Search form

1 Samuel 5

Tachi Akꞌõre baaltekꞌa bɨ filisteorã eujãde

1Filisteorãpa Tachi Akꞌõre baaltekꞌa bɨ ateejida Ebenezerdeepa ãchi pꞌuuru waibɨa Asdoddee. 2Mama ma baaltekꞌa bɨ bɨnajida ãchi akꞌõre waibɨa Dagón ikꞌaawa. Dagón ne–inaa juapa ooda paji. 3Aɨ norema Asdoddepemaarã mamaa wãdakꞌãri, unujida ãchi akꞌõre waibɨa Dagón eujãde barro baibɨ Tachi Akꞌõre baaltekꞌa bɨ kꞌĩrapite. Mãpai waya ichi badakꞌa ata bɨjida chi badamãi. 4Mamĩda aɨ norema Asdod pꞌuurudepemaarã waya wãdakꞌãri, waya unujida ãchi akꞌõre waibɨa Dagón eujãde baibɨ Tachi Akꞌõre baaltekꞌa bɨ kꞌĩrapite. Ma te tꞌĩupatamãi chi poro chi jua ome kꞌõra jẽra baji. Chi kꞌapꞌɨa aupai ãri–ee baji. 5Mapa maadamãiipa ɨ̃rá parumaa Dagón tede ichi pꞌaareerã wa eperãarã tꞌĩudakꞌãri, puerta edaikꞌa eerepema mãu ɨ̃rɨ tꞌɨada–ee tꞌĩupata.

6Ma tꞌẽepai Tachi Akꞌõrepa Asdod pꞌuurudepemaarãmaa mãikꞌaapa ma pꞌuuru ikꞌaawa pꞌanapatapꞌedaarãmaa kꞌayaa kꞌachia tumor ome baripiji. 7Asdod pꞌuurudepemaarãpa mãga unudakꞌãri, mãgajida:

—Israelitaarã Akꞌõre Waibɨa baaltekꞌa bɨ tachi tꞌãide baikꞌaraa bɨ. Jãgɨpa tachimaa mãikꞌaapa tachi Akꞌõre Waibɨa Dagonmaa kꞌachia oomaa bɨda ajida.

8Maperã jara pëijida jõmaweda filisteorã poro waibɨarã chedamerã. Mãɨrãmaa ma pꞌuurudepemaarãpa iidijida:

—¿Kꞌãata oodayama ajida, israelitaarã Akꞌõre Waibɨa baaltekꞌa bɨ ome?

Mãɨrãpa pꞌanaujida:

—Gat pꞌuurudee ateedapáde ajida.

Mapa filisteorãpa israelitaarã Akꞌõre Waibɨa baaltekꞌa bɨ mamaa ateejida. 9Mamĩda mama bɨnadapꞌedaa tꞌẽepai, Tachi Akꞌõrepa ma pꞌuurudepemaarã aukꞌa miapiji. Chonaarãmaa, warrarãmaa paara kꞌayaa kꞌachia tumor ome baripiji. Mãgá irua ãra pꞌerapiji. 10Maperã filisteorãpa Tachi Akꞌõre baaltekꞌa bɨ Ecrón pꞌuurudee pëijida.

Mamĩda Tachi Akꞌõre baaltekꞌa bɨ mamaa ateedakꞌãri, ma pꞌuuru pidaarãpa nãga biajida:

—¿Israelitaarã Akꞌõre Waibɨa baaltekꞌa bɨ aneejida–ekꞌã ajida, irua tachi jõmaweda peekꞌoomerã?

11Mãgá ma pꞌuurudepemaarã jõmaweda pꞌerajida, Tachi Akꞌõrepa ãramaa kꞌayaa pëida perã.

Maperã tꞌɨ̃ pëijida filisteorã poro waibɨarã mãikꞌaapa mãgajida:

—Namãikꞌaapa atéetɨ israelitaarã Akꞌõre Waibɨa baaltekꞌa bɨ. Ichi badamaa teenadapáde ajida, maa–e pɨrã irua tachi jõmaweda peekꞌooi.

12Chi waide piuda–e padapꞌedaarã tumor–idaa pꞌanadapꞌedaa perã, ma pꞌuurudepemaarãpa ɨtꞌaa biajida ãchi akꞌõre waibɨarã apatapꞌedaarãmaa, ãrapa ũridai jĩakꞌaapa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index