Search form

2 Samuel 11

Davidpa pꞌekꞌau kꞌachia ooda

1Kꞌoijara wãyaapꞌeda, reyrã jura chõode uchiapataadakꞌãri, Davidpa pëiji ichi soldaorã poro waibɨa Joab, awaraa poro waibɨarã mãikꞌaapa israelitaarã soldaorã jõmaweda amonitaarã ome chõonadamerã. Mãgá chõonadakꞌãri, amonitaarã jõpi wãjida mãikꞌaapa ãchi pꞌuuru Rabá wapꞌɨra atajida nɨdaitꞌee ma pꞌuurudepemaarã jarra oorutamaa. Mãgá chõo jõnɨde David Jerusalende beeji.

2Ewari aba kꞌewara David ɨ̃i bapꞌeda, ichi camadeepa pꞌirabaiji mãikꞌaapa ichi palaciodepema terrazadee wãji. Mama bɨde mamãikꞌaapa unuji wẽra kꞌĩra wãree kꞌuimaa bɨ. 3Davidpa iru akꞌɨ bapꞌeda, chi mimiapari pëiji iidinamerã kꞌaita ma wẽra. Mãpai chi mimiaparipa jara cheji ma wẽra tꞌɨ̃jarapata Betsabé. Iru Elián kꞌau mãikꞌaapa hitita Urías wẽrada aji. 4Ma wẽra ewaapai bi kꞌayaa wãyaapꞌeda bada perã, kꞌuimaa baji ooitꞌee Tachi Akꞌõre ley pꞌãdade jara bɨkꞌa. Davidpa ma wẽra kꞌĩra wãree unuda perã, atapiji. Aneedakꞌãri, iru ome kꞌãiji. Maapꞌeda Betsabé ichi temaa wãji.

5Ma tꞌẽepai ma wẽra biakꞌoo beeji. Mapa irua Davidmaa mãga jara pëiji. 6Davidpa made kꞌĩsiapꞌeda, Joabmaa jara pëiji ma hitita Urías ichimaa pëimerã ãchi chõo pꞌanadapꞌedaamãiipa. Mãpai Joabpa mãga ooji. 7Urías pakꞌãri, Davidpa iidiji Joab mãikꞌaapa soldaorã pari mãikꞌaapa sãga wãda ãchi chõo pꞌanadapꞌedaa ome.

8Tꞌẽepai Davidpa irumaa jaraji:

—Pɨchi temaa wã́ji mãikꞌaapa bɨɨrɨ sɨɨpáde aji.+

Urías palaciodeepa uchiakꞌãri, reypa irumaa chikꞌo pia tee pëiji. 9Mamĩda Urías ichi temaa wã–e paji. Kꞌãi beeji palacio tꞌĩupatamãi rey te jɨ̃apataarã ome.

10Aɨ norema Davidmaa mãga nepɨrɨdakꞌãri, irua Urías tꞌɨ̃piji mãikꞌaapa iidiji:

—¿Sãapꞌeda pɨchi temaa wã–e pajima? aji. ¿Chõodeepa chepꞌeda, sẽ–e bɨkꞌã? aji.

11Uriapa pꞌanauji:

—Tachi Akꞌõre baaltekꞌa bɨ, Israeldepema soldaorã mãikꞌaapa Judadepema soldaorã te pakꞌuru juadee oodade pꞌanɨ. Ma awara mɨ poro waibɨa, Joab awaraa soldaorã poro waibɨarã ome pꞌuuru taawa kꞌãi pꞌanɨ. Mãga bɨde, pia–e bɨ mɨ wãmerã mɨchi temaa nekꞌode, ne–inaa tode mãikꞌaapa kꞌãide mɨchi wẽra ome. ¡Pɨ chokꞌai bɨde mãga oo–eda! aji.

12Mãpai Davidpa mãgaji:

—Idi atꞌãri béeji. Nu pɨ chõo pꞌanɨmaa pëiitꞌeeda aji.

Mãgá Urías beeji Jerusalende aɨ norema paru misa. 13Ma pꞌãrikꞌua Davidpa Uriamaa jaraji ichi ome nekꞌomerã mãikꞌaapa itꞌua to chemerã. Mãgá itꞌuapa iru piupitꞌaaji. Mamĩda kꞌãinakꞌãri, ichi temaa wãi kꞌãyaara, waya kꞌãinaji rey te jɨ̃apataarã kꞌãipatapꞌedaamãi.

14Aɨ norema Davidpa kꞌartꞌa pꞌãji Joabmaa mãikꞌaapa Urías ome tee pëiji. 15Ma kꞌartꞌade nãga jara baji: “Urías pë́iji naapɨara chõode uchiapataarã ome. Mãpai audú chõomaa pꞌaneedakꞌãri, ituaba atabaibëidapáde aji, amonitaarãpa peetꞌaadamerã.”

16Mãgá Joabpa ichi soldaorã ome amonitaarã pꞌuuru wapꞌɨra atarutade, Urías pëiji amonitaarã soldaorã sõcharra pꞌanadapꞌedaarãmaa. 17Mãpai ma pꞌuurudepemaarã ãra ome chõode uchiadakꞌãri, Israeldepema soldaorã poro waibɨarã ũkꞌuru peekꞌoojida. Ma hitita Urías jida aukꞌa piuji.

18Maapꞌeda Joabpa ma chõodapꞌedaadé Davidmaa jara pëiji. 19Nãga jaraji chi chokꞌa pëiitꞌee badamaa:

—Mɨa jara pëiru jõmaweda reymaa jarakꞌãri, 20rey kꞌĩraudariitꞌee na chõoda atuadapꞌedaa perã mãikꞌaapa iidii: ‘‘¿Sãapꞌeda audú kꞌaitꞌa wãjidama ma pꞌuuru wapꞌɨra atadakꞌãri? ¿Kꞌawada–e pꞌanɨkꞌã ãrapa muralladeepa netꞌaa batꞌapata? 21¿Mãgá ooji–e pajikꞌã ai, Tebes pꞌuuru tꞌɨakꞌau bada muralladeepa wẽrapa Yerubaal warra Abimélec kꞌũrumapa peekꞌãri? ¿Sãapꞌeda audú kꞌaitꞌa wãjidama?’’ ai. Mãga iidiru pɨrã, pɨa nãga pꞌanauipia bɨda aji. ‘‘Ichiaba piuji pɨ jua ekꞌari mimia bada, ma hitita Urías.’’

22Mãpai ma chokꞌa pëida Davidmaa wãji. Panakꞌãri, jõma jaraji Joabpa jarapidakꞌa.

23Mãpai ma jara chedapa mãgaji:

—Soldaorã chokꞌara pꞌuurudeepa chedapꞌedaarãpa tai pꞌoyaa wãjidada aji. Mamĩda chõo jõnɨpa taipa ãchi wãpijida ãchi pꞌuuru tꞌĩupatadee. 24Rey Waibɨa, mãga nɨde, murallade pꞌanadapꞌedaarãpa ematrɨma trɨmaa pꞌaneejida pɨ soldaorãmaa. Mãgá tai poro waibɨarã ũkꞌuru piujida, hitita Urías paara.

25Davidpa mãga ũrikꞌãri, pꞌanauji:

—Joabmaa jaráji audú kꞌĩsianaamerã ma soldaorã piudapꞌedaa kꞌaurepa. Mãga pꞌasapari jura chõodakꞌãri. Ma awara jaráji ma pꞌuurudepemaarã ome chõodamerã ãra jõrutamaa. Irumaa pedee pia jarapáde aji, tꞌãri o–ĩ–ĩa beemerã.

26Ma tꞌẽepai Urías wẽrapa kꞌawaa atakꞌãri chi ɨmɨkꞌĩra piuda, iru–itꞌee chi–ɨaji. 27Iru chi–ɨada tꞌẽepai Davidpa ichi palaciode aneepiji. Mãgá ichi wẽra papiji. Ma wẽra ome warra ooji. Mamĩda Tachi Akꞌõrepa David pia akꞌɨ–e paji, irua mãgá kꞌachia ooda kꞌaurepa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index