

4Samuelpa ooji Tachi Akꞌõrepa jaradakꞌa. Belén pꞌuurude panakꞌãri, pꞌuuru pidaarã poro waibɨarã waaweede irumaa chejida mãikꞌaapa nãga iidijida:

—¿Nepɨra wẽe cherukꞌã? ajida.

5Samuelpa pꞌanauji:

—Nepɨra wẽe cheruda aji. Tachi Akꞌõre–itꞌee ne–animal paade cheruda aji. Óotɨ Tachi Akꞌõre kꞌaitꞌa wãdaitꞌee pakꞌãri oopatakꞌa mãikꞌaapa mɨ ome chétɨ na pꞌakꞌa chakꞌe paade.

Samuelpa Isaí chi warrarã ome ununakꞌãri, ooji Tachi Akꞌõrepa oopiparikꞌa ichi kꞌaitꞌa wãdamerã mãikꞌaapa jaraji wãdamerã ma pꞌakꞌa chakꞌe paaruta akꞌɨde. 6Ãchi pachedakꞌãri mãikꞌaapa Samuelpa Isaí warra naapema tꞌɨ̃jarapata Eliab unukꞌãri, kꞌĩsiaji: “¿Nãgɨ–ekꞌã aji, Tachi Akꞌõrepa jɨrɨtꞌerada rey pamerã?”

7Mamĩda Tachi Akꞌõrepa Samuelmaa mãgaji:

—Jã iru–e. Akꞌɨnáaji chi kꞌĩra wa chi ɨtꞌɨa. Eperãarãpa eperã kꞌapꞌɨa akꞌɨpata kꞌawadaitꞌee pia wa kꞌachia. Mamĩda mɨa eperã tꞌãrita akꞌɨparida aji.

8Mãpai Isaipa chi warra Abinadab tꞌɨ̃ ataji mãikꞌaapa Samuelmaa akꞌɨpiji.

Mamĩda Samuelpa mãgaji:

—Nãgɨ́ ichiaba Tachi Akꞌõrepa jɨrɨtꞌera–e pajida aji.

9Maapꞌeda Isaipa chi warra Sama akꞌɨpiji.

Mamĩda Samuelpa mãgaji:

—Nãgɨ́ ichiaba Tachi Akꞌõrepa jɨrɨtꞌera–e pajida aji.

10Mãgá Isaipa chi warrarã siete Samuelmaa akꞌɨpiji.

Mamĩda Samuelpa irumaa mãgaji:

—Madepema apida Tachi Akꞌõrepa jɨrɨtꞌera–e pajida aji.

11Mãpai Samuelpa Isaimaa iidiji:

—¿Pɨa warra waa wẽe bɨkꞌã? aji.

Isaipa pꞌanauji:

—Chi kꞌũtrãara bɨ wẽ–eda aji. Irua ovejaarã akꞌɨmaa bɨda aji.

Samuelpa mãgaji:

—Tꞌɨ̃ pëipáde aji. Iru che–emaa na pꞌakꞌa chakꞌe peedapꞌeda, paada–e mãikꞌaapa su–akꞌɨ pꞌaneeda–eda aji, madepema nechiara jedekꞌodaitꞌee.

12Mãpai Isaipa tꞌɨ̃ pëiji. Mãgá ma kꞌũtrãa cheji. Iru kꞌĩra wãree baji; chi tau pi–ia baji mãikꞌaapa kꞌapꞌɨa pia baji.

Mãpai Tachi Akꞌõrepa Samuelmaa mãgaji:

—Nãgɨda aji. Iru awara bɨpáde aji, israelitaarã rey pamerã.

13Aramãgá Samuelpa ne–animal cachode aceite iru bada ataji mãikꞌaapa weetꞌaaji ma kꞌũtrãa poro ɨ̃rɨ chi ɨ̃pemaarã taide. Ma kꞌũtrãa tꞌɨ̃jarapachida David. Mãgaweda Tachi Akꞌõre Jaure David ome ba cheji. Ma tꞌẽepai Samuel ãpɨtee wãji Ramadee.

David Saúl jua ekꞌari mimiapariida

14Maapai Tachi Akꞌõre Jaure Saúl ikꞌaawaapa uchiaji. Ma pari Tachi Akꞌõrepa jaure kꞌachia pëiji. Ma jaure kꞌachiapa Saúl kꞌãiwee bapikꞌaa paji. 15Mapa Saúl mimiapataarãpa mãgajida:

—Tachi Poro Waibɨa, jaure kꞌachia Tachi Akꞌõrepa pëida pɨ kꞌãiwee bapikꞌaada ajida. 16Pɨ nãgá chupɨria bairã, tai pë́iji arpa chaa kꞌawaa bɨ jɨrɨde. Ma jaure kꞌachiapa pɨ joree chekꞌãri, irua arpa chaai. Mãga chaakꞌãri, pɨ kꞌãiwee beeyada ajida.

17Saulpa pꞌanauji:

—Mãgara jɨrɨnátɨ eperã arpa pia chaa kꞌawaa bɨ mãikꞌaapa aneedapáde aji.

18Mãpai mimiapari abaapa mãgaji:

—Mɨa unudooda aji, Belendepema Isaí warrapa arpa pia chaapari. Mãgɨ́ kꞌũtrãa sõcharra mãikꞌaapa chõo kꞌawaa bapari. Kꞌĩsia kꞌawaa pedeepari, kꞌĩra wãree bapari mãikꞌaapa Tachi Akꞌõre iru ome bapari.

19Mãpai Saulpa Isaimaa nãga jara pëiji: “Mɨmaa pë́iji pɨ warra David, chi ovejaarã akꞌɨpari.” 20Mãpai Isaipa chi warra David Saulmaa pëiji. Iru ome Saul–itꞌee tee pëiji pan bulto burro ɨ̃rɨ, chivo chakꞌe mãikꞌaapa vino ne–ede tꞌɨda. 21David panakꞌãri, Saúl jua ekꞌari mimiamaa beeji. Saulpa iru kꞌinia iru bapachi. Mapa iru bɨji ichi arma anipapariimerã. 22Ma tꞌẽepai Saulpa Isaimaa nãga jara pëiji: “Mɨa kꞌinia bɨ pɨ warra David mɨ jua ekꞌari mimia beemerã, mɨa iru pia akꞌɨ bairã.” 23Mãgá David beeji. Ma jaure kꞌachia Tachi Akꞌõrepa pëidapa Saúl joree chekꞌãri, Davidpa ichi arpa chaapachi. Mãga ookꞌãri, Saúl tꞌãri o–ĩ–ĩa mãikꞌaapa kꞌãiwee beepachi. Ma awara ma jaure kꞌachia iru ikꞌaawaapa ãyaa wãpachi.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index