Search form

1 Samuel 28

1Maapai filisteorã soldaorã chipꞌejida jura chõonadaitꞌee israelitaarã ome. Mãga bɨde rey Aquipa Davidmaa nãga jaraji:

—Pɨa kꞌawa bɨda aji, tai ome parã aukꞌa uchiadaitꞌee jura chõode.

2Davidpa pꞌanauji:

—Pia bɨda aji. Ɨ̃rá pɨa unuitꞌeeda aji, sãgá mɨ, pɨ mimiapari chõopari.

Aquipa mãgaji:

—Mãgá pia chõoru pɨrã, mɨa pɨ mɨchi kꞌapꞌɨa jɨ̃apataarã poro waibɨa bɨyada aji.

Saúl wãda piudaarã ome pedeeparida aparimaa

3Maapai Samuel jai–idaa baji. Israelitaarã iru–itꞌee jẽe para bapꞌeda, Ramá pꞌuurude ɨajida. Ma awara Saulpa Israel eujãdeepa jërekꞌooji piudaarã ome pedeepatada apataarã ne–inaa pꞌasaitꞌee jarapataarã ome.

4Filisteorã chipꞌedaidapꞌeda, Sunén pꞌuurude pꞌananajida mãikꞌaapa mama ãchi carpa eebai jira bɨjida mama kꞌãidaitꞌee. Jõdee Saúl ichi soldaorã ome Guilboa eede pꞌananajida mãikꞌaapa mama ãchi carpa eebai jira bɨjida mama kꞌãidaitꞌee. 5Ma eedeepa Saulpa filisteorã unukꞌãri, ãchobeedachi mãikꞌaapa audú pꞌera nɨ̃beeji. 6Mapa Tachi Akꞌõremaa ɨtꞌaa iidiji kꞌawaitꞌee kꞌãata ooipia bɨ. Mamĩda Tachi Akꞌõrepa maarepida pꞌanau–e paji kꞌãimokꞌaraade, pꞌaarepa anipapari Urim kꞌapꞌɨa, maa–e pɨrã Tachi Akꞌõre pedee jarapari kꞌapꞌɨa.

7Mãgá Tachi Akꞌõrepa pꞌanau–e pakꞌãri, Saulpa mãgaji ichi ekꞌari pꞌanadapꞌedaarãmaa:

—Wẽra piudaarã ome pedeepari jɨrɨnadapáde aji. Mɨa irumaa iidiitꞌee kꞌãata ooipia bɨ.

Ichi ekꞌari pꞌanadapꞌedaarãpa pꞌanaujida:

—Endor pꞌuurude mãgee wẽra bɨda ajida.

8Mãpai Saulpa ichi pꞌaru jɨ̃ bada ẽratꞌaapꞌeda, pꞌaru jĩpꞌaa jɨ̃ beeji mãikꞌaapa ɨmɨkꞌĩraarã omé ome ma pꞌãrikꞌua wãji ma wẽramaa. Saulpa ma wẽra unukꞌãri, mãgaji:

—Mɨa pɨmaa chupɨria iidi bɨ mɨa jararu jaure tꞌɨ̃jaramerã, mãgɨmaa ne–inaa iidi kꞌinia bairã.

9Ma wẽrapa pꞌanauji:

—Pɨa kꞌawa bɨda aji, na eujãdeepa Saulpa jërepida ne–inaa pꞌasaitꞌee jarapataarã mãikꞌaapa piudaarã ome pedeepataarã. ¿Sãapꞌeda pɨa nama iidi che bɨma? aji. Mɨa mãga jararu pɨrã, parã kꞌaurepa mɨ peetꞌaadayada aji.

10Mamĩda Saulpa nãga jaraji:

—Tachi Akꞌõre ichita chokꞌai bɨ kꞌĩrapite mɨa juraa bɨda aji, apidaapa pɨmaa maarepida ne–inaa kꞌachia ooda–e paitꞌee.

11Mãpai ma wẽrapa iidiji:

—¿Chisãgɨ́ piuda tꞌɨ̃jaraipia bɨma? aji.

Saulpa pꞌanauji:

—Samuel tꞌɨ̃jarapáde aji.

12Ma wẽrapa tꞌɨ̃jaramaa bɨde, Samuel cheji. Mãga unukꞌãri, ma wẽra biadachi pꞌera nɨ̃bɨpa. Mãpai mãgaji:

—¿Sãapꞌeda pɨa mɨ kꞌũratꞌaajima? aji. ¡Pɨ Saulta!

13Mamĩda reypa mãgaji:

—Pꞌeranaapáde aji. ¿Kꞌãata unujima? aji.

Ma wẽrapa pꞌanauji:

—Mɨa eperã jaure unu bɨda aji, eujãdeepa uchiaru. 14Mãpai Saulpa iidiji:

—¿Iru sãga bɨma? aji.

Ma wẽrapa pꞌanauji:

—Iru chonaa bɨ mãikꞌaapa pꞌaru teesoo jɨ̃ bɨda aji.

Saulpa kꞌawaakꞌãri mãgɨ́ Samuel, chi piuda, bedabaidachi tau bɨɨrɨ eujãde tꞌõbairumaa.

15Mãpai Samuelpa Saulmaa iidiji:

—¿Kꞌãare–itꞌee mɨ tꞌɨ̃jima aji, piudaarãmãiipa chemerã?

Saulpa pꞌanauji:

—Mɨ ãchobee nɨ̃bɨda aji, filisteorã tai ome chõo cheruta perã. Tachi Akꞌõremaa mɨa iidijida aji. Mamĩda maarepida pꞌanau–e kꞌãimokꞌaraa bɨde, maa–e pɨrã iru pedee jarapataarã kꞌapꞌɨa pari. Maperã mɨa pɨ tꞌɨ̃jida aji, jaramerã mɨa kꞌãata ooipia bɨ.

16Mãpai Samuelpa mãgaji:

—¿Sãapꞌeda mɨmaa kꞌaripa iidi chejima aji, Tachi Akꞌõrepa pɨ ikꞌaawaapa ãyaa wãji pɨrã mãikꞌaapa pɨ kꞌĩra unuamaa iru baparikꞌa bɨ pɨrã? 17Irua oomaa bɨ mɨa pɨmaa jaradakꞌa. Pɨ trua jãri ata wãda aji, teeitꞌee pɨchi aukꞌaa, Davidmaa. 18Irua mãga oomaa bɨ pɨa oo–e pada perã irua jaradakꞌa jarakꞌãri amalecitaarã jõmaweda jõpimerã, ichi ãra ome audú kꞌĩrau bada perã. 19Ma awara Tachi Akꞌõrepa pɨ israelitaarã ome filisteorã juade baaipiitꞌeeda aji. Nu pɨ pɨchi warrarã paara pꞌananadaitꞌee mɨ ome, piudapꞌedaarãmãi. Israelitaarã soldaorã filisteorã juade baaidaitꞌeeda aji.

Mãga jarapꞌeda, Samuel wẽpadachi.

20Aramata Saúl ãchobeepa ertꞌĩudachi. Juatau wẽe beeji, ma ewate nekꞌo–e bada perã. 21Ma wẽrapa Saúl mãga unukꞌãri, kꞌaitꞌa wãpꞌeda, mãgaji:

—Mɨ, pɨ mimiaparipa ooji pɨa iididakꞌa. Piukꞌaji mãga ooda kꞌaurepa. 22Ɨ̃rá mɨa enenee nɨ̃bɨ pɨa oomerã mɨa jara bɨkꞌa mãikꞌaapa nekꞌomerã. Mãgá waya juataura beeyada aji, mãikꞌaapa pɨchi ode wãyada aji.

23Mamĩda Saúl nekꞌo kꞌinia–e paji. Mãpai chi kꞌõpꞌãyoorãpa aukꞌa jarajida nekꞌomerã. Ãra pedee ũripꞌeda, pꞌirabaiji mãikꞌaapa camade su–akꞌɨ beeji. 24Mãga nɨde ma wẽrapa pꞌakꞌa chakꞌe poree bɨ peepꞌeda, paaji mãikꞌaapa pan levadura wẽe ooji. 25Maapꞌeda teeji Saulmaa mãikꞌaapa iru ome nipadapꞌedaarãmaa kꞌodamerã. Kꞌodapꞌeda, ma pꞌãrikꞌuaweda wãjida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index