Search form

1 Samuel 24

Davidpa Saúl pee–e pada

1Saúl filisteorã ome chõo bapꞌeda, ãpɨtee chekꞌãri, eperãarãpa nepɨrɨjida David miru bɨ eujã pania wẽe bɨ Engadi apatapꞌedaade. 2Mãpai Saulpa Israeldepema soldaorã tres mil jɨrɨtꞌerapꞌeda, ‘mẽepema cabraarã’ apatapꞌedaa ee mãu–idaa jẽra bɨdee wãjida David jɨrɨde.

3Ma wãdade ovejaarã tꞌɨakꞌau paraa bɨmãi panajida. Mama mãu te bada perã, Saúl ãde tꞌĩuji. David ichi soldaorã ome ma mãu te edupɨara miru pꞌanajida. Mamĩda Saúl eere pꞌanadapꞌedaarãpa kꞌawada–e paji.

4Saúl mama bɨde David kꞌõpꞌãyoorãpa Davidmaa nãga jarajida:

—Idi Tachi Akꞌõrepa ooitꞌeeda ajida, ichia pɨmaa nãga jaradakꞌa: “Pɨ kꞌĩra unuamaa iru bapari pɨ juade baaipiitꞌee, pɨa iru ome oomerã pɨchia oo kꞌinia bɨkꞌa.”

Mãpai David juajĩa wãpꞌeda, Saúl ɨ̃rɨpema pꞌaru i tꞌɨɨ ataji. Saulpa kꞌawa–e paji. 5Mamĩda Saúl uchiada tꞌẽepai, David kꞌĩsia pꞌua nɨ̃beeji mãga ooda perã.

6Mapa chi soldaorãmaa mãgaji:

—Taawa Tachi Akꞌõrepa mɨ kꞌaripai mɨchi rey waibɨamaa ne–inaa kꞌachia oonaamerã. ¡Mɨa iru pꞌoyaa pee–e parãpa jaradapꞌedaakꞌa, Tachi Akꞌõrépata iru jɨrɨtꞌerada perã tachi rey pamerã!

7Mãgá Davidpa ichi soldaorãmaa jaraji Saúl peenaadamerã. Saúl mãu tedeepa uchiapꞌeda, ichi ode wãitꞌee paji. 8Mamĩda David iru tꞌẽe isapai uchiapꞌeda, tꞌɨmɨɨpa nãgá tꞌɨ̃maa beeji:

—¡Rey Waibɨa, Rey Waibɨa!

Saulpa ãpɨtee akꞌɨkꞌãri, David bedabaidachi tau bɨɨrɨ eujãde tꞌõbairumaa, akꞌɨpiitꞌee Saúl waawee bɨ.

9Maapꞌeda mãgaji:

—Rey Waibɨa, ¿sãapꞌeda pɨa eperãarã pedee ijãa bɨma aji, jaradakꞌãri mɨa pɨ jɨrɨmaa bɨ pɨmaa ne–inaa kꞌachia ooitꞌee? 10Idi pɨa pɨchi taupa unu bɨ Tachi Akꞌõrepa pɨ mɨ juade baaipiji na mãu tede. Mɨ soldaorãpa mɨ ɨmɨajida pɨ peetꞌaamerã. Mamĩda mɨa pɨmaa maarepida kꞌachia oo kꞌinia–e paji. Mapa mɨa jaraji: “Mɨa rey pꞌoyaa pee–eda aji, Tachi Akꞌõrepa iru jɨrɨtꞌerada perã tachi rey pamerã.”

11’Pɨ mɨ akꞌõrékꞌata bɨ. Akꞌɨ́ji mɨa pɨ ɨ̃rɨpema pꞌaru pite tꞌɨɨ atada mɨ juade iru bɨda aji. Mɨa mãga tꞌɨɨ ataji mĩda, pɨ pee–e paji. Mãgá kꞌawáaji mɨa pɨmaa ne–inaa kꞌachia oo kꞌinia–e bɨ. Mɨa ichita oopari pɨa jara bɨkꞌa. Mãgá mɨa pɨmaa ne–inaa kꞌachia oo–e bɨ mĩda, pɨa mɨ jɨrɨmaa bɨ peeitꞌee. 12Tachi Akꞌõrépata kꞌawa bɨ kꞌaipa ne–inaa kꞌachia oomaa bɨ, pɨa wa mɨa. Iruata pɨ miapiitꞌee pɨa mɨmaa kꞌachia oo bɨ pari. Mamĩda, Rey Waibɨa, mɨa pɨmaa ne–inaa kꞌachia oo–e paitꞌee. 13¿Kꞌĩsia kꞌawaa beerãpa nãga jarapata–ekꞌã? aji. ‘‘Kꞌachia beerãdeepa ne–inaa kꞌachia uchiaparida’’ apata. Maperã mɨa pɨmaa ne–inaa kꞌachia oo–e paitꞌee. 14Pɨ, israelitaarã rey bɨta, ¿kꞌai tꞌẽe nima? ¿Kꞌaita jɨrɨ nima? Pɨ kꞌĩrapite mɨ usa piudákꞌata bɨ maa–e pɨrã pulgákꞌata bɨ. 15Maperã Tachi Akꞌõrepa tachi omeeweda akꞌɨitꞌee mãikꞌaapa jaraitꞌee kꞌaipa ne–inaa kꞌachia oopari. ¡Iruata pɨ juadeepa mɨ kꞌaripaitꞌeeda! aji.

16David pedee aupakꞌãri, Saulpa mãgaji:

—¿Mɨ warra David, pɨ–ekꞌã aji, mɨmaa pedeemaa bɨ?

Mãga jarapꞌeda, jẽedachi.

17Maapꞌeda mãgaji:

—Mɨ kꞌãyaara pɨa ne–inaa pipɨara oopari. Pɨa mɨmaa ne–inaa pia oopari. Jõdee mɨa pɨmaa ne–inaa kꞌachia oopari. 18Idi pɨa mɨmaa kꞌawapiji pɨa mɨmaa ne–inaa piata oopari, Tachi Akꞌõrepa mɨ pɨ juade bɨji mĩda, pɨa mɨ pee–e pada perã. 19¿Kꞌaipa ichi kꞌĩra unuamaa iru bapari unu atakꞌãri, irumaa ne–inaa kꞌachia oo–e payama? Mɨa kꞌinia bɨ Tachi Akꞌõrepa pɨmaa pia oomerã, idi pɨa mɨmaa pia ooda pari. 20Ɨ̃rá mɨa kꞌawa bɨ pɨ wãara rey paitꞌee. Pɨ jua ekꞌari israelitaarã pia pꞌanapataadaitꞌee. 21Mapa ɨ̃rá Tachi Akꞌõre kꞌĩrapite juraapáde aji, pɨ mãgá rey pakꞌãri, mɨchideerã jõpi–e paitꞌee, israelitaarãpa mɨ tꞌɨ̃ mãikꞌaapa ãra tꞌɨ̃ kꞌĩra atuanaadamerã.

22Mãpai Tachi Akꞌõre kꞌĩrapite Davidpa juraaji Sauldeerã jõpi–e paitꞌee. Maapꞌeda Saúl ichi soldaorã ome ichi palaciodee wãjida. Jõdee David ichi soldaorã ome wãjida ãchi miru pꞌanadapꞌedaamaa ee jẽra bɨde.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index