Search form

2 Samuel 17

Husaypa David ichi eere pꞌanadapꞌedaarã ome kꞌaripada

1Maapꞌeda Ajitofelpa Absalonmaa nãga jaraji:

—Mɨmaa soldaorã doce mil jɨrɨtꞌerapipáde aji, na pꞌãrikꞌuaweda wãdamerã David jɨrɨde. 2Iru juatau wẽe beekꞌãri mãikꞌaapa sẽ bakꞌãri, iru ɨ̃rɨ wãdaitꞌee. Mãga oodakꞌãri, iru ome nipapataarã jĩchoodai pꞌera jõnɨpa. Iru aupai peetꞌaadai. 3Ma tꞌẽepai mɨa iru eere pꞌanɨɨrã pɨmaa aneeitꞌee. Wẽra ewaa miakꞌãi bɨ ichi kꞌima bɨmãi cheparikꞌa, mãga pɨkꞌa ãra chedaitꞌee. Mãgá eperã aba, pɨa jɨrɨ bɨtapai, piuitꞌee. Apemaarã chokꞌai uchiadayada aji.

4Absalonpa mãikꞌaapa israelitaarã poro waibɨarãpa Ajitofel pedee ijãajida. 5Mamĩda Absalonpa arquita Husay tꞌɨ̃piji, iru ũraa ichiaba ũri kꞌinia bada perã.

6Husay iru kꞌĩrapite pachekꞌãri, Absalonpa iidiji:

—¿Ajitofelpa mɨmaa ũraadakꞌa oodaipia bɨkꞌã? aji. ¿Pɨa kꞌãata kꞌĩsia bɨma? aji.

7Husaypa pꞌanauji:

—Irua ũraa pia jarapari mĩda, etꞌewa ũraada pia–e bɨda aji. 8Pɨa kꞌawa bɨ pɨ akꞌõre ichi soldaorã ome sõcharra pꞌanapata. Ɨ̃rá ãra kꞌĩrau pꞌanɨ, oso wẽra chi warrarã jãri atadakꞌãri, kꞌĩrau baparikꞌa. Ma awara pɨ akꞌõre jura chõoyaa bapari. Iru awaraarã kꞌãipatamãi kꞌãi–e paitꞌeepɨ. 9¿Na hora iru miru bɨ–ekꞌã mãu tede wa awara ãi? Ma awara iru eere pꞌanɨɨrãpa pɨchi soldaorã ɨ̃rɨ naapɨara chõode uchiaruta pɨrã, eperãarãpa jaradai: ‘‘Absalón soldaorã peekꞌoojidada’’ adai. 10Mãpai pɨ soldaorã sõcharra pꞌanɨ pɨjida mãikꞌaapa leonkꞌa waaweeda–ee pꞌanɨ pɨjida, pꞌerakꞌoodaitꞌee. Israelitaarã jõmaarãpa kꞌawa pꞌanɨ pɨ akꞌõre chõo kꞌawaa bapari mãikꞌaapa ichi eere pꞌanɨɨrã sõcharra pꞌanɨ.

11’Maperã mɨa nãga ũraa bɨ: Rey Waibɨa, israelitaarã jõmaweda chipꞌe atáji Dan pꞌuurudeepa Berseba pꞌuurude parumaa. Cho–kꞌara pꞌanadaitꞌee ipu tau nãusaa cho–kꞌara paraaparikꞌa pꞌusa ide. Rey Waibɨa, pɨchi kꞌapꞌɨakꞌɨta ãra naa wãipia bɨda aji. 12Mãgá tai pɨ akꞌõre ome chõonadai iru bɨmãi. Iru ɨ̃rɨ wãdaitꞌee sereno eujã ɨ̃rɨ baaiparikꞌa. Iru soldaorã jõmaweda peekꞌoodaitꞌee, iru paara. 13Iru pꞌuuru murallapa tꞌɨakꞌau bɨde mirudaru pɨrã, tachi israelitaarã jõmaarãpa jɨ̃kꞌara ateedaitꞌee mãikꞌaapa ma muralladepema mãu aba–abaa ãyaa pꞌe atadapꞌeda, to chakꞌede batꞌatꞌaadaitꞌee jõtꞌaarutamaa. Mãgá mãu apida mama bee–e pakꞌãri, ãra pꞌoyaadaitꞌeeda aji.

14Absalonpa mãikꞌaapa awaraa israelitaarãpa mãgajida:

—Arquita Husaypa ũraada piara bɨda ajida, Ajitofelpa ũraada kꞌãyaara.

Tachi Akꞌõrepa ãramaa mãga kꞌĩsiapiji oonaadamerã Ajitofel ũraa piara bada jaradakꞌa. Ichia mãga ooji Absalón jõpiitꞌee bada perã.

15Ma tꞌẽepai Husaypa pꞌaareerã Sadocmaa mãikꞌaapa Abiatarmaa jaranaji Ajitofelpa ũraada Absalonmaa mãikꞌaapa israelitaarã poro waibɨarãmaa. Ichiaba ichia ũraada jaraji. 16Ma awara mãgaji:

—Isapai Davidmaa nãga jara pë́itɨ: “Rey Waibɨa, na pꞌãrikꞌua beenáaji eujã pania wẽe bɨdepema eujã jewedaade. Ma kꞌãyaara isapai Jordán to sĩanáji Absalón eere pꞌanɨɨrãpa apida peenaadamerã.’’

17Ma pꞌaareerã warrarã Jonatán mãikꞌaapa Ajimaz Enroguel pania poátrɨ uchia badamãi pꞌanajida, pꞌuuru pidaarãpa ãra ununaadamerã. Mapa ma pꞌaareerãpa wẽra ãchi–itꞌee mimiapari bada pëijida ma kꞌũtrãarãmaa Husaypa nepɨrɨda isapai Davidmaa jaranadamerã. 18Mamĩda awaraa kꞌũtrãapa ãra uchia wãda unuji mãikꞌaapa Absalonmaa jaranaji. Maperã Jonatán mãikꞌaapa Ajimaz isapai wãdapꞌeda, panajida Bajurín pꞌuurude. Mãpema eperã te ãukꞌidaa pozo badade tꞌĩudachida. 19Tꞌẽepai ma te chipari wẽrapa ma pozo wãkꞌa nɨ̃bɨji mãikꞌaapa aɨ ɨ̃rɨ trigo tau pꞌe jẽra bɨji. Mãgá apidaapa ãra mama miru pꞌanɨ kꞌawada–e pai.

20Absalón eere pꞌanadapꞌedaarã ma eperã tede pachedakꞌãri, chi wẽramaa iidijida:

—¿Sãma pꞌanɨma ajida, Ajimaz mãikꞌaapa Jonatán?

Ma wẽrapa pꞌanauji:

—Nama wãyaajidada aji. Toidaa wãpari ode wãjidada aji.

Mãpai ma Absalón eere pꞌanadapꞌedaarã wãjida ãra jɨrɨde. Mamĩda unuda–e pakꞌãri, ãpɨtee wãjida Jerusalendee. 21Ãra wãdapꞌedaa tꞌẽepai, Jonatán Ajimaz ome ma pozodeepa uchiajida mãikꞌaapa isapai pꞌira wãjida rey Davidmaa jarade. Ará panadakꞌãri, nãga jarajida:

—Isapai to sĩ́atɨ, Ajitofelpa ũraada perã Absalón eere pꞌanɨɨrã parã ome chõo chedamerã.

22Aramãgá David mãikꞌaapa ichi eere pꞌanadapꞌedaarã jõmaweda isapai Jordán to sĩajida. Aɨ norema tapꞌeweda apida wẽ–e paji ãra pꞌanadapꞌedaamãi.

23Ajitofelpa kꞌawaakꞌãri ichia ũraadakꞌa ooda–e padapꞌedaa, ichi burro atapꞌeda, ichi pꞌuuru tꞌodamaa wãji. Ichi temãi panakꞌãri, jara bëiji ichi netꞌaa pia jɨ̃a kꞌawaadamerã. Maapꞌeda ichi otaude jɨ̃kꞌarapa jɨ̃ nɨ̃bɨpꞌeda, ɨ̃yapa jɨ̃a piudachi. Mãgá ichi juadoopa piupꞌeda, ɨajida chi akꞌõre ɨadapꞌedaamãi.

David Majanayin pꞌuurude

24Absalón israelitaarã ome Jordán to sĩa wãruta misa, David ichi eere pꞌanadapꞌedaarã ome Majanayin pꞌuurude panajida. 25(Aɨ naaweda Absalonpa Amasá bɨji Joab pari ichi soldaorã poro waibɨa pamerã. Amasá Israeldeepa uchiada Itrá warra paji. Chi nawe Najás kꞌau Abigaíl paji. Mãgɨ́ Joab nawe Sarvia ɨ̃pewẽra paji.) 26Mãgá David tꞌẽe wãdade Absalonpa israelitaarã ichi eere pꞌanadapꞌedaarã ome ãchi carpa eebai jira bɨjida Galaad eujãde.

27David mãikꞌaapa ichi ome nipadapꞌedaarã Majanayin pꞌuurude panadakꞌãri, nãgɨ́ eperãarã uchiajida iru ome unude: amonitaarã pꞌuuru Rabadepema Najás warra Sobí; Lo Debar pꞌuurudepema Amiel warra Maquir mãikꞌaapa Galaad eujãde bada Roguelín pꞌuurudepema Barzilay. 28Mãɨrãpa aneejida joipꞌarukꞌa bee poroba ome, kꞌuuru metaldee ooda mãikꞌaapa yoorodee ooda; trigo tau, cebada tau, harina, netꞌa tau paada, haba, lenteja, 29miéle, cuajada mãikꞌaapa queso ooda pꞌakꞌa jubadee wa oveja jubadee. Ma jõma aneejida Davidpa mãikꞌaapa ichi ome nipadapꞌedaarãpa kꞌodamerã. Kꞌĩsiajida eujã pania wẽe bɨdeepa chedapꞌedaa perã, sẽ pꞌanɨ, jarrapa pꞌanɨ mãikꞌaapa opisia pꞌanɨ.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index