Search form

1 Samuel 2

Anapa ɨtꞌaa tꞌɨ̃da gracias jaraitꞌee

1Mãpai Anapa nãga ɨtꞌaa tꞌɨ̃ji:

“Tachi Akꞌõre, mɨ tꞌãri o–ĩa bapari, pɨa mɨ tꞌãri o–ĩapida perã. Pɨa mɨ kꞌaripada perã, mɨ kꞌĩra unuamaa iru pꞌanapataarãpa mɨ waa tꞌãri pꞌuapida–e. ¡Maperã mɨ wãara o–ĩa bɨ! 2Tachi Akꞌõre, awaraa pɨkꞌa wẽ–e, pɨ kꞌachia wẽe bapari perã. Mãu choma bɨpa tachi jɨ̃aparikꞌa, mãga pɨkꞌa pɨa tai jɨ̃apari. Tachi Akꞌõre, awaraa pɨkꞌa wẽ–e. 3Waa audua pedee jaranáatɨ Tachi Akꞌõrepa ne–inaa jõma kꞌawapari perã. Iruata eperãarãpa oopata akꞌɨpari jaraitꞌee pia wa kꞌachia. 4Irua chi juataura pꞌanɨɨrã ematrɨma jõpipari.+ Jõdee chi juatau wẽe pꞌanɨɨrã juataura beepipari. 5Chi naaweda chikꞌo waibɨa iru bada ɨ̃rá mimiapari pan pite aba ataitꞌee. Jõdee chi audú jarra oo bada waa mãgá ba–e. Wẽra warra tꞌokꞌaa padapa warra siete tꞌoji. Mamĩda chi warra chokꞌara tꞌopariida ɨ̃rá tꞌãri pꞌua nɨ̃bɨ, warra wẽe beeda perã. 6Tachi Akꞌõrepa eperãarã chokꞌaipipari mãikꞌaapa piupipari. Piudaarãmaa pëipari mãikꞌaapa piudaarãmãiipa uchiapipari. 7Tachi Akꞌõrépata eperãarã chupɨria papipari maa–e pɨrã pꞌaratꞌara papipari; ekꞌariara papipari maa–e pɨrã waibɨara papipari. 8Tachi Akꞌõrepa chupɨria chedeerã, chi netꞌaa wẽe beerã kꞌaripapari, ãra chupɨria chitoonɨ mĩda, eperã waibɨarã ome su–akꞌɨ pꞌaneedamerã mãikꞌaapa awaraarãpa ãchi tꞌo pꞌanadamerã. Mãga ooi irua na pꞌekꞌau eujã ooda perã mãikꞌaapa chi bɨdamãi bɨda perã ãyaa wãnaamerã. 9Irua ichide ijãapataarã jɨ̃apari. Mamĩda chi ijãadakꞌaa beerã pꞌãriude piupata. Ãchi kꞌĩradoopa ichita pꞌoyaa pꞌanapataada–e. 10Tachi Akꞌõrepa ichi kꞌĩra unuamaa iru pꞌanapataarã jõpiitꞌee. Ãchi ɨ̃rɨ pa baaipiitꞌee. Tachi Akꞌõrepa na eujãdepemaarãpa ne–inaa oopata akꞌɨitꞌee jaraitꞌee pia wa kꞌachia. Irua jɨrɨtꞌerada rey jõmaarã kꞌãyaara waibɨara papiitꞌee.”

11Ma tꞌẽepai Elcaná Ana ome wãjida ãchi temaa Ramade. Mamĩda ãchi warra, Samuel, Tachi Akꞌõre–itꞌee mimiamaa beeji pꞌaare Elí jua ekꞌari.

Elí warrarã ne–inaa kꞌachia ooyaa pꞌanapatapꞌedaa

12Elí warrarã Ofni, Finés ome ne–inaa kꞌachia ooyaa pꞌanapachida. Pꞌaareerã paji mĩda, Tachi Akꞌõre waaweedakꞌaa paji. 13Mapa eperã chekꞌãri, ne–animal peepꞌeda Tachi Akꞌõre–itꞌee paapide, ma pꞌaareerãpa oodakꞌaa paji Tachi Akꞌõrepa jaradakꞌa pꞌaareerãpa oodamerã. Ma kꞌãyaara ãchi mimiapari pëipachida tenedor choma kꞌida õpee bɨpa nechiara ũkꞌuru ãchi–itꞌee su atamerã. Chi ne–animal aneedapa ma nechiara paamaa bɨde wa chuumaa bɨde Tachi Akꞌõre–itꞌee teeitꞌee, 14ãchi mimiaparipa ma tenedorpa nechiara kꞌuurude wa pailade su ata wãpachi ãchi–itꞌee. Mãga oojida jõmaweda israelitaarã ome, Tachi Akꞌõre–itꞌee ne–animalaarã paapi chedakꞌãri Siló pꞌuurude. 15Ma awara chi aneedapa ma ne–animal traa Tachi Akꞌõre–itꞌee paapiitꞌee pakꞌãri, aɨ naaweda ãchi mimiapari chepachi nechiara ũkꞌuru iidide. “Mɨ–itꞌee nechiara teepáde apachi, paaitꞌee pꞌaareerã–itꞌee. Ãrapa nechiara chuuda kꞌiniada–e. Õkꞌoota kꞌinia pꞌanɨda” apachi. 16Ma ne–animal aneedapa jarapachi: ‘‘Ichiakꞌau bɨ́ji netraa paapirumaa Tachi Akꞌõre leyde jara bɨkꞌa. Mãpai pɨa ateei pɨchia kꞌinia bɨta.’’

Mamĩda ma mimiaparipa mãgapachi: “¡Ɨ̃raweda kꞌinia bɨda! apachi. Tee–e pɨrã, mɨchi juadoopa jãri atayada” apachi. 17Mãgá ma kꞌũtrãarãpa Tachi Akꞌõre kꞌĩrapite pꞌekꞌau kꞌachia oo wãpachida, israelitaarãpa ne–inaa Tachi Akꞌõre–itꞌee aneedapꞌedaa ãchi–itꞌee jãri ata wãdapꞌedaa perã.

Samuel Tachi Akꞌõre tede bapariida

18Samuel efod apatapꞌedaa linodee ooda+ jɨ̃pachi mãikꞌaapa Tachi Akꞌõre–itꞌee chokꞌekꞌee mimiapachi. 19Año chaa chi nawepa ɨ̃rɨpema pꞌaru chiwidi oopachi chi warrapa jɨ̃merã. Ma pꞌaru ateepachi chi ɨmɨkꞌĩra ome wãkꞌãri Tachi Akꞌõre–itꞌee ne–animal paapide. 20Elipa Elcaná chi wẽra Ana ome unukꞌãri, na pedee pia jarapachi Elcanamaa: “Mɨa kꞌinia bɨda apachi, Tachi Akꞌõrepa na wẽramaa awaraa warrarã tꞌopimerã, na warra iru–itꞌee awara bɨda pari.” Maapꞌeda Elcaná Ana ome waya wãpachida ãchi temaa.

21Ma tꞌẽepai Tachi Akꞌõrepa Ana pia akꞌɨpachi. Ana waya biakꞌoo beeji. Mamãikꞌaapa Anapa ɨmɨkꞌĩra warrarã õpee, wẽra kꞌaurã omé tꞌoji. Mãɨmisa Samuel wari wãji mama Tachi Akꞌõre kꞌĩrapite iru tede.

Elí chi warrarã ome

22Maapai Elí chonaa baji. Mamĩda kꞌawaa baji chi warrarãpa ne–inaa kꞌachia oopatapꞌedaa israelitaarã ome. Ãchia wẽraarã Tachi Akꞌõre te tꞌĩupatade mimiapataarã ome paara kꞌãipachida.

23Maperã Elipa nãga jaraji:

—Jõmaarãpa jara chepatada aji, parãpa ne–inaa kꞌachia oopata. ¿Sãapꞌeda parãpa mãga ooi awaa pꞌanɨma? aji. 24Mɨ warrarã, mãga pꞌanadaikꞌaraa bɨda aji. Ma kꞌaurepa israelitaarãpa parã ãpɨte pedee kꞌachia jara pꞌanɨ. 25Eperãpa ne–inaa kꞌachia ookꞌãri awaraa eperãmaa, Tachi Akꞌõrepa ma eperã chupɨria kꞌawaai mãikꞌaapa ma nepɨradeepa kꞌaripai. Mamĩda parãpa Tachi Akꞌõremaa ne–inaa kꞌachia oodakꞌãri, ¿kꞌáipata parã chupɨria kꞌawaaima? aji.

Elipa mãga jaraji mĩda, chi warrarãpa ũri kꞌiniada–e paji, Tachi Akꞌõrepa kꞌĩsia iru bada perã ãchi peekꞌooitꞌee.

26Ãchi mãgá pꞌanɨde Samuel wari wãji. Tachi Akꞌõrepa iru pia akꞌɨpachi; eperãarãpa paara.

Tachi Akꞌõrepa jarapida Elí ëreerãdé

27Maapai Tachi Akꞌõrepa iru pedee jarapari Elimaa pëiji.

Mãgɨpa mãgaji:

—Tachi Akꞌõrepa nãga jara pëiruda aji, pɨmaa: “Pɨ chonaarã Egipto eujãde pꞌanadakꞌãri Faraón+ jua ekꞌari, ãramaa mɨ unupiji. 28Awaraa ëreerã kꞌãyaara mɨa parã+ jɨrɨtꞌeraji awaraa israelitaarã pari pꞌaareerã mimia oopataadamerã. Parãta jɨrɨtꞌeraji mɨ altar kꞌaitꞌa wãdamerã mãikꞌaapa ne–animalaarã peedapꞌeda, mɨ–itꞌee paa jõdamerã. Kꞌinia baji parã́pata mɨ kꞌĩrapite ne–inaa tꞌũa bapari paapataadamerã mãikꞌaapa mɨ–itꞌee mimiadakꞌãri, efod jɨ̃pataadamerã. Ma awara mɨa jaraji israelitaarãpa ma ne–animalaarã mɨ–itꞌee paapidapꞌedaa chiara ũkꞌuru parã ëreerã–itꞌee awara bɨdamerã. 29¿Sãapꞌeda parãpa ma ne–animalaarã mãikꞌaapa netꞌaa mɨ–itꞌee tee chepata ne–inaa kꞌachiakꞌa unupatama? ¿Sãapꞌeda pɨa mɨchi pꞌuuru pidaarãpa ne–inaa aneepatadepema nechiara pipɨara bɨ pɨ warrarãmaa teepiparima aji, mãgɨpa audupɨara poreedaidamerã? ¿Ãra mɨ kꞌãyaara pipɨara akꞌɨpari–ekꞌã?

30”Mɨ, israelitaarã Akꞌõre Waibɨapa jaraji pɨ, pɨchideerã ome mɨ–itꞌee mimiapataadamerã. Mamĩda ɨ̃rá mɨa nãga jara bɨ. ¡Mɨa parãmaa waa pꞌaareerã mimia oopi–e paitꞌee! Mɨa pia akꞌɨpari chi mɨ waawee pꞌanapataarã. Mamĩda mɨ waaweeda–ee pꞌanɨɨrã pia–ee akꞌɨpari. 31Taarã–ee mɨa pɨchideerã mãikꞌaapa pɨ akꞌõredeepa uchiadapꞌedaarã jõpiitꞌee. Ãradepema apida chonaa pa–e paitꞌee. 32Pɨa akꞌɨkꞌãri mɨa ne–inaa pia oo bɨ israelitaarã tꞌãide, pɨ kꞌĩsia nɨ̃beeitꞌee, pɨa ma mimia waa oo–e paitꞌee perã mãikꞌaapa pɨchideerã apida chonaa pa–e paitꞌee perã. 33Pɨdeepa uchiaitꞌee bɨ abapai mɨ altar kꞌaitꞌa wãpariitꞌee. Mamĩda iru tau soo baitꞌee jẽe nɨ̃bɨpa mãikꞌaapa audú tꞌãri pꞌua bapariitꞌee, apemaarã pɨdeepa uchiadaitꞌeerã jõmaweda eperãarã juapa piudaitꞌee perã. 34Pɨchi warrarã Ofni Finés ome ewari abaade piudaitꞌee. Ma ewate pɨa kꞌawaitꞌee wãara mɨa jaradakꞌa pꞌasaji. 35Ma tꞌẽepai mɨa pꞌaare pia bɨitꞌee mɨ–itꞌee mimiapariimerã. Mãgɨpa oopariitꞌee mɨa oopi bɨkꞌa, mɨ ome tꞌãri aukꞌa bapariitꞌee perã. Irudeepa uchiadaitꞌeerã mɨa pia akꞌɨpariitꞌee perã, ãra ichita mimiadaitꞌee mɨa jɨrɨtꞌerada rey jua ekꞌari. 36Maapai pɨdeepa uchiadaitꞌeerã, chi atꞌãri chokꞌai pꞌaneerutaarã ma pꞌaaremaa chedaitꞌee mãikꞌaapa iru kꞌĩrapite bedabaidapꞌeda, chupɨria iididaitꞌee irua ãramaa teemerã pꞌaratꞌa tau wa pan pite chakꞌe. Irumaa enenee chedaitꞌeeda aji, irua mimia teemerã, mãgá chikꞌo kꞌodaitꞌee iru pꞌanadamerã.”

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index