Search form

1 Samuel 22

David Adulande mãikꞌaapa Mizpade

1David ma Gat pꞌuurudeepa uchiapꞌeda, mirunaji mãu te Adulán apatade. Chi ɨ̃pemaarãpa, chi akꞌõrepa mãikꞌaapa chi akꞌõre tedepemaarãpa kꞌawaa atadakꞌãri iru mama bɨ, irumaa wãjida. 2Ma awara Davidmaa chejida nepɨrade pꞌanadapꞌedaarã, Saulmaa pꞌaratꞌa paraa pꞌanadapꞌedaarã mãikꞌaapa Saúl jua ekꞌari kꞌĩra pia–ee pꞌanadapꞌedaarã. Mãgá David ãchi poro waibɨa beeji. Ma chedapꞌedaarã cuatrocientos ɨmɨkꞌĩraarã paji.

3Mamãikꞌaapa David Mizpa pꞌuurudee wãji. Ma pꞌuuru Moab eujãde baji. Mama panakꞌãri, Moabdepema reymaa nãga jaraji:

—Mɨa pɨmaa chupɨria iidi bɨda aji, mɨ akꞌõreerã nama pꞌanapimerã, mɨa kꞌawaaru misa Tachi Akꞌõrepa mɨ ome kꞌãata ooitꞌee.

4Reypa pꞌanauji:

—Pia bɨda aji.

Mãgá Davidpa chi akꞌõreerã ateeji moabitaarã rey palaciodee. Mama ãra pꞌanapachida, David mẽe miru bɨ misa.

5Maapai Tachi Akꞌõre pedee jarapari Gadpa Davidmaa nãga jaraji:

—Pɨchi miru bɨmãi waa banáaji. Waya Judá eujãdee wãpáde aji.

Mãgá David mamãikꞌaapa wãpꞌeda, banaji Jaret pakꞌuru jẽra bɨmãi. Mãgɨ́ Judá ëreerã eujãde baji.

Saulpa Nobdepema pꞌaareerã peepida

6Mãɨmisa Saúl Guibeá pꞌuurude baji ichi soldaorã poro waibɨarã ome. Eede iru su–akꞌɨ baji tamarisco pakꞌuru ekꞌari. Chi miasu juade iru baji. Saulpa kꞌawa atakꞌãri David ichi eere pꞌanadapꞌedaarã ome unu atadapꞌedaa, 7ichi soldaorã poro waibɨarãmaa mãgaji:

—Ũrítɨ. Parã mɨkꞌa, Benjamín ëreerãdepemaarã. ¿Parãpa kꞌĩsia pꞌanɨkꞌã aji, Judá ëreerãdepema Isaí warra Davidpa parãmaa teeitꞌee eujã mãikꞌaapa uva kꞌãi mɨa oodakꞌa? ¿Kꞌĩsia pꞌanɨkꞌã irua parã jua ekꞌari soldaorã mil wa cien bɨitꞌee, mãɨrã poro waibɨarã padamerã? 8¿Parãpa mɨ ãpɨte pedeetee pꞌanɨ–ekꞌã? aji. Apidaapa jarada–e paji mɨ warrapa pacto ooda Isaí warra ome. ¡Parãdepema apidaapa mɨde kꞌĩsiada–e paji jarada–e pakꞌãri mɨ warrapa mɨ mimiapari kꞌaripamaa bɨ mɨ kꞌĩra unuamaa iru beemerã! Maperã ɨ̃rá mɨ mimiaparipa mɨ nɨmaa bɨ peetꞌaaitꞌee.

9Mãpai Edom eujãdepema Doeg, mama Saúl soldaorã poro waibɨarã ome akꞌɨnɨ̃ badapa, mãgaji:

—Mɨa Isaí warra unuji Nob pꞌuurude. Ajitob warra Ajimélec ome pedee baji. 10Ma awara Ajimelecpa Tachi Akꞌõremaa ɨtꞌaa iidiji David pari mãikꞌaapa irumaa teeji chikꞌo filisteo Goliat espada ome.

11Saulpa mãga ũrikꞌãri, Ajitob warra Ajimélec tꞌɨ̃ pëiji awaraa Nobdepema pꞌaareerã ome. Mãɨrã Ajimélec ëreerã paji. Ãra Saúl kꞌĩrapite pachedakꞌãri, 12ichia Ajimelecmaa mãgaji:

—Ajitob warra, ũríji.

Ajimelecpa pꞌanauji:

—Rey Waibɨa, pɨa jara bɨkꞌa mɨa oo kꞌinia bɨda aji.

13Mãpai Saulpa iidiji:

—¿Sãapꞌeda pɨ Isaí warra ome mɨ ãpɨte ne–inaa kꞌachia oojidama? aji. Pɨa irumaa teeji pan, espada ome. Ma awara iru pari ɨtꞌaa iidiji, irua mɨ kꞌĩra unuamaa iru beemerã mãikꞌaapa mɨ jɨrɨmerã peetꞌaaitꞌee, ɨ̃rá oomaa bɨkꞌa.

14Ajimelecpa pꞌanauji:

—Pɨ mimiapataarã tꞌãide wẽ–eda aji, ne–inaa ichita pia oopataarã Davidkꞌa. Ma awara iru pɨ wiu mãikꞌaapa pɨ soldaorã poro waibɨa. Pɨ palaciodepemaarãpa iru pia akꞌɨpata. 15Iru pari mɨa ichita ɨtꞌaa iidipari. Maperã Mɨchi Rey Waibɨa, pɨa mɨ mãikꞌaapa mɨ ëreerã nepɨrade baaipiikꞌaraa bɨ. Mɨ, pɨ mimiaparipa maarepida kꞌawa–e bɨda aji, pɨa David ome nepɨra iru bɨ.

16Mamĩda rey Saulpa mãgaji:

—¡Ajimélec, pɨ, pɨ akꞌõre ëreerã paara piudaitꞌeeda! aji.

17Mãga jarapꞌeda, ichi jɨ̃apataarãmaa nãga jaraji:

—¡Tachi Akꞌõre pꞌaareerã peekꞌóotɨ, ãra jida David eere pꞌanadairã! Ãrapa kꞌawajida David miru wãda. Mamĩda mɨmaa jarada–e pajida aji.

Mamĩda Saúl jɨ̃apataarãpa Tachi Akꞌõre pꞌaareerã pee kꞌiniada–e paji. 18Maperã reypa Edomdepema Doegmaa mãgaji:

—¡Mãgara, pɨa peekꞌoopáde! aji.

Mãpai Doeg ma pꞌaareerã ɨ̃rɨ wãpꞌeda, peekꞌooji. Ma ewate pꞌaareerã efod linodee kꞌada jɨ̃ pꞌanadapꞌedaarã ochenta y cinco peekꞌooji. 19Tꞌẽepai Saúl wãji Nob pꞌuurudee, pꞌaareerã pꞌanapatapꞌedaa pꞌuurude. Mama espadapa peekꞌoojida ɨmɨkꞌĩraarã, wẽraarã, warrarã, ewaa tꞌo beerã paara, ma awara ãra pꞌakꞌaarã, burroorã mãikꞌaapa ovejaarã.

20Mamĩda mãga oomaa pꞌanɨde Ajimélec warra aba tꞌɨ̃jarapatapꞌedaa Abiatar uchiaji ãra juadeepa mãikꞌaapa Davidmaa wãji. 21Mama panakꞌãri, Davidmaa nepɨrɨji Saulpa Tachi Akꞌõre pꞌaareerã peekꞌoopida.

22Mãpai Davidpa mãgaji:

—Ma ewate Nob pꞌuurude jã edomita Doeg unukꞌãri, mɨa kꞌawaji irua Saulmaa jarakꞌoonaitꞌee mɨ pedee bada Ajimélec ome. Mɨ kꞌaurépata pɨchideerã jõmaweda piujidada aji. 23Mamĩda waaweenáaji. Mɨ ome béeji. Chi pɨ peedaitꞌee jɨrɨmaa pꞌanɨɨrãpa mɨ jida jɨrɨmaa pꞌanɨ. Pɨ mɨ ome beeru pɨrã, mɨa pɨ jɨ̃aitꞌeeda aji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index