Search form

1 Samuel 6

Filisteorãpa Tachi Akꞌõre baaltekꞌa bɨ ãpɨtee tee pëidapꞌedaa

1Tachi Akꞌõre baaltekꞌa bɨ atane siete filisteorã eujãde baji. 2Ma tꞌẽepai filisteorãpa tꞌɨ̃ pëijida ãchi eujãdepema pꞌaareerã mãikꞌaapa ne–inaa oopataarã kꞌawaadaitꞌee ne–inaa pꞌasaitꞌee bɨ.

Mãɨrã pachedakꞌãri, ma filisteorãpa nãga iidijida:

—¿Kꞌãata oodayama ajida, israelitaarã Akꞌõre Waibɨa baaltekꞌa bɨ ome? ¿Sãgá pëidayama ajida, ichi badamaa?

3Mãɨrãpa pꞌanaujida:

—Israelitaarã Akꞌõre Waibɨa baaltekꞌa bɨ pëiruta pɨrã, arajãgaa pëináatɨ. Netꞌaa pia téetɨ ãchi Akꞌõre Waibɨamaa akꞌɨpidaitꞌee iru kꞌĩrapite parãpa ne–inaa kꞌachia oodapꞌedaa. Mãga ooruta pɨrã, parã jɨpa pꞌaneedai mãikꞌaapa kꞌawaadai sãapꞌeda irua parãmaa kꞌachia oomaa bɨ.

4Mãpai ma filisteorãpa iidijida:

—¿Kꞌãare netꞌaa piata teedaipia bɨma? ajida.

Mãɨrãpa pꞌanaujida:

—Tumorkꞌa bee nẽedee ooda joisomaa téetɨ. Ichiaba ratꞌakꞌa bee nẽedee ooda joisomaa téetɨ. Ma chaachaa jara kꞌinia bɨ filisteorã poro waibɨa aba, parãmaa mãikꞌaapa parã poro waibɨarãmaa paara ma tumor baripida perã. 5Ma–itꞌee nẽedee óotɨ tumorkꞌa bee mãikꞌaapa ratꞌakꞌa bee, ratꞌaarãpa parã eujã jõpi wãda perã. Ma netꞌaa israelitaarã Akꞌõre Waibɨamaa teeruta pɨrã, akꞌɨpidai jãgɨ́ Akꞌõre Waibɨa waawee pꞌanɨ. Mãgá irua parãmaa, parã akꞌõre waibɨarãmaa mãikꞌaapa parã eujã waa kꞌachia oo–e pai. 6¿Sãapꞌeda parã kꞌɨɨrɨ kꞌisua pꞌanɨma ajida, Egiptodepemaarã pꞌanadapꞌedaakꞌa mãikꞌaapa Faraón badakꞌa? Ichia israelitaarã pëiamaa baji, ãra Akꞌõre Waibɨapa ichi aukꞌaarãmaa ne–inaa audú kꞌachia oo–emaa.

7’Parãpa nãga oodaipia bɨ. Carreta chiwidi oopítɨ. Maapꞌeda pꞌakꞌa wẽra omé warra paraa bee yugode jɨ̃ atátɨ, ma carreta jidiudamerã. Mamĩda ma pꞌakꞌa wẽraarã carreta jidiu atua pꞌanadaipia bɨ. Ma pꞌakꞌa wẽraarã carretade jɨ̃dapꞌeda, chi chakꞌeerã jɨ̃a bɨnátɨ pꞌakꞌa jɨ̃apata temãi. 8Mãga oodapꞌeda, ma baaltekꞌa bɨ carretade bɨdaipia bɨ. Aɨ ikꞌaawa cajade pꞌe bɨdaipia bɨ ma netꞌaa nẽedee ooda iru–itꞌee tee pëidaitꞌee, irua tachi waa miapinaamerã. Maapꞌeda ma carreta ituaba pëidaipia bɨ. 9Mãpai chi wãrumaa akꞌɨ́tɨ. Ma carreta wãru pɨrã israelitaarã eujãdee, Bet Semes pꞌuurudee, mãgara wãara ãra Akꞌõre Waibɨapa tachi miapi baji. Mamĩda awara ãyaa wãru pɨrã, kꞌawaadai irua tachi miapi–e paji. Jĩpꞌa pariatuata tachi mãgá kꞌayaadachida.

10Mãpai pꞌaareerãpa jaradapꞌedaakꞌa oojida. Pꞌakꞌa wẽra omé warra paraa bee atajida. Ma pꞌakꞌa wẽraarã carretade jɨ̃dapꞌeda, chi chakꞌeerã jɨ̃a bɨnajida pꞌakꞌa jɨ̃apata temãi. 11Maapꞌeda Tachi Akꞌõre baaltekꞌa bɨ mãikꞌaapa ma caja ma carretade bɨjida. Ma cajade pꞌanajida ma ratꞌakꞌa bee mãikꞌaapa tumorkꞌa bee nẽedee ooda. 12Ma pꞌakꞌa wẽraarã carreta ome pëidakꞌãri, Bet Semedee wãpari ode wãjida. Ma pꞌakꞌa wẽraarã jĩpꞌa ma ode bia wãjida, juaraare wa ju bi eere tꞌĩuda–ee. Filisteorã poro waibɨarã ma carreta tꞌẽe wãjida Bet Semes pꞌuuru kꞌaitꞌa parumaa.

13Bet Semedepemaarã ũkꞌuru ma eujã jewedaade trigo ewa pꞌanadapꞌedaarãpa unudakꞌãri Tachi Akꞌõre baaltekꞌa bɨ cheru, o–ĩadachida. 14Bet Semedepema Josué eujãmãi panakꞌãri, ma carreta akꞌɨnɨ̃ beeji. Mama mãu choma baji. Mãpai ma Bet Semedepemaarãpa ma carreta wãratꞌaadapꞌeda, ma pakꞌurudee tꞌɨpɨ oro atajida mãikꞌaapa ma pꞌakꞌa wẽra omé peedapꞌeda, Tachi Akꞌõre–itꞌee paa jõpijida. 15Leví ëreerãdepemaarã, chi mama pꞌanapatapꞌedaarãpa Tachi Akꞌõre baaltekꞌa bɨ mãikꞌaapa ma caja netꞌaa nẽedee ooda iru bada atajida chi carreta wãratꞌaadai naaweda mãikꞌaapa ma mãu choma bɨ ɨ̃rɨ bɨnajida. Ma ewate Bet Semedepemaarãpa awaraa ne–animalaarã peedapꞌeda, ũkꞌuru Tachi Akꞌõre–itꞌee paajida mãikꞌaapa ũkꞌuru iru–itꞌee paa jõpijida. 16Ma filisteorã poro waibɨa joisomaarãpa tꞌɨmɨɨpa ma oomaa pꞌanadapꞌedaa akꞌɨmaa pꞌanajida. Maapꞌeda ma ewateweda ãpɨtee wãjida ãchi pꞌuuru Ecrondee.

17Filisteorãpa ma tumorkꞌa bee nẽedee ooda joisomaa Tachi Akꞌõre–itꞌee teejida ãchia ne–inaa kꞌachia oodapꞌedaa pari. Aba teejida ãchi pꞌuuru Asdod pari, aba ãchi pꞌuuru Gaza pari, aba ãchi pꞌuuru Ascalón pari, aba ãchi pꞌuuru Gat pari mãikꞌaapa aba ãchi pꞌuuru Ecrón pari. 18Ma awara ma ratꞌakꞌa bee nẽedee ooda teejida pꞌuuru ãchi poro waibɨarã joisomaa jua ekꞌari pꞌanadapꞌedaa pari, chi pꞌuuru murallapa tꞌɨakꞌau wẽe bee pari paara. Ma mãu choma bɨ, aɨ ɨ̃rɨ Tachi Akꞌõre baaltekꞌa bɨ bɨdapꞌedaa atꞌãri mama bɨ ma Bet Semedepema Josué eujãde.

19Mamĩda Tachi Akꞌõre baaltekꞌa bɨ Bet Semes pꞌuurude bɨde ũkꞌuru Bet Semedepemaarãpa ma edajãde akꞌɨjida, kꞌawa kꞌinia pꞌanadapꞌedaa perã kꞌãata aɨde paraa. Maperã Tachi Akꞌõrepa ma akꞌɨdapꞌedaarã setenta kꞌiniipiji. Bet Semedepemaarãpa mãga unudakꞌãri, tꞌãri pꞌuapa jẽemaa pꞌaneejida, Tachi Akꞌõrepa ãra mãgá audú miapida perã.

20Mãpai Bet Semedepemaarãpa mãgajida:

—Tachi Akꞌõre kꞌachia wẽe bapari. ¿Kꞌaita chooima iru kꞌĩrapite? ¿Kꞌairãmaa chi baaltekꞌa bɨ pëidayama ajida, iru tachi tꞌãideepa ãyaa wãmerã?

21Maapꞌeda nãga jara pëijida Quiriat Yearín pꞌuurudepemaarãmaa: “Filisteorãpa Tachi Akꞌõre baaltekꞌa bɨ aneejida. Mapa ata chedapáde” ajida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index