Search form

1 Samuel 25

Samuel jai–idaada

1Maapai Samuel jai–idaaji. Israelitaarãpa mãga ũridakꞌãri, jõmaweda jẽe para beeji. Ramá pꞌuurude ɨajida iru te kꞌaitꞌa. Ma tꞌẽepai David ichi eere pꞌanadapꞌedaarã ome ee jẽra bɨdeepa uchiajida mãikꞌaapa pꞌananajida Maón+ apatapꞌedaa eujã pania wẽe bɨde.

David Abigaíl ome unuda

2Maón pꞌuurude eperã pꞌaratꞌa paraa bɨ bapachi. Mãgɨpa ovejaarã tres mil mãikꞌaapa cabraarã mil iru baji ichi eujãde Carmel pꞌuuru kꞌaitꞌa. Mama chi ovejaarã kꞌara tꞌɨɨpipachi. 3Ma pꞌaratꞌa paraa bɨ tꞌɨ̃jarapachida Nabal. Iru Judá ëreerãdepema Calebdeepa uchiada paji. Nabal tꞌãri kꞌachia–idaa mãikꞌaapa ne–inaa kꞌachia ooyaa baji. Jõdee chi wẽra Abigaíl kꞌĩra wãree, poro wẽsaa baji.

4David ma eujã pania wẽe bɨde bakꞌãri, ichia kꞌawaaji Nabal Carmel pꞌuuru kꞌaitꞌa bada chi ovejaarã kꞌara tꞌɨɨmaa. 5Mapa kꞌũtrãarã ichi jua ekꞌari mimiapatapꞌedaarã diez irumaa pëiji saludaanadamerã ichi pari. 6Ãra ome nãga jara pëiji: “Mɨa kꞌinia bɨ pɨ, pɨchideerã mãikꞌaapa pɨ ëreerã jõmaweda kꞌapꞌɨa pia pꞌanadamerã mãikꞌaapa kꞌãiwee pꞌanadamerã pãchi netꞌaa iru pꞌanɨ ome. 7Mɨa kꞌawaji pɨa ovejaarã kꞌara tꞌɨɨmaa bɨ Carmelde. ¿Pɨa kꞌawa bɨ–ekꞌã pɨ ovejaarã akꞌɨpataarã nama tai pꞌanɨ kꞌaitꞌa pꞌanadapꞌedaa? Nama pꞌanɨde taipa ãra pia akꞌɨ pꞌanajida mãikꞌaapa ãra juadeepa ne–inaa maarepida jãri atada–e paji. 8Mãga ijãa–e pɨrã, pɨ mimiapataarãmaa iidíji. Ãrapa aukꞌa jaradaitꞌeeda aji. Idi fiesta ewate perã, mɨa na kꞌũtrãarã mɨ jua ekꞌari mimiapataarã ome nãga jara pëiji, pɨa jõdee tai chupɨria kꞌawaamerã mãikꞌaapa pɨa iru bɨdepema ne–inaa teemerã na kꞌũtrãarã mɨa pëidaarãmaa, ãchi pɨ mimiapataarãkꞌa pꞌanadairã mãikꞌaapa mɨ pɨ warrakꞌa bairã.”

9Ma kꞌũtrãarã Davidpa pëida pꞌuurude panadakꞌãri, Davidpa jara pëida Nabalmaa jarajida. Maapꞌeda nɨmaa pꞌaneejida irua pꞌanaumerã.

10Mamĩda Nabalpa mãgaji:

—¿Kꞌaima mãgɨ́ David? ¿Kꞌaima ma Isaí warra? ¡Mɨa iru kꞌawa–e bɨ! Ɨ̃rapema ewaride esclavoorã chokꞌara miru uchiapata ãchi chipariirã ikꞌaawaapa. 11¿Mɨa parãmaa teeikꞌã pan, pania mãikꞌaapa nechiara mɨ ovejaarã kꞌara tꞌɨɨpataarã–itꞌee iru bɨdepema? Mɨa kꞌawa–e bɨda aji, parã sãmãikꞌaapa cheruta. ¡Tee–eda! aji.

12Mãpai ma kꞌũtrãarã Davidpa pëidaarã ãpɨtee chejida. Pachedakꞌãri, Nabalpa jarada Davidmaa nepɨrɨjida.

13Mãpai Davidpa chi soldaorãmaa mãgaji:

—¡Pãchi espada atadapáde aji, chõonadaitꞌee perã!

Aramãgá ãchi espada atadapꞌeda, kꞌɨrrɨde jɨ̃jida. Davidpa pida ichi espada atapꞌeda, kꞌɨrrɨde jɨ̃ji. Mãgá iru ome cuatrocientos uchiajida. Jõdee chi apema doscientos soldaorãpa netꞌaa akꞌɨmaa pꞌaneejida.

14Mãga nɨde Nabal mimiapari abaapa Nabal wẽra Abigailmaa nãga jaranaji:

—Eujã pania wẽe bɨdeepa Davidpa ichi mimiapataarã pëiji Nabalmaa saludaade ichi pari. Mamĩda Nabalpa ãramaa pedee kꞌachia jaraji. 15Mãga ooikꞌaraa baji, David eere pꞌanɨɨrã tai ome tꞌãri pia pꞌanapatapꞌedaa perã. Taipa ãchi pꞌanadapꞌedaa kꞌaitꞌa ovejaarã akꞌɨ pꞌanadakꞌãri, ãrapa tai netꞌaa maarepida jãri atada–e paji mãikꞌaapa taimaa maarepida ne–inaa kꞌachia ooda–e paji. 16Ma kꞌãyaara ãstaawa, pꞌãrikꞌua pida tai jɨ̃apachida, ãra kꞌaitꞌa taipa ne–animalaarã akꞌɨmaa pꞌanadakꞌãri. 17Mamĩda pɨ ɨmɨkꞌĩra audú tꞌãri kꞌachia–idaa bairã, apida iru ome pꞌoyaa pedeeda–e. Ɨ̃rá pɨa kꞌĩsiaipia bɨda aji, kꞌãata oodai David kꞌĩrau banaamerã mãikꞌaapa tachi jõma jõtꞌaade chenaamerã.

18Mãpai Abigailpa isapai pꞌe ataji pan doscientos; vino ne–ede tꞌɨda omé; oveja paada joisomaa; treinta y cinco litro+ netꞌa tau paada; ne–inaa cien pꞌepꞌedee bee uva pꞌoodadee ooda mãikꞌaapa ne–inaa doscientos pꞌepꞌedee bee higojõ pꞌoodadee ooda. Ma jõma burroorã ɨ̃rɨ bɨpipꞌeda, 19chi mimiapataarãmaa mãgaji:

—David kꞌĩrachuude wã́tɨ. Mɨ tꞌẽe wãitꞌeeda aji.

Mamĩda Abigailpa chi ɨmɨkꞌĩra Nabalmaa maarepida jara–e paji.

20Abigaíl burrode bataupꞌeda, ee ãpɨte eereepa miru uchiaji. Taarã–e nɨde unuji David cheru ichi soldaorã ome.

21Ma chewãdade Davidpa nãga kꞌĩsia chewãji: “Ichi kꞌinia mɨa Nabal ovejaarã mãikꞌaapa chi akꞌɨpataarã pia akꞌɨ baji, maarepida atuanaadamerã. Mamĩda ma pari ɨ̃rá irua mɨmaa ne–inaa kꞌachia ooji. 22¡Tachi Akꞌõrepa mɨmaa ne–inaa kꞌachia ooipia bɨda aji, tapꞌeda pai naaweda mɨa jõmaweda ɨmɨkꞌĩraarã iru ome pꞌanapataarã jõpi–e pɨrã!”

23Abigailpa David unukꞌãri, ichi burrodeepa isapai ɨrabaipꞌeda, David kꞌĩrapite eujãde bedabaidachi akꞌɨpiitꞌee iru waawee bɨ.

24Maapꞌeda David bɨɨrɨmãi jẽra banapꞌeda, mãgaji:

—Mɨchi Waibɨa, mɨ kꞌaurepa nãga pꞌasa bɨda aji. Mɨmaa aupai ne–inaa kꞌachia baaiipia bɨ. Pedeepíji mɨ, pɨ mimiaparimaa. Mɨa chupɨria iidi bɨ mɨ pedee ũrimerã. 25Nabalpa jaradade kꞌĩsianáaji. Iru tꞌãri kꞌachia–idaa bapari mãikꞌaapa kꞌĩsia kꞌawa–ee bapari. Wãara chi tꞌɨ̃ mãga jara kꞌinia bɨ: ‘kꞌĩsia kꞌawa–ee bɨ’. Mɨ wẽ–e paji pɨa pëidaarã irumaa wãdakꞌãri. 26Tachi Akꞌõre ichita chokꞌai bɨ kꞌĩrapite mãikꞌaapa pɨ, Mɨchi Waibɨa kꞌĩrapite mɨa juraa bɨ Tachi Akꞌõrepa mɨ pëiji pɨchi juapa eperãarã peenaamerã mɨ ɨmɨkꞌĩrapa kꞌachia ooda kꞌaurepa. ¡Mɨa kꞌinia bɨ jõmaweda pɨ kꞌĩra unuamaa iru pꞌanapataarã mãikꞌaapa pɨ jɨrɨpataarã ne–inaa kꞌachia oodaitꞌee kꞌachiade baaidamerã Nabalkꞌa! 27Ɨ̃rá Mɨchi Waibɨa, mɨa chupɨria iidi bɨ pɨa jitamerã mɨ, pɨ mimiaparipa chikꞌo aneeda mãikꞌaapa jedemerã kꞌũtrãarã pɨ jua ekꞌari mimiapataarãmaa. 28Mɨ, pɨ mimiaparipa ooda perdonáji. Tachi Akꞌõrepa pɨ pia akꞌɨ baitꞌee mãikꞌaapa pɨ, pɨdeepa uchiadaitꞌeerã paara ichita rey paitꞌee. Pɨ chõopari perã Tachi Akꞌõre kꞌĩra unuamaa iru pꞌanapataarã ome, ne–inaa jõmaade pia uchiaitꞌee. 29Apidaapa pɨ peeitꞌee jɨrɨ cheru pɨrã, Tachi Akꞌõre, pɨ Akꞌõre Waibɨapa pɨ jɨ̃aitꞌee. Irua pɨ kꞌĩra unuamaa iru pꞌanapataarã ãyaa pëiitꞌee eperãpa mãu hondade bɨpꞌeda, ãyaa batꞌatꞌaaparikꞌa. 30Tachi Akꞌõrepa pɨmaa ne–inaa jarada jõmaweda ookꞌãri, mãikꞌaapa pɨ israelitaarã poro waibɨa papikꞌãri, 31pɨ kꞌĩsia pꞌua nɨ̃ba–e paitꞌee, kꞌĩra jõ–ee pɨchi juapa eperãarã ne–inaa kꞌachia oo–ee beerã peekꞌooda perã. Ma kꞌãyaara pɨa ichiakꞌau bɨji, Tachi Akꞌõrepa ichia kꞌĩsia iru bɨkꞌa oomerã. Irua pɨ mãgá eperã waibɨa papikꞌãri, mɨ, pɨ mimiapari kꞌirãpapáde aji.

32Mãpai Davidpa pꞌanauji:

—Tachi Akꞌõre, israelitaarã Akꞌõre Waibɨa wãara tꞌãri pia bapari, pɨ pëida perã mɨ ome unude. 33Tachi Akꞌõrepa pɨmaa pia ooipia bɨ kꞌĩsia kꞌawaa bairã. Pɨ kꞌaurepa mɨa mɨchi juapa eperãarã pee–e paji kꞌĩra jõ–ee bada perã. 34Tachi Akꞌõre, israelitaarã Akꞌõre Waibɨapa mɨ kꞌaripaji mɨa pɨmaa ne–inaa kꞌachia oonaamerã. Mamĩda Tachi Akꞌõre kꞌĩrapite mɨa nãga juraa bɨ. Pɨ isapai che–e pada paara mɨ ome unude, nu tapꞌedaweda Nabal mãikꞌaapa ɨmɨkꞌĩraarã ichi tede pꞌanapataarã piukꞌajida.

35Mãga jarapꞌeda, Davidpa jitaji Abigailpa aneeda mãikꞌaapa mãgaji:

—Pɨchi temaa kꞌãiwee wã́ji. Pɨa chupɨria iidida mɨa ũrijipɨ. Pɨa jaradakꞌa ooitꞌee.

36Abigaíl temaa panakꞌãri, ununaji Nabalpa fiesta waibɨa oomaa bɨ, reyrãpa oopatakꞌa. Chikꞌo pia kꞌomaa pꞌanajida. Nabal o–ĩa baji mãikꞌaapa vinopa piu baji. Maperã Abigailpa ma ewate maarepida jara–e paji aɨ norema parumaa. 37Aɨ norema Nabal tau pia beekꞌãri, Abigailpa nepɨrɨji ichi pꞌasada David ome. Mãga ũrikꞌãri, Nabal kꞌĩra kꞌĩdachi mãikꞌaapa chiwa beeji. 38Kꞌãima diezmaa Tachi Akꞌõrepa Nabal piupiji.

39Davidpa Nabal piuda kꞌawaakꞌãri, mãgaji:

—¡Tachi Akꞌõrepa ichita ne–inaa pia oopari! ¡Iruata Nabalmaa kꞌachia ooji irua mɨmaa kꞌachia ooda pari! Tachi Akꞌõrepa mɨ kꞌaripaji ne–inaa kꞌachia oonaamerã. Ma kꞌãyaara iru juapa Nabalmaa kꞌachia oojida aji.

Maapꞌeda Davidpa Abigailmaa jara pëiji ichi ome miakꞌãimerã. 40David mimiapataarã Carmel pꞌuurude panadakꞌãri, Abigaíl ome pedeedapꞌeda, mãgajida:

—Davidpa tai pëijida ajida pɨ atade, irua kꞌinia bairã pɨ ichi wẽra pamerã.

41Abigailpa mãga ũrikꞌãri, bedabaidachi tau bɨɨrɨ eujãde tꞌõbairumaa mãikꞌaapa mãgaji:

—Mɨ David mimiapari; iru esclavakꞌa bɨ. Irua jara bɨkꞌa mɨa oopariitꞌee. Irua jararu pɨjida mɨa chi mimiapataarã bɨɨrɨ sɨɨmerã, mɨa sɨɨyada aji.

42Mãga jarapꞌeda, ichi netꞌaa isapai pꞌe ataji mãikꞌaapa ichi burro ɨ̃rɨ bataupꞌeda, Davidpa pëidaarã ome wãji. Ichi mimiapataarã, wẽraarã joisomaa, ichi ome ateeji. Maapꞌeda Abigaíl David ome miakꞌãiji.

43Aɨ naaweda David ichiaba miakꞌãiji Ajinoán ome. Ma wẽra Jezrel pꞌuurudepema paji. Ma omeeweda chi wẽraarã paji. 44Maapai Saulpa ichi kꞌau Mical teeji Galín pꞌuurudepema Lais warra tꞌɨ̃jarapatapꞌedaa Paltimaa, Mical David wẽra paji mĩda.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index