Search form

1 Samuel 18

Jonatán David ome kꞌõpꞌãyo meraada

1David Saúl ome pedeeda tꞌẽepai, Saúl warra Jonatán David ome kꞌõpꞌãyo meraaji. Kꞌinia iru bapachi ichi kꞌapꞌɨa kꞌinia iru bapariidakꞌa. 2Ma ewateweda Saulpa Davidmaa jaraji ichi palaciode ichi–itꞌee mimia beemerã. Chi akꞌõre temaa pëi–e paji. 3Jonatanpa David mãgá audú kꞌinia iru bada perã, iru ome pacto ooji ichita kꞌõpꞌãyo pia pꞌanadaitꞌee. 4Mãga nɨde Jonatanpa Davidmaa teeji ichi ɨ̃rɨpema pꞌaru jɨ̃ bada, ichi espada, ematrɨma mãikꞌaapa kꞌɨrrɨde jɨ̃pari.

5Maapai Saulpa iru chõode pëikꞌãri, Davidpa oopachi irua jaradakꞌa. Maperã Saulpa David soldaorã poro waibɨa papiji. Mãga ookꞌãri, soldaorã o–ĩa pꞌaneejida, ãchi poro waibɨarã paara.

Saulpa David kꞌĩra unuamaa iru beeda

6Davidpa filisteo peeda tꞌẽepai, israelitaarã soldaorã pachedakꞌãri, Israeldepema pꞌuuru chaa wẽraarã uchiajida Saúl kꞌĩrachuude. Tꞌãri o–ĩa kꞌarijida mãikꞌaapa pëirajida lira, pandereta chaa pꞌanɨde. 7Mãgá kꞌari pꞌanadakꞌãri mãikꞌaapa pëira pꞌanadakꞌãri, nãga jarapachida: “Saulpa ɨmɨkꞌĩraarã mil peeji; jõdee Davidpa diez mil peeji.”

8Saulpa mãga ũrikꞌãri, tꞌãri ãrii bapꞌeda, kꞌĩraudachi mãikꞌaapa mãgaji:

—Davidpa ɨmɨkꞌĩraarã diez mil peejida a pꞌanɨ. Mamĩda mɨa milpai peejida a pꞌanɨ. ¿Iru reyta papi kꞌinia pꞌanɨ–ekꞌã? aji.

9Maadakꞌãriipa Saúl ichi tꞌãridepai David ome kꞌĩrau beeji, ichi kꞌãyaara waibɨara pai jĩakꞌaapa.

10Aɨ norema Tachi Akꞌõrepa Saulmaa jaure kꞌachia pëiji. Mãgá Saúl kꞌĩra kꞌawa–ee pɨkꞌadachi ichi palaciode mãikꞌaapa ichi juade miasu anipaji. Mãɨmisa Davidpa ichi arpa chaamaa baji ichia oopariidakꞌa. 11Mamĩda mãgá chaamaa bɨde Saulpa Davidmaa ichi miasu batꞌaji, paredmaa iru su atai jĩakꞌaapa. Davidmaa batꞌada omé batꞌaji mĩda, oopi–e paji.

12Saulpa kꞌawaji Tachi Akꞌõrepa David kꞌaripa baji; jõdee ichi waa kꞌaripa–e bɨ. Maperã ichia David waawee baji. 13Mapa ichi palaciodeepa David ãyaa pëiji mãikꞌaapa iru bɨji soldaorã mil poro waibɨa pamerã, mãgá ãra nokꞌoore chõode uchiamerã. 14Maapai Davidpa ne–inaa oopariida jõmaweda pia uchiapachi, Tachi Akꞌõrepa iru kꞌaripa bada perã. 15Mapa Saulpa iru audupɨara waawee bapachi. 16Mamĩda Israeldepema soldaorãpa mãikꞌaapa Judadepema soldaorãpa David kꞌinia iru pꞌanapachida, chõode wãdakꞌãri, iruta ãchi naa wãpachi perã.

David Saúl kꞌau ome miakꞌãida

17Ewari aba Saulpa Davidmaa mãgaji:

—Mɨ kꞌau naapema Merab teeitꞌeeda aji, pɨ iru ome miakꞌãimerã, mɨ jua ekꞌari bɨde pɨ Tachi Akꞌõre–itꞌee sõcharra chõoru pɨrã.

Saulpa mãga jarakꞌãri, ichi tꞌãridepai kꞌĩsia baji: “Piara bɨ filisteorãpa David peetꞌaadamerã, mɨchi juapa peetꞌaai kꞌãyaara.”

18Mamĩda Davidpa pꞌanauji:

—Mɨ pɨ kꞌau ome miakꞌãiikꞌaraa bɨda aji, mɨ mãikꞌaapa mɨchideerã ekꞌariara pꞌanadairã awaraa israelitaarã kꞌãyaara. Mãga bɨta, ¿sãgá mɨ rey wiu payama? aji.

19Tꞌẽepai Saulpa chi kꞌau Merab Davidmaa teeitꞌee pada ewate pakꞌãri, irumaa teei kꞌãyaara, Mejolá pꞌuurudepema tꞌɨ̃jarapatapꞌedaa Adrielmaa teeji.

20Mamĩda Merab tꞌẽepema Micalpa David kꞌinia baji. Saulmaa mãga nepɨrɨnadakꞌãri, iru o–ĩa beeji, 21kꞌĩsia bada perã: “Mɨ kꞌau teeitꞌeeda aitꞌee. Mamĩda iru kꞌapꞌɨa David filisteorã juade baaipiitꞌee.”

Maperã Davidmaa nãga jaraji:

—Ɨ̃rá wãara pɨ mɨ wiu paitꞌeeda aji.

22Ma tꞌẽepai Saulpa nãga jaraji chi mimiapataarãmaa:

—Parã David ome pedéetɨ eperãarã wẽ–emãi. Jaradapáde aji, mɨa iru audú kꞌinia iru bairã mãikꞌaapa mɨ mimiapataarãpa iru aukꞌa kꞌinia iru pꞌanadairã, kꞌinia pꞌanɨ iru mɨ wiu pamerã.

23Mãpai Davidmaa mãga jarajida.

Mamĩda Davidpa pꞌanauji:

—¿Parãpa kꞌĩsia pꞌanɨkꞌã mãga pꞌasai? ¿Sãgá rey kꞌau ome mɨ miakꞌãiyama aji, mɨ nãgá chupɨria, pꞌaratꞌa wẽe bɨta?

24Ma mimiapataarãpa Saulmaa mãga jaranajida.

25Mãpai Saulpa kꞌĩsia kꞌachia iru bada perã David filisteorã juade baaipiitꞌee, ma mimiapataarãmaa nãga jaraji:

—Davidmaa nãga jaranadapáde aji: “Pꞌaratꞌa teei kꞌãyaara pɨchi wẽra pari, reypa kꞌinia bɨ pɨa Filisteadepema ɨmɨkꞌĩraarã cien peepꞌeda, ãchi me e irumaa tee chemerã. Mãgá irua filisteorãmaa kꞌachia ooyada aji, ãchia tachimaa kꞌachia oopata pari.”

26Davidmaa mãga jaranadakꞌãri, iru mãgá rey wiu padai kꞌinia baji mãikꞌaapa kꞌĩsia beeji sãga ooitꞌee Saulpa jaradakꞌa, chi fecha jarada pai naaweda. 27Mãpai David uchiaji ichi soldaorã ome. Peenajida Filisteadepema ɨmɨkꞌĩraarã doscientos. Maapꞌeda Davidpa ãchi me e reymaa ateeji, ma pari chi kꞌau teemerã. Mãga ooda perã, Saulpa chi kꞌau Mical Davidmaa teeji.

28Saulpa kꞌawaji Tachi Akꞌõrepa David kꞌaripa bada mãikꞌaapa chi kꞌau Micalpa David kꞌinia bada. 29Mapa irua David audupɨara waawee beeji mãikꞌaapa ichita kꞌĩra unuamaa iru bapachi.

30Maapai filisteorã poro waibɨarã chõode wãdakꞌãri, Davidpa chõo chokꞌaraara pꞌoyaapachi awaraa Saúl soldaorã poro waibɨarã kꞌãyaara. Maperã jõmaarãpa David tꞌo pꞌanapachida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index