Search form

1 Samuel 20

Jonatanpa David kꞌaripada

1Ma tꞌẽepai David Nayotdeepa uchiaji mãikꞌaapa Jonatán badamaa wãpꞌeda, iidiji:

—¿Mɨa kꞌãata oojima? aji. ¿Kꞌãare ne–inaa kꞌachiata pɨ akꞌõremaa oojima? ¿Sãapꞌeda irua mɨ peeitꞌee jɨrɨmaa bɨma? aji.

2Jonatanpa pꞌanauji:

—¡Pɨ piu–epɨ! Mɨ akꞌõrepa ne–inaa ookꞌaada aji, mɨmaa jara–ee. Mãga ooitꞌee kꞌĩsia iru bɨ pɨrã, ¿sãapꞌeda mɨmaa maarepida jara–e pajima? ¡Ma wãara–eda! aji.

3Mamĩda Davidpa mãgaji:

—Pɨ akꞌõrepa kꞌawa bɨda aji, pɨa mɨ kꞌinia iru bapari. Maperã irua nãga kꞌĩsia bɨ–ekꞌã: “Jonatanpa kꞌawaaikꞌaraa bɨ, iru tꞌãri pꞌuanaamerã.” Tachi Akꞌõre ichita chokꞌai bɨ kꞌĩrapite mɨa juraa bɨ wãara pɨ akꞌõrepa mɨ jɨrɨmaa bɨ peeitꞌee.

4Mãpai Jonatanpa Davidmaa iidiji:

—¿Kꞌãata kꞌinia bɨma aji, mɨa oomerã pɨ kꞌaripaitꞌee? Pɨa jara bɨkꞌa ooitꞌeeda aji.

5Davidpa pꞌanauji:

—Nu ai ewarikꞌãri fiesta oopata oodaitꞌeeda aji. Mɨ wãipia bɨ rey ome nekꞌode. Mamĩda ma kꞌãyaara mɨ mirupíji mẽe, nunorema kꞌewaraa paru misa. 6Mãga nɨde pɨ akꞌõrepa mɨ pari iidiru pɨrã, jarapáde aji, mɨa chupɨria iidi nɨ̃baji mɨchi pꞌuuru Belendee wãpimerã, mama año chaa mɨ ëreerãpa ne–animal Tachi Akꞌõre–itꞌee paapata perã na fiesta oodaitꞌee. 7Irua “pia bɨda” aru pɨrã, jara kꞌinia bɨ iru nepɨra wẽe bɨ mɨ ome. Mamĩda kꞌĩraudaru pɨrã, pɨa kꞌawaai wãara irua mɨ peetꞌaa kꞌinia bɨ. 8Mɨ, pɨ mimiapari, chupɨria kꞌawáaji, Tachi Akꞌõre kꞌĩrapite pɨa mɨ ome pacto ooda perã ichita kꞌõpꞌãyo pia pꞌanadaitꞌee. Mamĩda mɨa ne–inaa kꞌachia ooji pɨrã, pɨchi juadoopa mɨ peetꞌáaji. ¿Kꞌãare–itꞌee mɨ pɨ akꞌõre kꞌĩrapite ateeyama? aji.

9Jonatanpa pꞌanauji:

—¡Mãga jaranaapáde! aji. Mɨa kꞌawa ataru pɨrã mɨ akꞌõrepa pɨmaa kꞌachia ooitꞌee kꞌĩsia bɨ, pɨmaa jaraitꞌeeda aji.

10Mãpai Davidpa iidiji:

—Pɨ akꞌõrepa kꞌĩrau pꞌanauru pɨrã, ¿kꞌaipa mɨmaa jara cheitꞌeema? aji.

11Jonatanpa pꞌanauji:

—Mẽe wãdáma. Mama mɨa jaraitꞌeeda aji.

Mãpai ãchi omeeweda mẽe wãjida. Mama panadakꞌãri, 12Jonatanpa mãgaji:

—Tachi israelitaarã Akꞌõre Waibɨa kꞌĩrapite mɨa pɨmaa nãga juraa bɨ. Nunorema parumaa na horade mɨa iidiitꞌee kꞌãata mɨ akꞌõrepa kꞌĩsia iru bɨ. Pia kꞌĩsia bɨ pɨrã, pɨmaa jara pëiitꞌee. 13Mamĩda irua pɨmaa kꞌachia ooitꞌee kꞌĩsia bɨ pɨrã, mɨa pɨmaa jaraitꞌee mãikꞌaapa mɨa pɨ kꞌaripaitꞌee, kꞌãiwee wãmerã. Mãga oo–e pɨrã, Tachi Akꞌõrepa mɨmaa kꞌachia ooipia bɨ, chupɨria kꞌawa–ee. Iruata pɨ kꞌaripaitꞌee, mɨ akꞌõre kꞌaripapariidakꞌa. 14Mɨ nãgɨdeepa chokꞌai uchiaru pɨrã, Tachi Akꞌõrepa pɨ chupɨria kꞌawaa bɨkꞌa mɨ chupɨria kꞌawáaji mɨ peenaadamerã. 15Jõdee mɨ piuru pɨrã, mɨ warrarãmaa aukꞌa chupɨria kꞌawáaji, Tachi Akꞌõrepa pɨ kꞌĩra unuamaa iru pꞌanapataarã jõmaweda jõpiru pɨjida. 16Pɨa mãga oo–e pɨrã, Tachi Akꞌõrepa pɨ warrarã pia akꞌɨ–e paitꞌeeda aji.

Davidpa pꞌanauji:

—Pɨa jarada pia bɨda aji.

17Jonatanpa David audú kꞌinia iru bada perã ichi kꞌapꞌɨakꞌa, jaraji Davidpa juraamerã ichia jaradakꞌa ooitꞌee. 18Mãpai Jonatanpa mãgaji:

—Nu ai ewarikꞌãri fiesta oopata oodaitꞌee. Pɨ su–akꞌɨ beeparimãi akꞌɨdakꞌãri, kꞌawaadaitꞌee pɨ wẽ–e. 19Mamĩda nunorema pida pɨ wã–e pakꞌãri, audupɨara kꞌawaadaitꞌee pɨ wẽ–e. Maperã wã́ji pɨ naaweda miru badamaa mãikꞌaapa mama mãu choma Ézel bɨmãi miru beepáde aji. 20Mɨa sia õpee trɨitꞌee ma mãu choma bɨ eere, mɨchi kꞌinia trɨitꞌee bɨkꞌa. 21Mãpai mɨa jaraitꞌee mɨ mimiaparimaa jɨrɨnamerã. Mɨa jararu pɨrã: “Chi sia pɨ bɨmãiipa namapai bɨ; atanáji”, mãgara pɨ kꞌãiwee uchiaipia bɨ, maarepida pɨmaa ne–inaa kꞌachia ooda–e paitꞌee perã. Tachi Akꞌõre kꞌĩrapite mɨa mãga juraa bɨ. 22Mamĩda mɨa jararu pɨrã: “Chi sia pɨ bɨmãiipa achuwaapapai bɨ”, mãgara pɨ ãyaa wãipia bɨ, Tachi Akꞌõrepa mãga kꞌinia bairã. 23Kꞌĩra atuanaapáde aji, uchiamerã tachia juraadapꞌedaa Tachi Akꞌõre kꞌĩrapite.

24Mãpai David miru beeji Jonatanpa jaradakꞌa. Ai ewarikꞌãri fiesta oopata pakꞌãri, rey Saúl mesade su–akꞌɨ beeji nekꞌoitꞌee. 25Pared ikꞌaawa ichi su–akꞌɨ beeparimãi su–akꞌɨ beeji. Jõdee Jonatán iru kꞌĩrapite su–akꞌɨ beeji. Soldaorã poro waibɨa Abner Saúl ikꞌaawa su–akꞌɨ beeji. Mamĩda David su–akꞌɨ beeparimãi arajãgaa beeji. 26Ma ewate Saulpa maarepida iidi–e paji David pari, nãga kꞌĩsiada perã: “Irua oo–e paji Tachi Akꞌõrepa oopiparikꞌa ichi kꞌĩrapite tꞌĩuipia beemerã. ¿Maperã che–e paji–ekꞌã?” aji. 27Mamĩda aɨ norema ma atanede ewari omeede David su–akꞌɨ beeparimãi atꞌãri arajãgaa baji. Mapa Saulpa chi warra Jonatanmaa nãga iidiji:

—¿Sãapꞌeda Isaí warra nuweda mãikꞌaapa idi pida nekꞌode che–e pajima? aji.

28Jonatanpa pꞌanauji:

—Davidpa mɨmaa chupɨria iidi nɨ̃bajida aji, Belendee wãpimerã. 29Mɨmaa nãga jaraji: “Mɨchi pꞌuurudee wãpipáde aji, mɨchi pꞌuurudepemaarãpa na fiestade ne–animal Tachi Akꞌõre–itꞌee paapata perã. Mɨ ɨ̃pemapa jara pëijida aji, mɨ wãmerã. Pɨa mɨ pia akꞌɨru pɨrã, mɨ wãpipáde aji, mɨchi ɨ̃pemaarã akꞌɨde.” Mɨchi Rey Waibɨa, maperã iru pɨ ome nekꞌode che–e pajida aji.

30Mãga ũrikꞌãri, Saúl kꞌĩraudachi Jonatán ome mãikꞌaapa mãgaji:

—¡Pɨ kꞌɨɨrɨ kꞌisua kꞌachia–idaa baparida aji, ne–animalkꞌa! ¿Kꞌĩsia bɨkꞌã aji, mɨa kꞌawa–e bɨ pɨ kꞌõpꞌãyo pia Isaí warra ome? Mãga oo bɨ kꞌaurepa pɨchi nawe kꞌĩra nejasiapimaa bɨda aji. 31¡Isaí warra chokꞌai bɨ misa, pɨ rey pa–e paitꞌee! ¡Mapa iru jɨrɨde pë́iji, mãikꞌaapa namaa aneepáde aji, iru peetꞌaaitꞌee perã!

32Mãpai Jonatanpa pꞌanauji:

—¿Sãapꞌeda iru pee kꞌinia bɨma? aji. ¿Irua kꞌãare ne–inaa kꞌachiata oojima? aji.

33Mãpai Saulpa ichi miasu atapꞌeda, Jonatán suitꞌee paji. Mãgá Jonatanpa kꞌawaaji wãara chi akꞌõrepa David peetꞌaa kꞌinia bɨ. 34Mapa Jonatán kꞌĩraudaipꞌeda, rey mesadeepa uchiaji. Ma ewate, ma fiesta ewari omeedepema chikꞌo kꞌo–e paji, iru audú tꞌãri pꞌua nɨ̃bada perã chi akꞌõrepa David ãpɨte pedee kꞌachia jarada kꞌaurepa.

35Aɨ norema tapꞌedaweda Davidmaa jarada horade Jonatán mẽe wãji kꞌũtrãa ichi jua ekꞌari mimiapari ome. 36Chi mimiaparimaa mãgaji:

—Pꞌirapáde aji, mɨa sia trɨitꞌee bɨ atade.

Chi mimiapari pꞌirakꞌãri, Jonatanpa sia trɨji. Mãgɨ́ sia waawí baainaji. 37Chi mimiapari ma sia baaida kꞌaitꞌa panakꞌãri, Jonatanpa nãga golpe biaji:

—¿Achuwaapai bɨ–ekꞌã? aji.

38Mãpai chi mimiaparimaa waya biaji:

—Isapai pꞌiráji. Akꞌɨnɨ̃ beenaapáde aji.

Mãgá chi mimiaparipa ma sia pꞌe atapꞌeda, chiparimaa aneeji. 39Mamĩda chi mimiaparipa maarepida kꞌawa–e paji. Jonatanpa mãikꞌaapa Davidpapai kꞌawa pꞌanajida kꞌãata jara kꞌinia bɨ.

40Maapꞌeda Jonatanpa ichi ematrɨma chi mimiaparimaa teeji mãikꞌaapa irumaa mãgaji:

—Ãpɨtee pꞌuurudee wãpáde aji.

41Ma kꞌũtrãa wãda tꞌẽepai, David uchiaji ichi miru badamãiipa. Mãpai Jonatán kꞌĩrapite bedabaida õpee bedabaidachi, tau bɨɨrɨ eujãde tꞌõbairumaa. Mãpai kꞌĩra tarrade ɨ̃dapꞌeda, ãchi omeeweda jẽedachida. Mamĩda David audupɨara jẽeji.

42Mãpai Jonatanpa mãgaji:

—Kꞌãiwee wãpáde aji, Tachi Akꞌõre kꞌĩrapite tachia juraadapꞌedaa perã tachideerã chaa ichita pia akꞌɨ pꞌanadaitꞌee. Tachi Akꞌõre tachi ome baparipɨ mãikꞌaapa iruata tachi kꞌaripaitꞌee mãga oodamerã.

Maapꞌeda David ichi ode wãji. Jõdee Jonatán ãpɨtee pꞌuurudee wãji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index