Search form

2 Samuel 2

David Judá ëreerã eujãde rey bɨdapꞌedaa

1Ma tꞌẽepai Davidpa Tachi Akꞌõremaa nãga iidiji:

—¿Wãipia bɨkꞌã aji, Judá eujãdepema pꞌuuru apidaadee?

Tachi Akꞌõrepa pꞌanauji:

—Wãipia bɨda aji.

Mãpai Davidpa iidiji:

—¿Chisãgɨ́ pꞌuurudee wãipia bɨma? aji.

Tachi Akꞌõrepa pꞌanauji:

—Hebrón pꞌuurudee wãipia bɨda aji.

2Mãpai David mamaa wãji chi wẽraarã omé ome; Jezreldepema Ajinoán mãikꞌaapa Carmeldepema Nabal wẽra pada Abigaíl. 3Ichiaba ateeji ichi ome nipapatapꞌedaarã ãchideerã ome. Pꞌananajida Hebrón pꞌuurude mãikꞌaapa aɨ ikꞌaawa pꞌanadapꞌedaa pꞌuuru kꞌaipeede. 4Mama pꞌanɨde Judá ëreerãdepema poro waibɨarã chejida aceite weede David poro ɨ̃rɨ. Mãgá iru awara bɨjida ãchi ëreerãdepemaarã rey beemerã. Ma awara Davidmaa nepɨrɨjida Galaad eujãdepema Jabés pꞌuurudepemaarãpa Saúl kꞌapꞌɨa piuda ɨadapꞌedaa. 5Davidpa mãga ũrikꞌãri, ichia chokꞌapariirã pëiji nãga jaranadamerã Jabés pꞌuurudepemaarãmaa: “Mɨa kꞌinia bɨ Tachi Akꞌõrepa parã bendiciamerã, parãpa rey Saúl kꞌapꞌɨa piuda atanadapꞌeda, ɨadapꞌedaa perã. 6Mãga oodapꞌedaa perã, mɨa kꞌinia bɨ Tachi Akꞌõrepa parã pia akꞌɨ bapariimerã mãikꞌaapa ne–inaa jõmaade parã kꞌaripapariimerã. Mɨa pida parãmaa ne–inaa pia oo kꞌinia bɨ. 7Parã poro waibɨa Saúl piuji mĩda, waaweenáatɨ mãikꞌaapa sõcharra pꞌanátɨ, Judá ëreerãdepemaarãpa mɨ rey bɨdapꞌedaa perã.”

Saúl warra Isboset israelitaarã rey bɨdapꞌedaa

8Mamĩda Ner warra Abner, Saúl soldaorã poro waibɨa padapa Saúl warra Isboset atapꞌeda, Majanayin pꞌuurudee ateeji. 9Mama Isboset awara bɨji rey beemerã Galaad eujãde, Guesurí+ eujãde, Jezrel eujãde, Efraín ëreerãdepemaarã eujãde, Benjamín ëreerãdepemaarã eujãde, pia jaraitꞌeera, Israel eujã jõmaade.

10Saúl warra Isboset cuarenta año iru baji mãgá Israel eujãdepema rey bɨdakꞌãri. Ma israelitaarã año omé ichi jua ekꞌari iru baji. Maapai Judá ëreerãdepemaarã David jua ekꞌari pꞌanapachida. 11David año siete apꞌeda atane seis ãra rey baji. Mãga nɨde Hebrón ãchi pꞌuuru waibɨa paji.

Israelitaarã Judá ëreerãdepemaarã ome jura chõodapꞌedaa

12Maapai Ner warra Abner Majanayindeepa uchiaji Saúl warra Isboset soldaorã ome wãitꞌee Gabaón pꞌuurudee. 13Gabaonde bada pania ɨapatapꞌedaamãi pꞌananajida. Mãga nɨde Sarvia warra Joab Hebrondeepa uchiaji David soldaorã ome wãitꞌee ma pania ɨapatapꞌedaamaa Gabaón kꞌaitꞌa. Abner ichi eere pꞌanadapꞌedaarã ome aɨ kꞌĩraikꞌa eere pꞌanajida.

14Mãpai Abnerpa Joabmaa nãga jaraji:

—Kꞌũtrãarã pëidáma aji, jõmaarã taide chõodamerã ãchi arma ome.

Joabpa pꞌanauji:

—Pia bɨda aji.

15Mãgá kꞌũtrãarã doce uchiajida chõodamerã Benjamín ëreerãdepemaarã mãikꞌaapa Saúl warra Isboset eere pꞌanadapꞌedaarã pari. Jõdee David eere pꞌanadapꞌedaarã pari awaraa doce uchiajida. 16Ãchi chaachaa aukꞌa chõojida porode jita atadapꞌeda, espadapa su pee piurutamaa. Apida chokꞌai uchia–e paji. Mapa ma Gabaonde chõo pꞌanadapꞌedaamãi tꞌɨ̃ bɨjida Jelcat Hazurín.+

17Mãpai jõmaweda chõomaa pꞌaneejida. Ma ewate audú chõojida. David eere pꞌanadapꞌedaarãpa Abner eere pꞌanadapꞌedaarã pꞌoyaajida. 18Mama pꞌanajida Sarvia warrarã õpee; Joab, Abisay mãikꞌaapa Asael. Asael audú kꞌapꞌipꞌia pꞌirapachi, bigikꞌa. 19Iru jĩpꞌa pꞌiraji Abner tꞌẽe. 20Abnerpa ãpɨtee akꞌɨkꞌãri, iru unuji. Mãpai irumaa mãgaji:

—Asael, ¿pɨkꞌã aji, mɨ tꞌẽe cheru?

Irua pꞌanauji:

¡Mɨda! aji.

21Mãpai Abnerpa mãgaji:

—¡Waa mɨ tꞌẽe chenáaji! ¡Mɨ ichiakꞌau bɨ́ji! ¡Awaraa soldaota jita atáji mãikꞌaapa iru arma jãri atapáde! aji.

Mamĩda Asael waapɨara iru tꞌẽe pꞌira wãji.

22Mãpai Abner waya pedeeji:

—¡Mɨ tꞌẽe waa chenáaji, maa–e pɨrã mɨa pɨ peetꞌaaitꞌeeda! aji. Mɨa mãga oopꞌeda, ¿sãgá mɨa pɨ ɨ̃pema Joab unuyama? aji.

23Mamĩda Asael waapɨara iru kꞌaitꞌaara wãkꞌãtɨ wãji. Mapa Abnerpa chi miasupa ãpɨtee iru bide su ataji. Mãgá surude ma miasu ekꞌarra eere uchiaji. Mapa aweda Asael eujãde piu baainaji.

Awaraarã tꞌẽe chedapꞌedaarã akꞌɨnɨ̃ pꞌaneejida Asael kꞌapꞌɨa piuda akꞌɨdaitꞌee. 24Mamĩda Joab, Abisay ome Abner tꞌẽe wãjida. Akꞌõrejĩru baai wãkꞌãri, panajida Amá eede, Guiaj kꞌĩrapite, eujã pania wẽe bɨ Gabaón apatapꞌedaadee wãpari ode. 25Mama Benjamín ëreerãdepema soldaorãpa Abner kꞌĩrachuu chejida. Mãgá chokꞌaraara padaidakꞌãri, ee nokꞌode akꞌɨnɨ̃ pꞌaneejida.

26Mãpai mamãikꞌaapa Abnerpa Joabmaa nãgá golpe pedeeji:

—¿Sãapai waa chõoda–e payama? aji. ¿Pɨa kꞌawa–e bɨkꞌã na kꞌaurepa tachi jõmaweda tꞌãri ãrii pꞌaneedaitꞌee? ¿Sãapai jaraitꞌeema pɨchi soldaorãmaa pãchi aukꞌaarã waa jɨrɨnaadamerã?

27Joabpa pꞌanauji:

—Tachi Akꞌõre ichita chokꞌai bɨ kꞌĩrapite mɨa juraa bɨ pɨa mãga jara–e pada paara, mɨ soldaorã ãchi aukꞌaarã tꞌẽe wãkꞌajida ewarirumaa.

28Mãpai Joabpa jaraji trompeta chaadamerã, waa chõoda–e paitꞌee. Mãgá waa israelitaarã tꞌẽe wãda–e paji mãikꞌaapa chõoda–e paji. 29Ma pꞌãrikꞌuaweda Abner ichi eere pꞌanadapꞌedaarã ome eujã jewedaa Arabade wãyaajida. Jordán to sĩadapꞌeda, Bitrón eujãde wãyaajida ãstaawa Majanayin pꞌuurude parutamaa.

30Jõdee Joab waa Abner tꞌẽe wã–e pakꞌãri, ãpɨtee wãji. Mãpai ichi soldaorã chipꞌe atapꞌeda, juasiaji. Mãgá kꞌawaji David soldaorã diecinueve piudapꞌedaa, Joab ɨ̃pema Asael awara. 31Mamĩda David eere pꞌanadapꞌedaarãpa Benjamín ëreerãdepemaarã Abner ome nipadapꞌedaarã trescientos sesenta peekꞌoojida. 32Ma tꞌẽepai Asael kꞌapꞌɨa piuda ateejida Belén pꞌuurudee. Mama ɨajida chi akꞌõre ɨadapꞌedaamãi. Ma pꞌãrikꞌua Joab ichi eere pꞌanadapꞌedaarã ome jĩte wãjida. Ewarikꞌãri, Hebrón pꞌuurude panajida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index