Search form

2 Samuel 10

Davidpa amonitaarã mãikꞌaapa siriorã pꞌoyaada

(1 Crónicas 19.1-19)

1Ma tꞌẽepai amonitaarã rey Najás jai–idaaji. Iru pari chi warra Janún rey beeji. 2Davidpa kꞌĩsiaji ma rey Janunpa ichi pia aukꞌa akꞌɨitꞌee iru akꞌõre Najapa pia akꞌɨdakꞌa. Mapa Davidpa poro waibɨarã ichi jua ekꞌari pꞌanadapꞌedaa Janunmaa pëiji jaranadamerã ichi tꞌãri pꞌua nɨ̃bɨ iru akꞌõre jai–idaada kꞌaurepa.

Mamĩda ma eperãarã amonitaarã eujãde panadakꞌãri, 3amonitaarã poro waibɨarãpa ãchi rey Janunmaa mãgajida:

—Rey Waibɨa, ¿pɨa ijãa bɨkꞌã ajida, Davidpa wãara ichi jua ekꞌari pꞌanɨɨrã pëiji jara chedamerã ichi tꞌãri pꞌua nɨ̃bɨ pɨ akꞌõre jai–idaada kꞌaurepa, irua pɨ akꞌõre pia akꞌɨpachi perã? ¡Mãga–epɨ! ¿Ãra pëiji–ekꞌã ajida, tachi pꞌuuru akꞌɨdamerã mãikꞌaapa tꞌẽepai tachi jõtꞌaa chedamerã?

4Janunpa ãchi pedee ijãaji. Mapa jaraji ma poro waibɨarãmaa Davidpa eperãarã pëida jita atadamerã mãikꞌaapa mãɨrã idakꞌara tꞌooma aba wẽtꞌaadamerã kꞌĩra nejasiapidaitꞌee. Ma awara mãɨrã pꞌaru jɨ̃ pꞌanadapꞌedaa jẽkꞌoojida, ãtau taawa pꞌaneedamerã. Tꞌẽepai mãgá ãpɨtee pëijida.

5Davidpa mãga kꞌawaa atakꞌãri, ichia chokꞌapariirã pëiji ma eperãarã kꞌĩra chuunadamerã, ãra audú kꞌĩra nejasia pꞌanadapꞌedaa perã. Jara pëiji Jericó pꞌuurude pꞌaneedamerã ãchi idakꞌara wariruta misa, maapꞌeda ichimaa chedamerã.

6Amonitaarãpa kꞌawaadakꞌãri David ãchi ome kꞌĩrau bɨ, siriorã soldaorã chipꞌe wãjida chõodamerã ãchi eere: Rejob pꞌuurudepema mãikꞌaapa Sobá pꞌuurudepema veinte mil soldaorã jĩte chõo nipapataarã, Macá pꞌuurudepema rey mil soldaorã ome mãikꞌaapa Tob pꞌuurudepema doce mil soldaorã. 7Davidpa mãga kꞌawaa atakꞌãri, Joab israelitaarã soldaorã jõmaarã ome pëiji chõode wãdamerã. 8Ma amonitaarã ãchi pꞌuuru tꞌĩupatade chipꞌedachida. Jõdee ma siriorã Sobá pꞌuurudepema, Rejob pꞌuurudepema mãikꞌaapa Tob pꞌuurudepema soldaorã Macadepema soldaorã ome pꞌuuru taawa pꞌaneejida.

9Joabpa unukꞌãri soldaorã erkꞌa para bee ichi kꞌĩrapite mãikꞌaapa ichi ãpɨte, israelitaarã soldaorã pipɨara bee jɨrɨtꞌeraji chõonadamerã ma siriorã ome. 10Maapꞌeda apema soldaorã bɨji ichi ɨ̃pema Abisay jua ekꞌari, ãchi chõonadamerã ma amonitaarã ome. 11Mãga bɨde Joabpa Abisaymaa mãgaji:

—Jã siriorãpa tai pꞌoyaa wãruta pɨrã, mɨ kꞌaripanáji. Jõdee jã amonitaarãpa parã pꞌoyaa wãruta pɨrã, mɨa pɨ kꞌaripanaitꞌee. 12Kꞌĩsianaapáde aji. Sõcharra chõonadáma tachi pꞌuuru pidaarã pari mãikꞌaapa awaraa pꞌuuru Tachi Akꞌõre jua ekꞌari pꞌanapataarã pari. ¡Tachi Akꞌõrepa ooipia bɨda aji, ichia kꞌĩsia iru bɨkꞌa!

13Joab wãji ichi eere pꞌanadapꞌedaarã ome ma siriorã pꞌanadapꞌedaamaa chõode. Mamĩda mãɨrã iru naa jĩchoodachida. 14Ma amonitaarãpa mãga unudakꞌãri, ãchi ichiaba jĩchookꞌoodachida Abisay eere pꞌanadapꞌedaarã naa mãikꞌaapa tꞌĩukꞌoodachida ãchi pꞌuurude. Maperã Joab israelitaarã soldaorã ome ãpɨtee wãjida Jerusalendee.

15Siriorãpa kꞌawaadakꞌãri israelitaarãpa ãchi pꞌoyaadapꞌedaa, waya chipꞌedachida. 16Rey Hadad Ezerpa jara pëiji siriorã Éufrates to kꞌĩraikꞌa eere pꞌanapatapꞌedaarãpa kꞌaripa chedamerã. Mãgá mãɨrã Jelandee chejida. Ãchi poro waibɨa Sobac paji. Iru rey Hadad Ezer soldaorã jõmaweda poro waibɨa paji.

17Davidpa mãɨrã chipꞌedapꞌedaa kꞌawaa atakꞌãri, ichia israelitaarã soldaorã jõmaweda chipꞌe ataji mãikꞌaapa Jordán to sĩadapꞌeda, panajida Jelande. Mama ma siriorã ome chõomaa pꞌaneejida. 18Mamĩda chõo pꞌanadapꞌeda, ma siriorã jĩchoodachida israelitaarã naa, David eere pꞌanadapꞌedaarãpa peedapꞌedaa perã ãchi eerepema soldaorã cuarenta mil caballode wãdapꞌedaarã mãikꞌaapa setecientos carretade wãdapꞌedaarã. Ma awara siriorã soldaorã poro waibɨa Sobac sudapꞌeda, mama piuji. 19Rey Hadad Ezer eerepema reyrã chipꞌedapꞌedaarãpa mãga kꞌawaa atadakꞌãri, israelitaarã ome waa chõo kꞌiniada–e paji mãikꞌaapa ãra ome pedeejida chõoda–ee pꞌanapataadaitꞌee. Mãgá David jua ekꞌari pꞌaneejida.

Maadakꞌãriipa siriorãpa amonitaarã waa kꞌaripada–e paji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index