Search form

1 Samuel 27

David filisteorã eujãde mirunada

1Ma tꞌẽepai Davidpa kꞌĩsiaji: “Taarãpai wa taarã–e nɨde Saulpa mɨ pee cheitꞌee. Mapa mɨ banaipia bɨ filisteorã eujãde, israelitaarã eujãde mɨ jɨrɨnaadamerã mãikꞌaapa mãgá irua mɨ ichiakꞌau bɨmerã.”

2Mãga paji. David wãji filisteorã eujãdee ichi eere pꞌanadapꞌedaarã seiscientos ome. Pꞌananajida Gat pꞌuurude. Mãgɨ́ pꞌuuru Maoc warra, rey Aquis jua ekꞌari baji. 3Ɨmɨkꞌĩra chaachaa chi wẽra, chi warrarã ome mama pꞌaneejida. Ichiaba David chi wẽraarã Jezrel pꞌuurudepema Ajinoán ome mãikꞌaapa Carmel pꞌuurudepema Abigaíl, Nabal piuda wẽra pada ome mama pꞌaneejida. 4Saulpa kꞌawaakꞌãri David Gatdee wãda, waa iru jɨrɨ–e paji.

5Mama pꞌanɨde Davidpa rey Aquimaa nãga jaraji:

—Rey Waibɨa, pia–e bɨda aji, mɨ, pɨ mimiapari nama pɨ pꞌuuru waibɨade bamerã. Pɨa wãara mɨ pia akꞌɨru pɨrã, mɨa chupɨria iidi bɨ pɨa mɨ pꞌuuru awaraade pëimerã. Mɨ mama banaitꞌee mɨ kꞌõpꞌãyoorã ome.

6Ma ewateweda Aquipa Siclag pꞌuuru Davidmaa teeji. Maperã tꞌẽepai ma pꞌuuru Judá eujãdepemaarã reyrã jua ekꞌari beeji.

7David año aba apꞌeda, atane kꞌĩmari filisteorã eujãde baji. 8Maapai iru wãpachi ichi soldaorã ome filisteorã eujã sur eere mãikꞌaapa mama pꞌanapatapꞌedaarã ome chõopachida. Telén eujãdeepa Sur parumaa Egipto ode bɨ guesureorã, guirzitaarã mãikꞌaapa amalecitaarã ome chõo wãjida. 9Mãɨrã ome chõonadakꞌãri, ãra peekꞌoo wãpachida, wẽraarã paara. Maapꞌeda mãɨrã ovejaarã, pꞌakꞌaarã, burroorã, camelloorã mãikꞌaapa ãra pꞌaru paara pꞌe atapachida. Ma tꞌẽepai David rey Aquimaa wãpachi ichia ooda jarade. 10Pachedakꞌãri, irua iidipachi: “¿Sãma chõo nipajidama?” apachi. Davidpa pꞌanaupachi: “Judá ëreerã eujãde sur eere” maa–e pɨrã “Jerameldeepa uchiadapꞌedaarã eujãde” maa–e pɨrã “quenitaarã eujãde”.

11Mãgá chõonadakꞌãri, Davidpa eperã apida chokꞌai atabëikꞌaa paji filisteorãmaa jaranaadamerã. Filisteorã eujãde bɨde mãga oopachi. 12Maapai rey Aquipa David pia akꞌɨpachi. Kꞌĩsiaji: “¿Davidpa oopari kꞌaurepa israelitaarãpa iru kꞌĩra unuamaa iru pꞌanapata–ekꞌã? Maperã iru mɨ jua ekꞌari ichita mimiapariitꞌee.”

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index