Search form

1 Samuel 7

1Mãgá Quiriat Yearín pꞌuurudepemaarãpa Tachi Akꞌõre baaltekꞌa bɨ atanadapꞌeda, bɨnajida eperã Abinadab te ee nokꞌode badade. Mãpai chi warra Eleazar awara bɨjida ma baaltekꞌa bɨ akꞌɨ bamerã.

Samuel israelitaarã poro waibɨa pada

2Tachi Akꞌõre baaltekꞌa bɨ taarã baji Quiriat Yearín pꞌuurude; perá veinte año. Maapai israelitaarãpa audú Tachi Akꞌõrede ijãa kꞌinia pꞌaneejida.

3Mapa Samuelpa israelitaarã jõmaarãmaa mãgaji:

—Parãpa waya tꞌãripa Tachi Akꞌõrede wãara ijãa kꞌinia pꞌanɨ pɨrã, awaraa eujãdepemaarã akꞌõre waibɨa apataarã mãikꞌaapa akꞌõre waibɨa apata Astartekꞌa bee ãyaa batꞌakꞌóotɨ. Mãpai pꞌanapatáatɨ Tachi Akꞌõrepa kꞌinia bɨkꞌa mãikꞌaapa irumaa aupai ɨtꞌaa tꞌɨ̃patáatɨ. Mãga ooruta pɨrã, irua parã filisteorã jua ekꞌariipa uchiapiitꞌeeda aji.

4Israelitaarãpa mãga oojida. Ãyaa batꞌakꞌoojida netꞌaa jõma iru pꞌanadapꞌedaa aɨ kꞌĩrapite ɨtꞌaa tꞌɨ̃pata, Baal kꞌĩrakꞌa bee, Astarté kꞌĩrakꞌa bee paara. Mãpai Tachi Akꞌõremaa aupai ɨtꞌaa tꞌɨ̃maa pꞌaneejida.

5Maapꞌeda Samuelpa nãga jaraji:

—Israelitaarã jõmaweda Mizpa pꞌuurude chipꞌedarítɨ. Mama parã pari mɨa Tachi Akꞌõremaa ɨtꞌaa iidiitꞌeeda aji.

6Mãgá israelitaarã Mizpade chipꞌedaidakꞌãri, pania atadapꞌeda, Tachi Akꞌõre kꞌĩrapite weejida. Mãga oojida akꞌɨpidaitꞌee waa pꞌekꞌau kꞌachia oo kꞌiniada–e pꞌanɨ. Ma ewate nekꞌoda–e paji mãikꞌaapa jarajida:

—Tachi Akꞌõre kꞌĩrapite tachia pꞌekꞌau kꞌachia oojidada ajida.

Mama pꞌanɨde Samuel ãchi poro waibɨa beeji.

7Filisteorãpa kꞌawaa atadakꞌãri israelitaarã Mizpade chipꞌe jõnɨ, ãchi poro waibɨarãpa jarajida chõode wãdamerã. Israelitaarãpa mãga kꞌawaadakꞌãri, pꞌeradachida. 8Mãpai Samuelmaa mãgajida:

—Tachi Akꞌõremaa ɨtꞌaa iidiparíiji, irua tachi kꞌaripa atamerã filisteorã juadeepa.

9Mãpai Samuelpa oveja chakꞌe ataji mãikꞌaapa peepꞌeda, Tachi Akꞌõre–itꞌee paa jõpiji. Ma tꞌẽepai israelitaarã pari ɨtꞌaa iidiji.

Tachi Akꞌõrepa nãga kꞌaripaji. 10Samuelpa atꞌãri ma oveja chakꞌe paamaa bɨ misa, filisteorã pachejida israelitaarã ome chõodaitꞌee. Mãga nɨde Tachi Akꞌõrepa pa golpe jĩwaapiji. Mãga ũridakꞌãri, ma filisteorã pꞌeradachida mãikꞌaapa israelitaarã taide ãchi eujãdee jĩchoo wãjida. 11Aramata israelitaarã Mizpadeepa uchiajida ma filisteorã tꞌẽe. Bet Car waawí parutamaa chõo wãjida. Mãgá israelitaarãpa ma filisteorã pee wãjida. 12Ma tꞌẽepai Samuelpa mãu atapꞌeda, bɨji Mizpa pꞌuuru, Sen pꞌuuru esajĩakꞌa.

Mãpai mãgaji:

—Na mãu tꞌɨ̃ bɨitꞌeeda aji, Ebenezer,+ nama Tachi Akꞌõrepa tachi kꞌaripada perã.

13Maadakꞌãriipa filisteorãpa waa chõo jɨrɨda–e paji israelitaarã eujãde, israelitaarãpa ãra pꞌoyaadapꞌedaa perã. Samuel israelitaarã poro waibɨa bɨ misa,+ Tachi Akꞌõrepa maarepida filisteorãmaa pꞌoyaapi–e paji. 14Ma awara israelitaarãpa waya atajida ãchi pꞌuuru filisteorãpa jãri iru pꞌanadapꞌedaa Ecrondeepa Gat parumaa. Mãgá israelitaarãpa ãchi eujã filisteorã juadeepa jãri atajida. Maapai israelitaarã kꞌãiwee pꞌanapachida amorreorã ome.

15Samuel piurumaa iru israelitaarã poro waibɨa paji. 16Año chaa iru wãpachi Betel pꞌuurudee, Guilgal pꞌuurudee mãikꞌaapa Mizpa pꞌuurudee israelitaarã nepɨra akꞌɨde. 17Maapꞌeda ichi temaa wãpachi Ramá pꞌuurudee. Mama ichiaba israelitaarã nepɨra akꞌɨpachi mãikꞌaapa mama Tachi Akꞌõre–itꞌee altar ooji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index