Search form

2 Samuel 13

David warra Amnonpa kꞌachia ooda

1David warra Absalonpa ɨ̃pewẽra kꞌĩra wãree iru baji. Mãgɨ́ awẽra tꞌɨ̃jarapachida Tamar. David warra naapema Amnón ãchi ɨ̃pema paji ãchi akꞌõre David eereepa. Ma Amnonpa Tamar kꞌinia baji. 2Mamĩda Tamar waide ɨmɨkꞌĩra ome kꞌãi–e bada perã, iru pia akꞌɨpachida. Maperã Amnonpa iru pꞌoyaa ata–e paji mãikꞌaapa irude audú kꞌĩsia nɨ̃bɨpa Amnón kꞌayaadachi. 3Maapai Amnonpa kꞌõpꞌãyo aba iru baji; tꞌɨ̃jarapatapꞌedaa Jonadab. Mãgɨ́ David ɨ̃pema Simá warra paji. Jonadab ikꞌawaa baji.

4Ewari aba Jonadabpa Amnonmaa iidiji:

—Rey warra, ¿sãga nɨ̃bɨma? aji. ¿Sãapꞌeda ewari chaa pɨ kꞌĩra pia–eera baparima? ¿Mɨmaa jara–ekꞌã? aji.

Amnonpa pꞌanauji:

—Mɨ ɨ̃pema Absalón ɨ̃pewẽra Tamar mɨchi–itꞌee kꞌinia bɨda aji.

5Mãpai Jonadabpa nãga ũraaji:

—Camade kꞌayaa pɨkꞌa beepáde aji. Mãpai pɨ akꞌõrepa pɨ akꞌɨ chekꞌãri, chupɨria iidíji pɨ ɨ̃pewẽra Tamar pëimerã pɨ kꞌaripade. Ma awara jaráji chi awẽrapa chikꞌo pia chuumerã pɨ kꞌĩrapite mãikꞌaapa pɨmaa tawamerã. “Irua mɨmaa chikꞌo teeruta kꞌoitꞌeeda” apáde aji.

6Mãgá Amnón ichi camade kꞌayaa pɨkꞌa jẽra beeji.

Mãpai reypa akꞌɨnakꞌãri, Amnonpa mãgaji:

—Mɨ chupɨria kꞌawaapáde aji. Mɨa kꞌinia bɨ mɨ ɨ̃pewẽra Tamar chemerã mɨ kꞌĩrapite pan omé oode mãikꞌaapa iruata ma pan mɨmaa teemerã.

7Mãpai Davidpa Tamarmaa jara pëiji ichi kꞌĩrapite chemerã. Pakꞌãri, mãgaji:

—Chupɨria kꞌawáaji mãikꞌaapa wãpáde aji, pɨ ɨ̃pema Amnón temaa nejoode iru–itꞌee.

8Aramãgá Tamar chi ɨ̃pema Amnón temaa wãji. Ará panakꞌãri, ununaji Amnón ichi camade jẽra bɨ. Mãpai Tamarpa iru kꞌĩrapite pan masa oopꞌeda, pan ɨ̃pɨmaa beeji. 9Chi pan aupakꞌãri, Tamarpa pꞌaratꞌude pꞌe atapꞌeda, Amnonmaa teeji. Mamĩda irua kꞌo kꞌinia–e paji. Mãpai Amnonpa jaraji mimiapataarã arii pꞌanadapꞌedaa jõmaweda taawaa wãdamerã.

10Ituaba pꞌaneedakꞌãri, irua Tamarmaa mãgaji:

—Ma pan mɨ jẽra bɨmaa aneepáde aji, mãikꞌaapa pɨchi juapa mɨmaa kꞌopi chepáde aji.

Aramãgá Tamarpa ma pan ateeji Amnón badamaa.

11Mamĩda iru kꞌaitꞌa pakꞌãri ma pan kꞌopiitꞌee, Amnonpa iru jita ataji mãikꞌaapa mãgaji:

—Ɨ̃pewẽra, mɨ ome kꞌãipáde aji.

12Tamarpa pꞌanauji:

—¡Mɨchi ɨ̃pema, mɨa mãga oo–epɨ! Mɨ kꞌĩra nejasiapináaji. Israel eujãde mãgá oodakꞌaapɨ. ¡Mãgee ne–inaa kꞌachia oonaapáde! aji. 13Pɨa mãga ooru pɨrã, ¿mɨa sãgá kꞌĩra nejasia chooyama? aji. Ma awara jõmaarãpa pɨ ãpɨte kꞌachia pedeedayada aji, kꞌĩsia kꞌawa–ee bɨ ãpɨte pedeepatakꞌa. Mɨa chupɨria iidi bɨ pɨ rey ome pedeemerã. Irua tachi miakꞌãipiyada aji.

14Mamĩda Amnonpa ũri kꞌinia–e paji. Iru Tamar kꞌãyaara juataura bada perã, iru jita atapꞌeda, kꞌiniaamaa bɨde iru ome kꞌãiji. 15Mamĩda mãga ooda tꞌẽepai, Amnonpa Tamar kꞌĩra unuamaa iru beeji. Audupɨara kꞌĩra unuamaa iru baji naawedapema kꞌinia iru bada kꞌãyaara. Mapa mãgaji:

—Pꞌirabáiji mãikꞌaapa wãpáde aji.

16Mamĩda Tamarpa pꞌanauji:

—¡Mɨchi ɨ̃pema, namãikꞌaapa mɨ jërenaapáde! aji. ¡Mãga ooru pɨrã, audupɨara kꞌachia ooitꞌeeda aji, pɨa mɨ ome ooda kꞌãyaara!

Mamĩda Amnonpa ũri kꞌinia–e paji. 17Ma kꞌãyaara ichi mimiapari tꞌɨ̃ atapꞌeda, mãgaji:

—¡Na wẽra namãikꞌaapa taawaa jëretꞌáaji! ¡Maapꞌeda puerta pia jɨ̃a bɨpáde! aji.

18Aramãgá ma mimiaparipa tedeepa taawaa jëretꞌaaji. Maapꞌeda chi puerta pia jɨ̃a bɨji. Tamar pꞌaru teesoo pia jɨ̃ baji, rey kꞌaurã miakꞌãida–e pꞌanɨɨrãpa ichita mãgee pꞌaru jɨ̃patapꞌedaa perã. 19Tamar ma tedeepa uchiakꞌãri, itꞌabarre pꞌora ɨtꞌaa pꞌoji ichi poro ɨ̃rɨ mãikꞌaapa ma pꞌaru pia jɨ̃ bada jẽtꞌaaji, ma awara ichi jua poro ɨ̃rɨ atapꞌeda, ode jẽe wãji.

20Chi ɨ̃pema Absalonpa iru mãgá unukꞌãri, iidiji:

—¿Pɨ ɨ̃pema Amnónpata pɨ nãga oojikꞌã? aji. Mɨchi ɨ̃pewẽra, maarepida jaranáaji, iru pɨ ɨ̃pema perã. Audú kꞌĩsianaapáde aji, ma pꞌasadade.

Mãgá Tamar chi ɨ̃pema Absalón tede beeji, Amnonpa iru kꞌinia–e pada perã.

21Rey Davidpa ma pꞌasada kꞌawaa atakꞌãri, audú kꞌĩraudachi. Mamĩda Amnón miapi–e paji, chi warra naapema pada perã mãikꞌaapa iru audú kꞌinia iru bada perã. 22Amnonpa mãga ooji mĩda, Absalonpa irumaa maarepida jara–e paji. Mamĩda ichi tꞌãridepai Amnón kꞌĩra unuamaa iru beeji chi ɨ̃pewẽra ome mãga ooda perã.

Absalón kꞌĩra jõ–ee bada Amnón ome

23Año omé wãyaapꞌeda, Absalón mimiapataarãpa ichi ovejaarã kꞌara tꞌɨɨmaa pꞌanajida Baal Jazorde, Efraindeepa uchiadapꞌedaarã eujã kꞌaitꞌa. Mama pꞌanɨde Absalonpa fiesta ooji. Mapa rey warrarã jõmaweda tꞌɨ̃ pëiji.

24Ma awara ichi akꞌõre, rey Davidmaa wãji mãikꞌaapa mãgaji:

—Mɨchi Rey Waibɨa, mɨ pɨ mimiapari. Mɨ mimiapataarãpa mɨ ovejaarã kꞌara tꞌɨɨmaa pꞌanɨda aji. Fiesta oodaitꞌee. Mapa Mɨchi Rey Waibɨa, mɨa kꞌinia bɨ pɨ, poro waibɨarã pɨ jua ekꞌari beerã ome chedamerã.

25Mamĩda Davidpa pꞌanauji;

—Warra, tai jõmaweda pꞌoyaa wãda–eda aji, pɨ–itꞌee audú ɨ̃pɨa baitꞌee perã jõmaweda wãruta pɨrã.

Absalonpa audú edekꞌaji mĩda, rey wã kꞌinia–e paji. Jĩpꞌa Absalonmaa pedee pia jaraji.

26Mãpai Absalonpa mãgaji:

—Mɨchi Rey Waibɨa, pɨ wã–e perã, ¿sãapꞌeda mɨ ɨ̃pema Amnón pëi–ema? aji.

Mãpai reypa iidiji:

—¿Sãapꞌeda kꞌinia bɨma aji, Amnón pɨ ome wãmerã?

27Mamĩda Absalonpa audú mãga jara nɨ̃bɨpa, reypa pëiji Amnón, chi warrarã awaraarã paara Absalón ome.

Aɨ naaweda Absalonpa chikꞌo pia joopiji rey mesade iru pꞌanapatakꞌa. 28Mãga nɨde ichi mimiapataarãmaa jaraji:

—Amnón pia akꞌɨdapáde aji. Vinopa piu wãkꞌãri, mɨa jaraitꞌee peedamerã. Waawee–ee mãga óotɨ, mɨata mãga oopi bairã. Sõcharra pꞌanadapáde aji.

29Absalonpa jaradakꞌa chi mimiapataarãpa Amnón peetꞌaajida. Mãpai apemaarã rey warrarã ãchi mulade bataudapꞌeda, jĩchoodachida.

30Ãra atꞌãri ode wãdade eperãarãpa Davidmaa pariatua nepɨrɨnajida Absalonpa iru warrarã jõmaweda peekꞌooda. 31Davidpa mãga ũrikꞌãri, chi pꞌaru jẽtꞌaaji mãikꞌaapa tꞌãri pꞌuapa te jãde jẽra beeji. Ichi akꞌɨpataarã arii pꞌanadapꞌedaarãpa ichiaba ãchi pꞌaru jẽtꞌaajida.

32Mamĩda David ɨ̃pema Simá warra Jonadabpa Davidmaa mãgaji:

—Rey Waibɨa, kꞌĩsianáaji pɨ warrarã jõmaweda peedapꞌedaa. Amnón aupai peejida. Absalonpa iru mãgá peetꞌaaitꞌee kꞌĩsia iru baji, chi ɨ̃pewẽra Tamarmaa kꞌachia oodakꞌãriipa. 33Maperã Rey Waibɨa, ijãanáaji pɨ warrarã jõmaweda piujida. Amnón aupaita piujida aji.

34Absalón jirabodoru misa ma fiesta oo pꞌanadapꞌedaamãiipa, kꞌũtrãa rey jɨ̃a badapa unuji eperãarã cheruta Joronayin ode; ma o ee bide bɨ. Mãga unukꞌãri, ma jɨ̃aparipa reymaa jaranaji.

35Mãpai Jonadabpa reymaa mãgaji:

—Rey Waibɨa, pɨ warrarã cherutada aji, mɨ, pɨ mimiaparipa jaradakꞌa.

36Jonadab pedee aupakꞌãri, rey warrarã pachejida. Jẽe chejida ãchi ɨ̃pema piuda–itꞌee. Rey chi akꞌɨpataarã ome aukꞌa audú jẽejida.

37-38Mãɨmisa Absalón jirabodoji Amiud warra rey Talmay bɨmaa Guesur eujãde. Mama beeji año õpee. Ewari chaa David jẽepachi chi warra Amnon–itꞌee. 39Mamĩda mãgá chi–ɨa bapꞌeda, tꞌãri o–ĩ–ĩa beekꞌãri, chi warra Absalón unu kꞌinia nɨ̃beeji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index