Search form

2 Samuel 20

Sabapa rey Davidpa jaradakꞌa oo–e pada

1Mama Guilgalde baji eperã ne–inaa kꞌachia ooyaa bɨ. Iru Benjamín ëreerãdepema Bicrí warra paji. Tꞌɨ̃jarapachida Sabá. Mãgɨ́ eperãpa trompeta chaaji arii pꞌanadapꞌedaa israelitaarã chipꞌedaidamerã mãikꞌaapa mãgaji:

—¡Israelitaarã, tachi Isaí warra David ëreerãdepema–epɨ! ¡Tachi temaa erreunadáma! aji.

2Mãpai ma israelitaarã ɨmɨkꞌĩraarã jõmaweda mama pꞌanadapꞌedaarãpa David atabaibëijida Bicrí warra Sabá ome wãdaitꞌee. Mamĩda Judá ëreerãdepemaarã ãchi rey eere pꞌaneejida mãikꞌaapa iru kꞌõpꞌãyaajida Jordán to ideepa Jerusalende parumaa.

3David panakꞌãri ichi palaciode Jerusalén pꞌuurude, chipꞌe ataji chi wẽra kꞌãipariirã diez atabëida te akꞌɨdamerã. Mãpai te awaraade ãra jɨ̃a paraa tꞌɨ nɨ̃bɨnaji. Mama ãra akꞌɨpachi mãikꞌaapa ãramaa chikꞌo teepachi. Mamĩda waa ãra ome kꞌãi–e paji. Mãgá ãra pꞌẽtrãarãkꞌa mama pꞌanapachida ãchi piurutamaa. Davidpa mãga ooji israelitaarã taide chi warra Absalón ãchi ome kꞌãida perã.

4Maapꞌeda rey Davidpa mãgaji chi soldaorã poro waibɨa Amasamaa:

—Judá ëreerãdepema soldaorã tꞌɨ̃pipáde aji, mãikꞌaapa kꞌãima õpeede nama pꞌe aneepáde aji.

5Amasá wãji reypa jaradakꞌa oode. Mamĩda kꞌãima õpee waa taarãji Judá ëreerãdepema soldaorã chipꞌe ataitꞌee.

6Maperã Davidpa nãga jaraji awaraa soldaorã poro waibɨa Abisaymaa:

—Bicrí warra Sabapa tachimaa ne–inaa kꞌachiara ooitꞌeeda aji, Absalonpa ooda kꞌãyaara. Mapa mɨ jɨ̃apataarã chipꞌe atapꞌeda, iru jɨrɨde wã́tɨ. Maa–e pɨrã iru pꞌuuru murallapa tꞌɨakꞌau bɨde tꞌĩupꞌeda, tachia iru pꞌoyaa jita atada–e payada aji.

7Mãgá Joab ome nipapatapꞌedaarã, David jɨ̃apataarãdepema quereteorã, peleteorã ome mãikꞌaapa soldaorã chõo kꞌawaara beerã Abisay ome uchiajida Bicrí warra Sabá jɨrɨde.

8Gabaonde mãu choma bada kꞌaitꞌa panadakꞌãri, Amasá ãra ome unu cheji. Mãga bɨde Joabpa ichi chõopari pꞌaru jɨ̃ baji, kꞌɨrrɨde jɨ̃pari ome. Kꞌɨrrɨde ichi espada jɨ̃ baji. Mamĩda iru tꞌɨakꞌãri, ma espada baaidachi. 9Mãɨmisa Joab juarapa Amasá idakꞌara jitaji iru saludaaitꞌee mãikꞌaapa iidiji:

—¿Sãga bɨma primo? ¿Pia wãkꞌã? aji.

10Mãgá saludaa bada perã, Amasapa unu–e baji Joabpa ichi juabi eereepa espada iru bada. Mapa Amasá atu bɨde Joabpa bide sutꞌaaji. Chi jɨ̃si chedachi. Ma sudapapai piudachi. Maapꞌeda Joab chi ɨ̃pema Abisay ome, soldaorã ãra ome nipadapꞌedaarã paara wãjida Bicrí warra Sabá jɨrɨde. 11Mãga nɨde Joab jua ekꞌari bada soldaopa Amasá kꞌapꞌɨa baaida ikꞌaawa akꞌɨnɨ̃ beepꞌeda, mãgaji:

—¡Joab eere pꞌanɨɨrã mãikꞌaapa David eere pꞌanɨɨrã Joab ome wãdaipia bɨda! aji.

12Mamĩda irua unukꞌãri Amasá kꞌapꞌɨa ode waasoo baibɨ mãikꞌaapa soldaorã jõmaweda akꞌɨnɨ̃ pꞌaneeruta akꞌɨdaitꞌee, chi kꞌapꞌɨa piuda tꞌapꞌa bɨji pꞌarupa. Mãpai o esa–aukꞌaapa ãyaa ateeji. 13Maapꞌeda soldaorã jõmaweda Joab ome wãjida ma Sabá jɨrɨdaitꞌee.

14Mãga nɨde Sabá israelitaarã eujãde wãyaaji Abel Betmacá pꞌuurude parumaa. Ichi akꞌõre Bicrideepa uchiadapꞌedaarã jõmaweda tꞌĩujida ma pꞌuurude ichi ome. 15Joab ichi eere pꞌanadapꞌedaarã ome panadakꞌãri Abel Betmacá pꞌuurude, wapꞌɨra atajida. Mãpai rampa oojida ɨtꞌɨ́ murallade padaitꞌee, mãgá ma muralla ãrikꞌoodai jĩakꞌaapa. 16Mãga oo pꞌanɨde ma pꞌuurudepema wẽra aba kꞌĩsia kꞌawaa badapa muralladeepa nãga biaji:

—¡Ũrítɨ, ũrítɨ! ¡Joabmaa jaradapáde aji, kꞌaitꞌaara chemerã! ¡Mɨ pedee kꞌinia bɨda aji, iru ome!

17Joab kꞌaitꞌaara wãkꞌãri, mãgɨ́ wẽrapa iidiji:

—¿Pɨ Joabkꞌã? aji.

Pꞌanauji:

—Mɨpɨ, aji.

Ma wẽrapa mãgaji:

—Ũripáde aji, mɨ, pɨ mimiaparipa jararu.

Joabpa pꞌanauji:

—Ũrimaa bɨda aji.

18Mãpai ma wẽrapa mãgaji:

—Chonaarãweda mãgapachida: “Ne–inaa kꞌawa kꞌinia bakꞌãri, iidinátɨ Abel Betmacá pꞌuurudepemaarãmaa.” Mãga oopachida ãchi nepɨra jõpidaitꞌee. 19Na pꞌuurudepemaarã kꞌãiwee pꞌanapatada aji. Na pꞌuuru Israel eujãdepema pꞌuuru waibɨa bɨ. Nãpemaarãpa chõo jɨrɨdakꞌaa apidaa ome mãikꞌaapa tachi rey ichita waaweepata. Mãga bɨ mĩda, pɨ cheji na pꞌuuru jõpide. ¿Sãapꞌeda Tachi Akꞌõrepa teeda eujãdepema pꞌuuru jõpi kꞌinia bɨma? aji.

20Joabpa pꞌanauji:

—Mãga–eda aji. Mɨa na pꞌuuru jõpi kꞌinia–e. 21Jĩpꞌa cheji Efraín ëreerã eujã ee jẽra bɨdepema Bicrí warra, tꞌɨ̃jarapata Sabá atade. Ichia soldaorã chipꞌe wã bɨ chõodaitꞌee rey David ome. Pɨa iru mɨmaa teeru pɨrã, tai ãpɨtee erreudaitꞌeeda aji.

Mãpai ma wẽrapa mãgaji:

—Pia bɨda aji. Muralladeepa chi poro batꞌa pëidaitꞌeeda aji.

22Mãpai ma wẽra pedeenaji ma pꞌuurudepemaarã ome. Iru kꞌĩsia kꞌawaa bada pedee ijãajida. Mãpai Bicrí warra Sabá o tꞌɨapꞌe peejida mãikꞌaapa batꞌa pëijida muralladeepa Joabpa nɨ badamãi. Mãga unukꞌãri, Joabpa jaraji trompeta chaadamerã. Mãga ũridakꞌãri, soldaorã ãpɨtee erreujida mãikꞌaapa wãjida ãchi te chaa. Jõdee Joab Jerusalendee wãji reymaa nepɨrɨde.

Rey David jua ekꞌari poro waibɨarã

(1 Crónicas 18.14-17)

23Joab Israeldepema soldaorã jõmaarã poro waibɨa beeji. Jõdee Joyadá warra Benaías rey jɨ̃apataarã, ma quereteorã mãikꞌaapa peleteorã poro waibɨa paji. 24Adonirán eperãarãmaa mimiapipataarã poro waibɨa paji. Ajilud warra Josafat rey secretario paji. 25Reypa ne–inaa oopariida pꞌãpari Seva paji. Sadoc mãikꞌaapa Abiatar pꞌaareerã mimia oopachida. 26Ichiaba yairita Irapa David–itꞌee pꞌaare mimia oopachi.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index