Search form

1 Samuel 26

Davidpa waya Saúl pee–e pada

1Ma tꞌẽepai Zif pꞌuurudepemaarã wãjida Guibeá pꞌuurudee Saúl ome pedeede. Mãgajida:

—David miru bɨda ajida, Jaquilá eede eujã pania wẽe bɨ kꞌĩrapite.

2Saulpa mãga ũrikꞌãri, tres mil Israeldepema soldaorã piara bee jɨrɨ chipꞌe atapꞌeda, Zif apatapꞌedaa eujã pania wẽe bɨmaa wãji David jɨrɨde. 3Jaquilá eede panadakꞌãri, eujã pania wẽe bɨ kꞌĩrapite o bi ikꞌaawa ãchi carpa eebai jira bɨjida. Maapai David ma eujã pania wẽe bɨde baji. Irua kꞌawaakꞌãri Saúl mama ichi tꞌẽe cheru, 4soldaorã ũkꞌuru akꞌɨde pëiji kꞌawaaitꞌee Saúl sãpai chewã.

5Davidmaa nepɨrɨ chedakꞌãri, iru wãji Saúl badamaa. Ununaji Saúl kꞌãi bɨ chi soldaorã poro waibɨa Abner ikꞌaawa, soldaorã kꞌãi pꞌanadapꞌedaa esajĩakꞌa. Ma Abner Ner warra paji. 6Mãpai David pedeeji hitita Ajimélec ome mãikꞌaapa Sarvia warra Abisay ome. Mãgɨ́ Joab ɨ̃pema paji. Davidpa iidiji:

—¿Kꞌaita mɨ ome Saúl bɨmaa wã kꞌinia bɨma? aji.

Abisaypa pꞌanauji:

—Mɨta pɨ ome wãitꞌeeda aji.

7Ma pꞌãrikꞌua David Abisay ome wãji Saúl eerepemaarã kꞌãi pꞌanadapꞌedaamaa. Saúl soldaorã kꞌãi pꞌanadapꞌedaa esajĩakꞌa Abner kꞌaitꞌa Saúl kꞌãi baji. Ichi poro kꞌaitꞌa chi miasu eujãde su iru baji.

8Kꞌaitꞌa panadakꞌãri, Abisaypa Davidmaa mãgaji:

—¡Idi Tachi Akꞌõrepa pɨ kꞌĩra unuamaa iru bapari pɨ juade bɨji! ¡Mɨmaa peepíji! ¡Ichi miasupa suda abaapa mɨa iru eujãde su awa nɨ̃bɨyada! aji.

9Mamĩda Davidpa pꞌanauji:

—¡Peenaapáde! aji. ¡Tachi Akꞌõrepa rey jɨrɨtꞌerada peeru pɨrã, irua pɨmaa ne–inaa kꞌachia ooipɨ! 10Tachi Akꞌõre ichita chokꞌai bɨ́pata Saúl piupiitꞌee iru piuitꞌee bɨ ewate maa–e pɨrã chõo nɨ̃bɨde. 11Tachi Akꞌõrepa ichia jɨrɨtꞌerada mɨmaa peepi–epɨ. Saúl miasu atáji chi pania topari jarra ome mãikꞌaapa wãdáma aji.

12Mãpai Davidpa ataji Saúl miasu ichi poro kꞌaitꞌa bada chi pania topari jarra ome. Maapꞌeda wãjida. Apidaapa ãra unuda–e paji; apidaapa maarepida ũrida–e paji mãikꞌaapa apida ɨ̃rɨma–e paji, Tachi Akꞌõrepa Saúl eere pꞌanadapꞌedaarã pia kꞌãipida perã.

13Ma eujã jewedaa bɨ kꞌĩraikꞌa eere panadakꞌãri, David ee nokꞌode bainɨ̃ beeji. Ma eemãiipa Saúl eere pꞌanadapꞌedaarã tꞌɨmɨ́ pꞌanajida. 14Mãpai Davidpa Abner ichi soldaorã ome golpe nãgá tꞌɨ̃jaraji:

—Abner, ¿mɨ pedee ũri bɨkꞌã? aji.

Abnerpa pꞌanauji:

—¿Kꞌáipata reymaa biamaa bɨma? aji.

15Mãpai Davidpa mãgaji:

—¿Pɨ israelitaarã jõmaarã kꞌãyaara sõcharrara bɨ–ekꞌã? aji. ¿Sãapꞌeda pɨchi poro waibɨa, tachi rey, pia jɨ̃a–e pajima? Eperã aba tꞌĩuji parã kꞌãi pꞌanadapꞌedaamãi rey peede. 16Pɨa ooda kꞌachia bɨ. Tachi Akꞌõre ichita chokꞌai bɨ kꞌĩrapite mɨa juraa bɨ parã piudaipia bɨ parã rey, Tachi Akꞌõrepa jɨrɨtꞌerada jɨ̃ada–e padapꞌedaa perã. Rey poro kꞌaitꞌa iru miasu chi pania topari jarra ome bada jɨrɨpáde aji. ¿Jãma bɨkꞌa? aji.

17Saulpa David pedee kꞌawaakꞌãri, mãgaji:

—Mɨ warra David, ¿pɨkꞌã? aji.

Davidpa pꞌanauji:

—Mɨpɨ, Mɨchi Rey Waibɨa. 18¿Sãapꞌeda pɨ waya chejima aji, mɨ, pɨ mimiapari, jɨrɨde? ¿Kꞌãare kꞌachiata mɨa pɨmaa oojima? 19Mɨchi Rey Waibɨa, mɨa chupɨria iidi bɨ pɨa mɨ, pɨ mimiapari pedee ũrimerã. Tachi Akꞌõrepa mɨ jɨrɨpimaa bɨ pɨrã, mãgara mɨa ne–animal iru–itꞌee paaitꞌee waa mɨ ome kꞌĩrau banaamerã. Mamĩda eperãarãpa jarapata kꞌaurepa nãga oomaa bɨ pɨrã, irua ãra kꞌachia ooipia bɨ mɨ Tachi Akꞌõrepa teeda eujãdeepa jërepi pꞌanadairã, awaraa akꞌõre waibɨa apataarãmaa ɨtꞌaa tꞌɨ̃namerã. 20Mɨ piu kꞌinia–e bɨ Tachi Akꞌõre baparimãiipa tꞌɨmɨ́. Mamĩda Mɨchi Rey Waibɨa, pɨa mɨ jɨrɨ ni mẽe chokꞌorro jɨrɨpatakꞌa, pɨ kꞌĩrapite mɨ pulgákꞌata bɨ mĩda.

21David pedee aupakꞌãri, Saulpa mãgaji:

—Mɨ warra David, mɨa pꞌekꞌau kꞌachia oojipɨ, pɨ jɨrɨ chekꞌãri. Mɨ ome chéji. Mɨa waa jɨrɨ–epɨ pɨmaa kꞌachia ooitꞌee. Waya idi pɨa mɨ pee–e paji, mɨ waawee bapari perã. Mɨ kꞌĩsia kꞌawa–ee baji mãikꞌaapa ne–inaa audú kꞌachia oojida aji.

22Davidpa pꞌanauji:

—Mɨchi Rey Waibɨa, pɨ miasu nama bɨda aji. Pɨ mimiapari pë́iji atade. 23Tachi Akꞌõrépata kꞌaripapari chi ne–inaa pia oopataarã, irua jara bɨkꞌa oo kꞌinia pꞌanapata perã. Idi irua pɨ mɨ juade bɨji mĩda, mɨa pɨ pee–e paji, irua pɨ jɨrɨtꞌerada perã. 24Mɨa kꞌinia bɨ mɨa idi oodakꞌa pɨ ome, irua mɨ ome aukꞌa oomerã. Mãgá irua nepɨra jõmaadeepa mɨ uchiapiitꞌeeda aji.

25Mãpai Saulpa mãgaji:

—Mɨ warra David, Tachi Akꞌõrepa pɨ bendiciaipia bɨda aji. Pɨa iru–itꞌee ne–inaa pia ookꞌãri, ne–inaa jõmaade iruata pɨ kꞌaripaitꞌeeda aji.

Maapꞌeda Saúl ichi temaa wãji. Jõdee David ichi ode wãji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index