Search form

1 Samuel 4

Filisteorãpa Tachi Akꞌõre baaltekꞌa bɨ jãri atadapꞌedaa

1Maapai filisteorã soldaorã chipꞌedaidapꞌeda, israelitaarã ome chõode wãjida. Ichiaba israelitaarã soldaorã chipꞌedaidapꞌeda, aukꞌa uchiajida chõode filisteorã ome. Punto Ebenezer kꞌaitꞌa ma israelitaarãpa ãchi carpa ne–edee ooda eebai jira bɨjida mama kꞌãidaitꞌee. Jõdee Afec pꞌuuru kꞌaitꞌa filisteorãpa ãchi carpa eebai jira bɨjida. 2Mamãikꞌaapa ãchi soldaorã uchiadakꞌãri, israelitaarã ome chõomaa pꞌaneejida. Mãgá chõomaa pꞌanɨde filisteorãpa pꞌoyaajida. Mama chõo pꞌanadapꞌedaamãi, ãchia israelitaarã cuatro mil peejida.

3Israelitaarã chokꞌai uchiadapꞌedaarã ãpɨtee chedakꞌãri ãchi carpa eebai jira bɨdapꞌedaamãi, ãchi poro waibɨarãpa iidijida:

—¿Sãapꞌeda Tachi Akꞌõrepa jã filisteorãmaa tachi pꞌoyaapijima? ajida. Siló pꞌuurudee wãdáma Tachi Akꞌõre tedepema baaltekꞌa bɨ atade. Tachi ome ateedáma ajida, mãgá Tachi Akꞌõre tachi ome nipamerã mãikꞌaapa tachi kꞌĩra unuamaa iru pꞌanapataarã juadeepa tachi kꞌaripa atamerã.

4Aramãgá soldaorã ũkꞌuru Siló pꞌuurudee pëijida Tachi Akꞌõre baaltekꞌa bɨ atade, ijãadapꞌedaa perã Tachi Akꞌõre ma baaltekꞌa bɨ tꞌapꞌa ɨ̃rɨ bɨ.+ Ma soldaorã ãpɨtee chedakꞌãri ma baaltekꞌa bɨ ome, mãgɨ́ akꞌɨpataarã, Elí warrarã Ofni Finés ome aukꞌa chejida. 5Ma baaltekꞌa bɨ israelitaarã pꞌanadapꞌedaamãi pachekꞌãri, o–ĩapa golpe biajida ma eujã wërerumaa.

6Filisteorãpa biukꞌa para nɨ̃bɨ ũridakꞌãri, mãgajida:

—¿Sãapꞌeda audú biukꞌa para nɨ̃bɨma ajida, hebreorã pꞌanɨmãi?

Mamĩda kꞌawaa atadakꞌãri Tachi Akꞌõre baaltekꞌa bɨ aneedapꞌedaa, 7pꞌerakꞌoodachida mãikꞌaapa mãgapachida:

—¡Ãchi akꞌõre waibɨa cheji ãchi carpa eebai jira bɨdapꞌedaamãi! Aai, tachi kꞌachiade baairutada ajida. Waide awaraarã soldaorãpa tachi ome nãga oodakꞌaa paji. 8¡Aai, tachi kꞌachiade baairuta! ¿Kꞌaipa tachi kꞌaripayama ajida, baainaadamerã ãchi akꞌõre waibɨarã juade? Ãchi eujã pania wẽe bɨde pꞌanadakꞌãri, mãgɨɨrãpa Egipto pidaarã jõpijida kꞌayaa kꞌachiapa. 9¡Filisteorã, sõcharra pꞌanadáma! ¡Chõodáma hebreorã ome, maa–e pɨrã tachi ãchi esclavo pꞌaneedaitꞌee, ãchi tachi jua ekꞌari esclavo pꞌanapatakꞌa!

10Mãpai ma filisteorã chõomaa pꞌaneejida israelitaarã ome mãikꞌaapa ma chõo pꞌoyaajida. Pꞌera jõnadapꞌedaa perã, israelitaarã mirudachida ãchi te chaa. Cho–kꞌara piujida. Israelitaarã soldaorã treinta mil peekꞌoojida. 11Ma awara chõo jõnɨde ma filisteorãpa Tachi Akꞌõre baaltekꞌa bɨ atadachida mãikꞌaapa Elí warrarã omé, Ofni Finés ome peejida.

Elí piuda

12Mamĩda ma chõomaa pꞌanadapꞌedaamãiipa Benjamín ëreerãdepema soldao aba pꞌira jirabodachi mãikꞌaapa ma ewateweda Siló pꞌuurude panaji. Chi pꞌaru jõma jẽ baji mãikꞌaapa ichi porode yooro pꞌora iru baji akꞌɨpiitꞌee audú tꞌãri pꞌua bɨ. 13Ma soldao Siló pꞌuurude panakꞌãri, Elí su–akꞌɨ baji o ikꞌaawa pꞌuurudepema puerta kꞌaitꞌa. Omaa akꞌɨmaa baji, kꞌĩsia nɨ̃bada perã Tachi Akꞌõre baaltekꞌa bɨde. Ma soldaopa pꞌuuru pidaarãmaa jõma nepɨrɨkꞌãri, biukꞌa para beeji.

14Elipa mãga ũrikꞌãri, iidiji:

—¿Sãapꞌeda audú biukꞌa para nɨ̃bɨma? aji.

Mãpai ma soldao pꞌira wãji Elimaa nepɨrɨde. 15Maapai Elí noventa y ocho año iru baji mãikꞌaapa tau pꞌãriu baji. 16Ma soldaopa Elimaa nãga jaraji:

—Mɨ chejida aji, chõo pꞌanɨmãiipa. Idiweda mɨ miru uchiajida aji.

Mãpai Elipa mãgaji:

—Warra, ¿sãgajima? aji.

17Ma soldaopa pꞌanauji:

—Israelitaarã filisteorã naa jĩchoojidada aji. Soldaorã cho–kꞌara kꞌiniijida. Made pɨ warrarã omé, Ofni Finés ome piujida. Ma awara filisteorãpa Tachi Akꞌõre baaltekꞌa bɨ atadachidada aji.

18Elipa ũrikꞌãri Tachi Akꞌõre baaltekꞌa bɨ ateedapꞌedaa, ichi silladeepa ãpɨtee kꞌoreudachi pꞌuurude tꞌĩupatamãi. Chonaa bada perã mãikꞌaapa kꞌapꞌɨa chɨa bada perã, chi otau kꞌõradachi. Mãgá piudachi. Cuarenta año wãyaarude Elí israelitaarã poro waibɨa paji.

19Elí ãigu, Finés wẽra warra tꞌoyama baji. Ma wẽrapa ũrikꞌãri filisteorãpa Tachi Akꞌõre baaltekꞌa bɨ ateedapꞌedaa mãikꞌaapa chi ɨmɨkꞌĩra, chi chãure paara piudapꞌedaa, bi pꞌiradachi warra tꞌoitꞌee. Ɨ̃jaabaipꞌeda, chi warra tꞌoji. Mamĩda ma warra pia pꞌoyaa tꞌo–e paji.

20Mama pꞌanadapꞌedaa parteraarãpa iru piu wã unudakꞌãri, mãgajida: —Waaweenáaji. Pɨa ɨmɨkꞌĩra warra tꞌojida ajida.

Mamĩda irua ãra pedee pꞌanau–e paji, audú tꞌãri pꞌua nɨ̃bada perã. 21Piui naaweda, chi warra tꞌɨ̃ bɨji Icabod, jara kꞌinia bɨ ‘Tachi Akꞌõre waa wẽ–e tachi ome’. Mãga tꞌɨ̃ bɨji israelitaarã–itꞌee Tachi Akꞌõre kꞌĩra wãree wẽe beeda perã filisteorãpa iru baaltekꞌa bɨ ateedakꞌãri; ma awara chi ɨmɨkꞌĩra, chi chãure paara piudakꞌãri.

22Chi warra mãgá tꞌɨ̃ bɨkꞌãri, mãgaji:

—Israel eujãdeepa Tachi Akꞌõre kꞌĩra wãree ateejidada aji, iru baaltekꞌa bɨ atadakꞌãri.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index