Search form

1 Samuel 31

Saúl ichi warrarã ome piudapꞌedaa

(1 Crónicas 10.1-12)

1Mãɨmisa, filisteorãpa israelitaarã ome chõo chejida. Israelitaarã soldaorã ãra naa jĩchoo wãjida mĩda, Guilboa eede cho–kꞌara peejida. 2Mãga nɨde ma filisteorã Saúl tꞌẽe mãikꞌaapa chi warrarã tꞌẽe wãjida. Ẽpꞌe atanadakꞌãri, Saúl warrarã Jonatán, Abinadab mãikꞌaapa Malquisúa peekꞌoojida. 3Saúl ikꞌaawa audú chõo para baji. Ãchidepema sia trɨpataarãpa ãchi sia trɨrutade, Saulmaa oonajida.

4Mapa irua mãgaji chi arma anipaparimaa:

—Pɨ espada ẽtꞌa atapꞌeda, mɨ su peetꞌaapáde aji. Mɨa kꞌinia–e bɨ jã ijãadakꞌaa beerãpa mɨ peedamerã, mɨ oo iru pꞌanɨ misa.

Mamĩda chi arma anipaparipa iru pee kꞌinia–e paji, audú pꞌera nɨ̃bada perã. Maperã Saulpa ichi espada kꞌɨ̃ ɨtꞌaa bɨpꞌeda, aɨ ɨ̃rɨ baainaji. Mãgá ichi juadoopa piudachi. 5Chi arma anipaparipa mãga unukꞌãri, aukꞌa ichi espada kꞌɨ̃ ɨ̃rɨ baainaji. Mãgá piuji chi poro waibɨa ome. 6Mãgá ma ewateweda piujida Saúl, chi warrarã õpee, chi arma anipapari mãikꞌaapa awaraa soldaorã iru ome nipadapꞌedaarã chokꞌara.

7(Israelitaarã ma Jezrel eujã jewedaa kꞌĩraikꞌa eere pꞌanapatapꞌedaarãpa mãikꞌaapa Jordán to oriente eere pꞌanapatapꞌedaarãpa kꞌawaadakꞌãri israelitaarã soldaorã jĩchoo wãda mãikꞌaapa Saúl chi warrarã ome piudapꞌedaa, ãchi pꞌuuru atabëijida aukꞌa jĩchoodaitꞌee. Maapꞌeda filisteorã ma pꞌuurude pꞌana chejida.)

8Aɨ norema filisteorãpa piudapꞌedaarã kꞌapꞌɨade netꞌaa iru bada ata chedakꞌãri, Guilboa eede unu atajida Saúl mãikꞌaapa chi warrarã õpee kꞌapꞌɨa piuda. 9Mãpai Saúl poro tꞌɨapꞌe atajida mãikꞌaapa iru arma anipada atajida. Mãpai jara pëijida filisteorã eujã jõmaade, mãdepemaarãpa mãikꞌaapa ãchi akꞌõre waibɨa apatapꞌedaa te akꞌɨpataarãpa kꞌawaadamerã. 10Ma tꞌẽepai Saúl arma pꞌe bɨjida ãchi akꞌõre waibɨa apatapꞌedaa Astarté tede. Jõdee chi kꞌapꞌɨa piuda baijira bɨjida Betsán pꞌuuru tꞌɨakꞌau bada murallade.

11Israelitaarã Galaad eujãdepema Jabés pꞌuurude pꞌanapatapꞌedaarãpa mãga kꞌawaa atadakꞌãri, 12chi piara chõo kꞌawaa beerãpa pedeeteejida wãdaitꞌee Saúl kꞌapꞌɨa atade. Pꞌãrikꞌua wãjida panadaitꞌee Betsán pꞌuurude. Mama chõodapꞌeda, Saúl mãikꞌaapa chi warrarã kꞌapꞌɨa piuda atajida mãikꞌaapa aneejida Jabés pꞌuurudee. Mama paatꞌaajida. 13Ma kꞌapꞌɨa piuda paadadepema chi bɨɨrɨ ɨajida Jabés pꞌuurude, tamarisco pakꞌuru ekꞌari. Maapꞌeda tꞌãri pꞌuapa nekꞌoda–ee pꞌaneejida kꞌãima siete wãyaaru misa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index