Search form

1 Samuel 21

David miruda Saúl waaweepa

1David Nob pꞌuurudee wãji. Mama panakꞌãri, pꞌaare Ajimélec akꞌɨde wãji. Ajimelecpa David unukꞌãri, pꞌeradachi mãikꞌaapa waaweepa irumaa iidiji:

—¿Sãapꞌeda pɨ ituaba cheruma aji, apidaapa pɨ kꞌõpꞌãyaada–ee?

2Davidpa pꞌanauji:

—Reypa jaradata oo nida aji. Mamĩda irua jaraji apidaamaa jaranaamerã kꞌãare–itꞌeeta mɨ pëiji mãikꞌaapa kꞌãare ne–inaata oo ni. Soldaorã mɨ ome nipapataarã awara ãi mɨ ome unudaitꞌeeda aji. 3¿Pɨa pan wẽe bɨkꞌã aji, mɨmaa teemerã? Pan paraa pɨrã, joisomaa kꞌinia bɨ. Maa–e pɨrã, pɨa iru bɨta mɨa jitayada aji.

4Pꞌaarepa pꞌanauji:

—Pan jĩpꞌaa wẽe bɨda aji. Jĩpꞌa pan Tachi Akꞌõre–itꞌee awara bɨdata iru bɨda aji. Teeyada aji, pɨchi soldaorã wẽraarã ome kꞌãida–e pꞌanɨ pɨrã.

5Davidpa pꞌanauji:

—Ichita chõode uchiadakꞌãri, wẽraarã ome kꞌãidakꞌaada aji. Uchiadakꞌãri, mɨ soldaorã mãga pꞌanajida. Ɨ̃rá audupɨara mãga pꞌanɨda aji, reypa jaradakꞌa oo pꞌanadairã.

6Mãpai pꞌaarepa teeji ma pan Tachi Akꞌõre–itꞌee awara bɨda. Ma pan Tachi Akꞌõre mesade baji. Mamĩda ma ewate ãyaa ata bɨ baji awaraa pan wãsia bɨitꞌee. Pꞌaareerãpapai mãgee pan kꞌodaipia baji. Mãga baji mĩda, mãgɨ́ pan Davidmaa teeji.

7Ma ewate Saúl ovejaarã akꞌɨpataarã poro waibɨa mama Tachi Akꞌõre tede baji Tachi Akꞌõre–itꞌee ne–inaa oode. Mãgɨ́ Edom eujãdepema paji; tꞌɨ̃jarapachida Doeg. Mãgɨpa Ajimélec David ome pedeemaa pꞌanadapꞌedaa ũrii baji.

8Mãga nɨde Davidpa Ajimelecmaa iidiji:

—¿Pɨa nama miasu wa espada iru bɨkꞌã? aji. Reypa mɨ isapai pëida perã, mɨ espada wa awaraa arma anee–e pajida aji.

9Pꞌaarepa pꞌanauji:

—Iru bɨda aji, Goliat espada; ma filisteo pɨa peeda Elá eujã jewedaade. Jãma efod+ ãpɨteikꞌa eere pꞌarude beda bɨda aji. Kꞌinia bɨ pɨrã, ateepáde aji. Waa arma wẽe bɨda aji.

Davidpa pꞌanauji:

—Mãgara téeji. Mãgɨ́ piara bɨda aji, awaraa espada kꞌãyaara.

10Ma ewate David wãji ichi ode Saúl waaweepa. Panaji filisteorã pꞌuuru Gatde mãikꞌaapa ma pꞌuurudepema rey Aquimaa wãji. 11Iru Aquis kꞌĩrapite panakꞌãri, Aquis akꞌɨpataarãpa mãgajida:

—¿Nãgɨ́ David–ekꞌã ajida, israelitaarã eujãdepema rey? ¿Nãgɨ–itꞌee paji–ekꞌã wẽraarãpa nãga kꞌari pꞌanadapꞌedaa pëira jõnɨde: ‘Saulpa ɨmɨkꞌĩraarã mil peeji; jõdee Davidpa diez mil peeji’?

12Davidpa mãga ũrikꞌãri, kꞌĩsia nɨ̃beeji mãikꞌaapa waawee baji, Gatdepema reypa ichi peepii jĩakꞌaapa. 13Maperã kꞌĩra kꞌawa–ee pɨkꞌadachi. Pariatua puertade pꞌã wãpachi mãikꞌaapa iduba ichi idakꞌarade chawaapiji.

14Aquipa mãga unukꞌãri, chi akꞌɨpataarãmaa mãgaji:

—¿Parãpa unuda–e pꞌanajidakꞌã nãgɨ́ eperã kꞌĩra kꞌawa–ee bɨ? ¿Sãapꞌeda mɨmaa aneejidama? aji. 15¿Nama kꞌĩra kꞌawa–ee beerã wẽ–ekꞌã? ¿Sãapꞌeda nãgɨ́ aneejidama ichia mɨchi tede ne–inaa pariatua oomerã? ¡Namãikꞌaapa ãyaa ateedapáde! aji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index