Search form

2 Samuel 12

Tachi Akꞌõre pedee jarapari Natanpa Davidmaa jarada

1Tachi Akꞌõre David ome kꞌĩrau bada perã, ichi pedee jarapari Natán pëiji Davidmaa.

Natán David kꞌĩrapite panakꞌãri, nãga nepɨrɨji:

—Pꞌuuru abaade eperã omé pꞌanapachida. Aba pꞌaratꞌara bapachi; jõdee chi apema chupɨria bapachi. 2Ma pꞌaratꞌara bɨpa oveja mãikꞌaapa pꞌakꞌa chokꞌara iru baji. 3Mamĩda ma chupɨria chɨpa oveja wẽra chakꞌe a–pai iru baji. Ma oveja chakꞌe neto atapꞌeda, aukꞌa wari wãji ichi warrarã ome. Ichi chikꞌo kꞌorudepema kꞌopipachi mãikꞌaapa ichi vasode topipachi. Ma awara ma oveja chakꞌe ichi ikꞌaawa kꞌãipipachi. Kꞌinia iru bapachi ichi kꞌaukꞌa. 4Ewari aba awaraa eperã pꞌasia cheji ma pꞌaratꞌara bɨmaa. Mamĩda ma pꞌaratꞌara badapa ichi ne–animal pee kꞌinia–e paji kꞌopiitꞌee ma pꞌasia chedamaa. Ma kꞌãyaara ma chupɨria chɨ oveja wẽra chakꞌe jãri atapꞌeda, peeji kꞌopiitꞌee ma pꞌasia chedamaa.

5Davidpa mãga ũrikꞌãri, audú kꞌĩraudachi ma pꞌaratꞌara bɨpa mãga ooda perã mãikꞌaapa Natanmaa mãgaji:

—Tachi Akꞌõre kꞌĩrapite mɨa juraa bɨ: ¡Chi mãga ooda piuipia bɨda! aji. 6¡Ma awara ma oveja peeda pari waa kꞌĩmari teeipia bɨda aji, chiparimaa, iru chupɨria kꞌawa–e pada perã!

7Mãpai Natanpa Davidmaa mãgaji:

—¡Pɨda aji, ma pꞌaratꞌara bɨ! Israelitaarã Akꞌõre Waibɨapa pɨmaa nãga jara bɨ: ‘‘Mɨa pɨ jɨrɨtꞌeraji israelitaarã rey pamerã mãikꞌaapa pɨ Saúl juadeepa uchiapipachi. 8Iru pɨ poro waibɨa paji mĩda, mɨa pɨmaa iru palacio mãikꞌaapa iru wẽraarã teeji. Ma awara mɨa israelitaarã mãikꞌaapa Judá ëreerãdepemaarã pɨ jua ekꞌari bɨji. Pɨ–itꞌee atꞌãri faltada paara, mɨa pɨmaa netꞌaa chokꞌaraara teekꞌaji. 9¿Sãapꞌeda oojima ne–inaa audú kꞌachia bɨ, pɨa hitita Urías amonitaarãmaa peepikꞌãri iru wẽra pɨchi–itꞌee ataitꞌee? ¿Sãapꞌeda mɨ ley mãgá yiaraa iru bajima? aji. 10Mãgá pɨa mɨ yiaraa iru bada perã ma hitita Urías wẽra atakꞌãri pɨchi wẽra papiitꞌee, pɨchideerã ũkꞌuru ichita piu kꞌachia piudaitꞌee. 11Mɨ, Jõmaarã Akꞌõre Waibɨapa nãga jara bɨ: ‘Pɨchideerãpa pɨmaa ne–inaa kꞌachia oodaitꞌee, mɨa ãramaa mãga oopiitꞌee perã. Pɨ kꞌĩrapite mɨa pɨchi wẽraarã jãri ataitꞌee mãikꞌaapa teeitꞌee awaraa israelitamaa. Ãstaawa, awaraarã taide mãgɨ́ pɨ wẽraarã ome kꞌãiitꞌee. 12Pɨa ma kꞌachia ookꞌãri, merã ooji. Mamĩda mɨa pɨmaa ma kꞌachia ooitꞌeeda aji, ãstaawa, israelitaarã taide.’ ”

13Davidpa mãga ũrikꞌãri, Natanmaa nãga jaraji:

—¡Tachi Akꞌõre kꞌĩrapite mɨa pꞌekꞌau kꞌachia oojida! aji.

Natanpa pꞌanauji:

—Tachi Akꞌõrepa pɨa pꞌekꞌau kꞌachia ooda ãyaa bɨji. Ma kꞌaurepa pɨ piu–eda aji. 14Mamĩda pɨ warra ewaa tꞌoda jai–idaaitꞌeeda aji, pɨa mãgá Tachi Akꞌõre kꞌĩrapite ma kꞌachia ooda perã.

15Natanpa mãga jarapꞌeda, ichi temaa wãji. Ma tꞌẽepai Tachi Akꞌõrepa kꞌayaapiji ma warra chai Davidpa ooda Urías wẽra ome. Mãgá ma warra chai juakꞌaya nɨ̃beeji. 16Mãga bɨde Davidpa Tachi Akꞌõremaa chupɨria iidipachi chi warra chai pari. Nekꞌokꞌaa paji mãikꞌaapa tꞌãri pꞌuapa pꞌãrikꞌua te jãde jẽra beepachi. 17Iru mimiapataarã poro waibɨarãpa enenee jõnajida iru pꞌirabaimerã. Mamĩda irua mãga oo kꞌiniakꞌaa paji. Ichiaba ãra ome nekꞌokꞌaa paji.

18Kꞌãima siete wãyaapꞌeda, chi warra chai jai–idaaji. David mimiapataarã poro waibɨarãpa waawee pꞌanajida irumaa jaradaitꞌee, audú tꞌãri pꞌua nɨ̃beei jĩakꞌaapa. Kꞌĩsiajida: “Chi warra atꞌãri chokꞌai bɨde, irua tachi pedee ũri kꞌiniakꞌaa paji pɨrã, ɨ̃rá ¿sãgá jaradaima chi warra jai–idaada? ¡Kꞌawada–e kꞌãare ne–inaa irua pariatua ooi!”

19Mamĩda Davidpa unukꞌãri ãchi o sausauwaa pedeemaa pꞌanɨ, kꞌawaaji chi warra chai jai–idaada. Mapa ãchimaa iidiji:

—¿Warra chai jai–idaajikꞌã? aji.

Ãchia pꞌanaujida:

—Jai–idaajida ajida.

20Mãpai David te jãdeepa pꞌirabaidachi. Kꞌuipꞌeda, kꞌera pꞌuruji, pꞌaru pia jɨ̃ beeji mãikꞌaapa tꞌĩuji Tachi Akꞌõre ome unupata tede ɨtꞌaa tꞌɨ̃itꞌee. Tꞌẽepai, ichi temaa wãji mãikꞌaapa chikꞌo iidiji. Mãpai nekꞌoji.

21Iru ekꞌari beerãpa mãga unudakꞌãri, irumaa iidijida:

—Rey Waibɨa, ¿pɨa kꞌãata oomaa bɨma? ajida. Pɨ warra chai atꞌãri chokꞌai bakꞌãri, pɨ nekꞌokꞌaa paji mãikꞌaapa iru–itꞌee jẽepachi. Mamĩda ɨ̃rá iru jai–idaakꞌãri, ¡pɨ pꞌirabaiji mãikꞌaapa nekꞌoji!

22Davidpa pꞌanauji:

—Mɨ warra chokꞌai bakꞌãri, mɨ nekꞌokꞌaa paji mãikꞌaapa jẽepachi, kꞌĩsia bada perã Tachi Akꞌõrepa mɨ chupɨria kꞌawaai mãikꞌaapa mɨ warra chokꞌai bɨi. 23Mamĩda ɨ̃rá iru jai–idaa bairã, ¿kꞌãare–itꞌee mɨ nekꞌo–ee baima? Mãga oo bɨpa mɨa iru pꞌoyaa chokꞌaipi–e. Mɨ iru bɨmaa wãitꞌee. Mamĩda iru waa che–eda aji, mɨ ome bade.

Salomón tꞌoda

24Chi warra jai–idaada tꞌẽepai, Davidpa chi wẽra Betsabé tꞌãri o–ĩ–ĩapiji. Ma tꞌẽepai iru ome kꞌãiji. Maapꞌeda irua ɨmɨkꞌĩra warra tꞌoji. Davidpa tꞌɨ̃ bɨji Salomón.+ Tachi Akꞌõrepa ma warra kꞌinia iru baji. 25Mãga jara pëiji Davidmaa iru pedee jarapari, Natán kꞌapꞌɨa. Mãpai Davidpa ma warra chai ichiaba tꞌɨ̃ bɨji Jedidías. +

Davidpa amonitaarã pꞌuuru waibɨa Rabá pꞌoyaada

(1 Crónicas 20.1-3)

26Maapai Joab chõomaa baji amonitaarã pꞌuuru waibɨa Rabade. Mãpema rey baparimãi murallapa tꞌɨakꞌau bada pꞌoyaakꞌãri, 27Joabpa ichia chokꞌapariirã Davidmaa pëiji nãga jaradamerã: “Mɨ Rabá pꞌuurudepemaarã ome chõomaa bɨde ãchi rey baparimãi mãikꞌaapa ãchi pania tꞌɨpatamãi jãri atajida aji. 28Maperã Mɨchi Rey Waibɨa, soldaorã awaraarã chipꞌe atapꞌeda, na pꞌuurudepemaarã ome chõo chétɨ mãikꞌaapa ãchi pꞌuuru jãri atátɨ. Maa–e pɨrã mɨata na pꞌuuru pꞌoyaaitꞌee mãikꞌaapa mɨchi tꞌɨ̃ta na pꞌuurude bɨyada” aji.

29Aramãgá Davidpa ichi soldaorã chipꞌe ataji mãikꞌaapa Rabá pꞌuurudee wãji. Ma pꞌuurudepemaarã ome chõonadapꞌeda, pꞌoyaajida. 30Mãpai ma pꞌuurudepema rey poro jɨ̃ra jãri atadapꞌeda, David porode jɨ̃ bɨjida. Ma poro jɨ̃ra nẽedee ooda paji. Mãu pi–ia iru baji mãikꞌaapa chi chɨkꞌɨa treinta y tres kilo baji. Ma awara Davidpa pꞌe ataji ne–inaa pia chokꞌara ma pꞌuurude unudapꞌedaa. 31Eperãarã atꞌãri ma pꞌuurude pꞌaneedapꞌedaarã mamãikꞌaapa ãyaa ateedapꞌeda, mimiapijida serruchopa, jãitꞌepa mãikꞌaapa chaarapa. Ichiaba mãɨrãmaa ladrillo oopijida. Mãga oojida amonitaarã pꞌuuru pꞌoyaadapꞌedaa chaa. Amonitaarã pꞌoyaadapꞌeda, David ichi soldaorã ome waya Jerusalendee wãji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index