Search form

1 Samuel 19

Saulpa jɨrɨpariida David peetꞌaaitꞌee

1Ma tꞌẽepai Saulpa jaraji chi warra Jonatanmaa mãikꞌaapa ichi akꞌɨpataarãmaa David peetꞌaadamerã. Mamĩda Jonatanpa David audú kꞌinia iru bada perã, irumaa jarakꞌoonaji. 2Mãgaji:

—Mɨ akꞌõre, Saulpa pɨ peetꞌaa kꞌinia bɨda aji. Mapa nu tapꞌedaweda taukꞌa nipáji mãikꞌaapa mirudaríiji eperãarã pꞌanadakꞌaamãi. 3Mɨ wãitꞌee mɨ akꞌõre ome pɨ miru bɨ kꞌaitꞌa. Mɨa iidiitꞌee pɨ pari mãikꞌaapa kꞌawaakꞌãri irua kꞌĩsia iru bɨ, pɨmaa jaranaitꞌeeda aji.

4Aɨ norema Jonatán chi akꞌõre Saúl ome pedeeji David kꞌaripaitꞌee. Mãgaji:

—Mɨchi Rey Waibɨa, pɨ mimiapari Davidmaa ne–inaa kꞌachia oonáaji. Irua maarepida pɨmaa ne–inaa kꞌachia oo–e bɨ. Ma kꞌãyaara pɨ–itꞌee ne–inaa piata oopari. 5Iru piukꞌaji ma filisteo chõo kꞌawa bɨ ome chõonakꞌãri. Mamĩda irua pꞌoyaaji. Mãgá Tachi Akꞌõrepa israelitaarãmaa ãra pꞌoyaapiji. Pɨa mãga unuji mãikꞌaapa irua ooda kꞌaurepa pɨ o–ĩa beeji. ¿Sãapꞌeda pɨa iru pee kꞌinia bɨma, irua ne–inaa kꞌachia oo–e bɨta? Pɨa mãga ooru pɨrã, pꞌekꞌau kꞌachia ooitꞌeeda aji.

6Saulpa Jonatán pedee ũripꞌeda, ijãaji mãikꞌaapa mãgaji:

—Tachi Akꞌõre ichita chokꞌai bɨ kꞌĩrapite mɨa juraa bɨda aji, David peepi–e paitꞌee.

7Mãpai Jonatanpa David tꞌɨ̃ atapꞌeda, nepɨrɨji ãchi pedeedapꞌedaa. Maapꞌeda Saúl kꞌĩrapite ateeji. Mãgá David Saúl ome waya mimia beeji.

8Ma tꞌẽepai israelitaarã waya jura chõonajida filisteorã ome. Made David uchiaji ichi soldaorã ome mãikꞌaapa filisteorã pꞌoyaajida. Mapa ãchi naa mãɨrã jĩchoojida.

9Mamĩda Tachi Akꞌõrepa jaure kꞌachia pëidapa waya Saulmaa joree cheji. Iru ichi palaciode su–akꞌɨ baji miasu ome juade. Davidpa arpa chaamaa bɨ misa, 10Saulpa David paredmaa su ataitꞌee paji ma miasupa. Mamĩda Davidpa ichimaa oopi–e paji. Mapa ma miasu paredmaata su awa nɨ̃beeji. Mãpai ma ewate pꞌãrikꞌua David mirudachi.

11Aramata Saulpa chi soldaorãmaa jaraji David temaa wãdamerã iru jɨ̃ade mãikꞌaapa aɨ norema tapꞌedaweda peetꞌaadamerã.

Mamĩda ãra panadai naaweda, David wẽra Micalpa irumaa nãga jaraji:

—Pɨ na pꞌãrikꞌua wã–e pɨrã, nu pɨ piuitꞌeeda aji.

12Aramata Micalpa David ɨrabaitꞌaaji ventanadeepa. Mãgá David mirudachi. 13Ma tꞌẽepai Micalpa eperãkꞌa bɨ pakꞌurudee ooda aɨ kꞌĩrapite ɨtꞌaa tꞌɨ̃pata atapꞌeda, pꞌarude bɨji. Chi pudakꞌarakꞌa beemerã, chivo kꞌaradee kꞌada bɨji mãikꞌaapa ma jõma porobapa tꞌapꞌa bɨji.

14Saulpa ichi soldaorã pëikꞌãri David jita atade, Micalpa jaraji:

—David kꞌayaa bɨda aji.

15Mãpai Saulmaa mãga jaranajida.

Mamĩda irua ichi soldaorã waya pëiji nãga jarapꞌeda:

—¡Iru ichi camade kꞌayaa bɨ pɨjida, aneedapáde! aji. ¡Mɨa iru peetꞌaaitꞌee!

16Mãpai ma soldaorã David temaa wãdapꞌeda, chi cama badamãi tꞌĩujida. Mamĩda jita atadaitꞌee pakꞌãri, unujida ma muñecakꞌa bɨ ma chivo kꞌara kꞌada ome.

17Maapꞌeda Saulpa chi kꞌaumaa ijɨ̃atɨ iidiji:

—¿Sãapꞌeda mɨ kꞌũrajima? aji. ¿Mɨ kꞌĩra unuamaa iru bapari pëitꞌaaji–ekꞌã? aji.

Mãpai Micalpa pꞌanauji:

—Mɨmaa jarajida aji, mɨ peetꞌaaitꞌee, ichi pëi–e pɨrã.

18Mãgá David mirudaida perã, Saúl juadeepa uchiaji. Mãpai David Ramadee wãji mãikꞌaapa Samuelmaa ma jõma nepɨrɨji. Ma tꞌẽepai David Samuel ome pꞌananajida Nayotde, Ramá pꞌuuru kꞌaitꞌa. 19Saulpa kꞌawaa atakꞌãri David Nayotde bɨ, 20ichi jua ekꞌari pꞌanadapꞌedaa soldaorã pëiji David jita atanadamerã. Mama panadakꞌãri, ma soldaorãpa unujida Tachi Akꞌõre pedee jarapataarã pedeemaa pꞌanɨ Tachi Akꞌõrepa pedeepidakꞌa. Ãra Samuel jua ekꞌari pꞌanajida. Mãga nɨde Tachi Akꞌõre Jaure cheji ma soldaorãmaa mãikꞌaapa aukꞌa pedeemaa pꞌaneejida Tachi Akꞌõrepa jarapidakꞌa. 21Saulpa mãga kꞌawaa atakꞌãri, awaraa soldaorã pëiji. Mamĩda ãra aukꞌa Tachi Akꞌõre pedee pedeemaa pꞌaneejida. Maperã Saulpa waya awaraarã pëiji. Mamĩda ãra ome aukꞌa mãga pꞌasaji. 22Mapa ichi kꞌapꞌɨakꞌɨ Ramadee wãji.

Panakꞌãri pozo waibɨa badamãi Secude, arii pꞌanadapꞌedaarãmaa iidiji:

—¿Sãma pꞌanɨma aji, Samuel mãikꞌaapa David?

Pꞌanaujida:

—Nayotde pꞌanɨda ajida, Ramá kꞌaitꞌa.

23Mãpai Saúl mamaa wãji. Mamĩda Tachi Akꞌõre Jaure ichiaba irumaa cheji. Mapa Tachi Akꞌõrepa jarapidakꞌa pedee wãji Nayotde panarumaa Ramá kꞌaitꞌa. 24Ma awara ichi pꞌaru ẽratꞌaapꞌeda, Samuel kꞌĩrapite eujãde ãkꞌadaa beeji pedeemaa Tachi Akꞌõrepa pedeepidakꞌa. Mãga beeji kꞌãima aba; ãstaawa, pꞌãrikꞌua pida. Saulpa mãga ooda perã, eperãarãpa nãga jarapachida: “¿Saúl jida Tachi Akꞌõre pedee jaraparikꞌã?” apachida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index