Search form

1 Samuel 8

Israelitaarãpa rey kꞌinia pꞌanadapꞌedaa

1Samuel chonaa bakꞌãri, ichi pari chi warrarã bɨji charraarã mimia oodamerã israelitaarã tꞌãide. 2Chi naapema tꞌɨ̃jarapachida Joel; chi apema Abías. Ãra Berseba pꞌuurude pꞌanapachida mãgá israelitaarã nepɨra akꞌɨdakꞌãri. 3Mamĩda ãchi chi akꞌõrekꞌa pꞌanadakꞌaa paji. Ma kꞌãyaara pꞌaratꞌa audú kꞌinia pꞌanadapꞌedaa perã, pꞌaratꞌa jitapachida ma pꞌaratꞌa teedapꞌedaarãpa oopidapꞌedaakꞌa oodaitꞌee. Mãgá israelitaarã nepɨra akꞌɨdakꞌaa paji Tachi Akꞌõrepa oopi bɨkꞌa. 4Maperã israelitaarã poro waibɨarã chipꞌedaidapꞌeda, Ramadee wãjida Samuel ome pedeede. 5Mãgajida:

—Pɨ chonaa bɨda ajida, mãikꞌaapa pɨ warrarã pɨkꞌa pꞌanadakꞌaa. Maperã taipa kꞌinia pꞌanɨ pɨa rey bɨmerã, irua tachi akꞌɨpariimerã. Rey kꞌinia pꞌanɨda ajida, awaraa eujãdepemaarãpa iru pꞌanapatakꞌa.

6Mãgá rey kꞌinia pꞌanɨda adakꞌãri, Samuel tꞌãri ãriidachi. Maperã Tachi Akꞌõremaa ɨtꞌaa tꞌɨ̃maa beeji.

7Mãpai Tachi Akꞌõrepa nãga pꞌanauji: —Óoji ãchia iidi pꞌanɨkꞌa. Pɨ yiaraa iru pꞌanɨ–e. Mɨta yiaraa iru pꞌanɨ, kꞌiniada–e pꞌanadairã mɨ ãchi rey waa bamerã. 8Pɨmaa oo pꞌanɨ mɨmaa oopatakꞌa mɨa ãchi Egipto eujãdeepa uchia atadakꞌãriipa ɨ̃rá parumaa. Mɨde ijãa amaapata ɨtꞌaa tꞌɨ̃nadaitꞌee awaraa akꞌõre waibɨa apatamaa. 9Mãga pꞌanapata perã, óoji ãchia iidi pꞌanɨkꞌa. Mamĩda aɨ naaweda kꞌĩra jĩpꞌa ũraapáde aji, kꞌawaadamerã sãga pꞌanapataadaitꞌee rey jua ekꞌari.

10Mãpai Samuelpa ma israelitaarãmaa jaranaji jõmaweda Tachi Akꞌõrepa jarada. 11Mãgaji:

—Rey jua ekꞌari nãga pꞌanapataadaitꞌeeda aji. Reypa parã warrarã ũkꞌuru soldaorã papiitꞌee; awaraarã bɨitꞌee caballo ɨ̃rɨ wãdamerã chõode; awaraarã bɨitꞌee ichi carreta naa pꞌira wãdamerã mãikꞌaapa ichi jɨ̃adamerã. 12Ũkꞌuru soldaorã mil poro waibɨa papiitꞌee; awaraarã soldaorã cincuenta poro waibɨa papiitꞌee. Awaraarã bɨitꞌee ichi eujãde mimiadamerã; ne–uudamerã mãikꞌaapa ne–uu chauda ewadamerã. Awaraarã bɨitꞌee metaldee oodamerã arma mãikꞌaapa carreta oodakꞌãri, ne–inaa metaldee ooda aɨde bɨdaitꞌee. 13Parã kꞌaurã jida ataitꞌee kꞌera oodamerã, nechuudamerã mãikꞌaapa pan oodamerã. 14Parã eujã piara bee, uva kꞌãi mãikꞌaapa olivo kꞌãi piara bee ichi–itꞌee atapꞌeda, teeitꞌee poro waibɨarã ichi jua ekꞌari mimiapataarãmaa. 15Parã netꞌa tau ewada mãikꞌaapa uva oroda diezdepema chaa aba ichimaa teepiitꞌee ichi akꞌɨpataarã–itꞌee mãikꞌaapa awaraarã ichi jua ekꞌari mimiapataarã–itꞌee. 16Ichiaba parã mimiapataarã, ɨmɨkꞌĩraarã, wẽraarã paara mãikꞌaapa parã pꞌakꞌa pipɨara bee, burroorã paara ataitꞌee ichi–itꞌee mimiapataadamerã. 17Parã ovejaarã waridadepema diezdepema chaa aba ataitꞌee. Ma awara pãchi jida iru–itꞌee mimiadaitꞌee. 18Mãga pakꞌãri, parãpa rey jɨrɨtꞌeradapꞌedaapa ma jõma oo bɨ kꞌaurepa parãpa Tachi Akꞌõremaa chupɨria iididaitꞌee. Mamĩda irua ũri–e paitꞌeeda aji.

19Samuelpa mãga jaraji mĩda, israelitaarãpa ũri kꞌiniada–e paji. Mapa irumaa nãga jarajida:

—Tai–itꞌee pɨ ũraa maarepida pꞌua–e bɨpɨ. Taipa rey kꞌinia pꞌanɨda ajida, 20awaraa eujãdepemaarãpa iru pꞌanapatakꞌa. Kꞌinia pꞌanɨ reypa tai akꞌɨ bapariimerã mãikꞌaapa tai naa wãpariimerã awaraarã ome chõonadakꞌãri.

21Samuelpa mãga ũripꞌeda, Tachi Akꞌõremaa ma pedee jaraji.

22Mãpai Tachi Akꞌõrepa pꞌanauji:

—Óoji ãchia iidi pꞌanɨkꞌa. Rey bɨpáde aji, ãchi akꞌɨpariimerã.

Mãpai Samuelpa ‘‘pia bɨda’’ apꞌeda, jaraji israelitaarã wãdamerã ãchi pꞌuuru chaa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index