Search form

1 Samuel 9

Saúl Samuel ome unuda

1Maapai eperã bapachi, tꞌɨ̃jarapatapꞌedaa Quis. Mãgɨ́ Benjamín ëreerãdepema paji. Chi akꞌõre Abiel paji. Ma Abiel uchiaji Zerordeepa. Ma Zeror uchiaji Becoratdeepa. Ma Becorat uchiaji Afiadeepa. Awaraarãpa Quis waawee pꞌanapachida ãchi poro waibɨakꞌa unupatapꞌedaa perã. 2Quipa warra kꞌũtrãa kꞌĩra wãree, kꞌapꞌɨa ɨ̃daa iru baji. Tꞌɨ̃jarapachida Saúl. Awaraa israelita irukꞌa wẽ–e paji. Awaraarã jõmaarã kꞌãyaara iru ɨtꞌɨara baji.

3Ewari aba Quis burroorã atuadachida. Mapa irua chi warra, Saulmaa mãgaji:

—Wã́ji tachi burroorã jɨrɨde. Pɨchi ome mimiapari aba ateepáde aji.

4Mãgá Saúl wãji. Wãyaajida ee jẽra bɨmãi Efraín ëreerã eujãde mãikꞌaapa Salisá eujãde. Mamĩda ma burroorã atuadapꞌedaa mama unuda–e paji. Ichiaba wãyaajida Salín eujãde mãikꞌaapa Benjamín ëreerã eujãde. Mamĩda mama ichiaba unuda–e paji. 5Zuf eujãde panadakꞌãri, Saulpa chi mimiaparimaa mãgaji:

—Ãpɨtee wãdáma aji. Maa–e pɨrã mɨ akꞌõre tachi pari audupɨara kꞌĩsia nɨ̃beei, ichi burroorã pari kꞌĩsiai kꞌãyaara.

6Ma mimiaparipa pꞌanauji:

—Tachi Akꞌõre pedee jarapari na pꞌuurude bapari. Jõmaarãpa iru pia akꞌɨpata, irua jara bɨkꞌa ichita pꞌasapari perã. Wãdáma irumaa. Irua jaraiskꞌa chisãgɨ́ ode tachi wãdaipia bɨ.

7Saulpa pꞌanauji:

—Mãgara wãdáma aji. Mamĩda ¿irumaa kꞌãata ateedayama? aji. Tachi mochila anipapatade pan jida wẽe nida. Ne–inaa wẽe pꞌanɨda aji, teedaitꞌee Tachi Akꞌõre pedee jaraparimaa.

8Mãpai ma mimiaparipa mãgaji:

—Mɨa iru bɨ pꞌaratꞌa tau perá gramo õpee paitꞌee bɨ. Mãgɨ́ teeitꞌeeda aji, ma Akꞌõre pedee jaraparimaa, irua tachimaa o akꞌɨpimerã.

9(Chonaarãweda israelitaarãpa Tachi Akꞌõremaa ne–inaa iidi kꞌinia pꞌanadakꞌãri, iidipachida ‘eperãpa ne–inaa pꞌasaitꞌee bɨ unupari’ apatapꞌedaamaa. Ɨ̃rá mãgee eperã Tachi Akꞌõre pedee jaraparida apata.)

10Saulpa ma mimiaparimaa mãgaji:

—Pia bɨpɨ. Wãdáma aji.

Mãpai ãchi omeeweda wãjida ma Akꞌõre pedee jarapari bapariida pꞌuurudee. 11Eede ɨtꞌaa wãrutade ma pꞌuurumaa, awẽraarã ome unujida. Ma awẽraarã pania tꞌɨde wã nipajida. Mãpai mãɨrãmaa iidijida:

—¿Nama bɨkꞌã ajida, ne–inaa pꞌasaitꞌee bɨ unupari?

12Ma awẽraarãpa pꞌanaujida:

—Bɨpɨ. Mamĩda waawipai bɨ. Etꞌewapai pacheji, idi pꞌuurude ne–animalaarã peedapꞌeda, Tachi Akꞌõre–itꞌee paapidaitꞌee perã ee ɨtꞌɨ́ bɨde ne–animalaarã paapatamãi. Isapai wãruta pɨrã, iru ununadayada ajida. 13Pꞌuurude panadakꞌãri, iru jɨrɨ́tɨ nekꞌode wãi naaweda eede ɨtꞌaa, ne–animalaarã Tachi Akꞌõre–itꞌee paapatamaa. Mama iru pana–emãi eperãarã nekꞌoda–e, irua pedee pia jaraitꞌee perã nekꞌodai naaweda. Maapꞌeda chi tꞌɨ̃ pëidaarã nekꞌodai. Mapa isapai wãdapáde ajida, iru unudamerã.

14Aramãgá Saúl ma mimiapari ome pꞌuurudee wãjida. Ará panadakꞌãri, unujida Samuel wãru eede ɨtꞌaa ne–animalaarã paapatamaa.

15Aɨ noreweda, Saúl pai naaweda, Tachi Akꞌõrepa Samuelmaa nãga kꞌawapiji: 16“Nu, nãgɨ́ horade mɨa Benjamín ëreerãdepema aba pɨmaa pëiitꞌeeda aji. Mãgɨ́ awara bɨpáde aji, mɨ pꞌuuru pidaarã akꞌɨpariimerã. Mãgɨpa israelitaarã uchiapiitꞌee filisteorã juadeepa. Mãgá mɨa akꞌɨpiitꞌee wãara ũriji mɨ pꞌuuru pidaarãpa chupɨria iididapꞌedaa.”

17Samuelpa Saúl unukꞌãri, Tachi Akꞌõrepa mãgaji:

—Nãgɨda aji, mɨa eperã jarada. Nãgɨpa mɨ pꞌuuru pidaarã akꞌɨ bapariitꞌeeda aji.

18Saúl pꞌuurude tꞌĩupatamãi panakꞌãri, Samuel kꞌaitꞌa wãpꞌeda, nãga jaraji:

—Mɨ chupɨria kꞌawáaji. Jarapáde aji, sãma bɨ ne–inaa pꞌasaitꞌee bɨ unupari te.

19Samuelpa pꞌanauji:

—Mɨpɨ chi ne–inaa pꞌasaitꞌee bɨ unupari. Mɨ naa eede ɨtꞌaa wã́tɨ ne–animalaarã Tachi Akꞌõre–itꞌee paapatamaa, idi parã mɨ ome nekꞌodaitꞌee perã. Nu mɨa jaraitꞌee pɨa mɨmaa iidi kꞌinia bɨ. Maapꞌeda mɨa parã wãpii. 20Kꞌĩsianáaji pɨ burroorã kꞌãima õpee atua pꞌanɨ unu atadapꞌedaa perã. Awaraarã kꞌãyaara israelitaarãpa pɨ mãikꞌaapa pɨchi akꞌõredeerã piara akꞌɨpataadaitꞌeeda aji.

21Mãpai Saulpa pꞌanauji:

—Mamĩda mɨ Benjamín ëreerãdepema, Israeldeepa uchiadapꞌedaarã ëreerã ma–ãriara bɨdepema. Ma awara Benjamín ëreerãdepemaarãde mɨchideerã ekꞌariara pꞌanɨ awaraa te pidaarã kꞌãyaara. Mãga bɨta, ¿sãapꞌeda pɨa mɨmaa mãga jara bɨma? aji.

22Mãpai Samuelpa Saúl chi mimiapari ome ateeji nekꞌopatamaa. Su–akꞌɨ beepiji tꞌɨ̃ pëidaarã treinta pꞌanadapꞌedaa ome, eperãarã poro waibɨara bɨ su–akꞌɨ beeparimãi.

23Maapꞌeda Samuelpa chi nejooparimaa mãgaji:

—Aneepáde aji, nechiara mɨa jarada awara bɨmerã.

24Aramãgá ma nejooparipa ne–animal makꞌara aba atanapꞌeda, Saulmaa tee cheji. Mãpai Samuelpa mãgaji:

—Jãgɨ́ pɨ–itꞌee awara iru baji. Kꞌopáde aji, mɨa na tꞌɨ̃ pëidaarã tꞌɨ̃da perã pɨ ome aukꞌa nekꞌode chedamerã.

Mãgá ma ewate Saúl nekꞌoji Samuel ome. 25Ma ee ɨtꞌɨa badamãiipa uchiadakꞌãri, pꞌuurude tꞌĩujida. Maapꞌeda Samuel tedepema terrazade Saul–itꞌee kꞌãimerã ooteejida. Mama Samuel Saúl ome pedeeji. 26Maapꞌeda Saúl jẽra beeji mãikꞌaapa kꞌãiji.

Aɨ norema Samuelpa Saúl tꞌɨ̃ji mãikꞌaapa nãga jaraji:

—Pꞌirabáiji mãikꞌaapa pɨchi ode wãpáde aji.

Mãgá Saúl pꞌirabaiji mãikꞌaapa Samuel ome taawaa uchiaji. 27Pꞌuurudeepa uchiadaitꞌee pakꞌãri, Samuelpa Saulmaa mãgaji:

—Pɨ mimiapari naa pë́iji. Mamĩda pɨ, arakꞌatɨa beepáde aji, mɨa jara kꞌinia bairã Tachi Akꞌõrepa mɨmaa jarada.

Mãpai Saúl mimiapari ichi naa wãji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index