Search form

2 Samuel 21

Gabaón pꞌuurudepemaarã kꞌĩra jõ–ee pꞌanadapꞌedaa

1David rey bɨde jarrara paraaji año õpee wãyaarude. Mãga nɨde Davidpa Tachi Akꞌõremaa chupɨria iidiji.

Tachi Akꞌõrepa mãgaji:

—Mɨa jarrara pëijida aji, Saulpa ichideerã ome ne–inaa kꞌachia oodapꞌedaa perã Gabaón pidaarã peedakꞌãri.

2Mãpai Davidpa tꞌɨ̃ pëiji Gabaón pidaarã, chi peeda–ee pꞌanadapꞌedaarã, chedamerã. (Ma eperãarã israelitaarã–e paji. Amorreorãdeepa uchiadapꞌedaarã paji. Chonaarãweda israelitaarãpa mãɨrã ome pacto oojida chõoda–ee pꞌanapataadaitꞌee. Mamĩda ma tꞌẽepai Saúl rey beekꞌãri, audú israelitaarã mãikꞌaapa Judá ëreerãdepemaarã kꞌaripa kꞌinia bada perã, jɨrɨji mãɨrã jõpiitꞌee.)

Maapꞌeda ma Gabaón pidaarã chokꞌai pꞌaneedapꞌedaarã pachedakꞌãri rey Davidmaa, 3irua iidiji:

—Mɨa ¿kꞌãata ooyama aji, parã kꞌaripaitꞌee? ¿Kꞌãata ooima parã–itꞌee, Saulpa kꞌachia ooda pari? Kꞌinia bɨ parãpa Tachi Akꞌõrepa eperãarã jɨrɨtꞌerada waya pia akꞌɨpataadamerã.

4Ma Gabaón pidaarãpa pꞌanaujida:

—Pꞌaratꞌa kꞌiniada–eda ajida, Saulpa mãikꞌaapa ichideerãpa kꞌachia oodapꞌedaa pari tai ëreerãmaa. Ichiaba kꞌiniada–eda ajida, ma kꞌaurepa israelitaarã piudamerã.

Mãpai Davidpa mãgaji:

—Mãgara jaradapáde aji, mɨa kꞌãare ne–inaa ooi parã–itꞌee.

5Pꞌanaujida:

—Saulpa tai ëreerã jõmaweda jõpi kꞌinia baji, Israel eujãde apida pꞌaneenaadamerã. 6Ma kꞌachia ooda pari taipa kꞌinia pꞌanɨ Sauldeepa uchiadapꞌedaarã siete ɨmɨkꞌĩraarã taimaa teemerã. Tachi Akꞌõre kꞌĩrapite taipa ãra ɨ̃yapa jɨ̃adaitꞌee Guibeá pꞌuurude; Tachi Akꞌõrepa rey Saúl jɨrɨtꞌerada apata pꞌuurude.

Reypa pꞌanauji:

—Pia bɨda aji. Parãmaa ãra teeitꞌeeda aji.

7Mamĩda Davidpa tee–e paji Saúl ãichakꞌe, Jonatán warra Mefiboset, aɨ naaweda Tachi Akꞌõre kꞌĩrapite Jonatanmaa juraada perã irudeerã akꞌɨ baitꞌee. 8Mefiboset teei kꞌãyaara teeji Saúl warrarã omé Ayá kꞌau Rizpa ome ooda. Ma warrarã omé tꞌɨ̃jarapachida Armoní mãikꞌaapa Mefiboset. Davidpa ichiaba teeji Saúl kꞌau Merabpa warrarã joisomaa, Mejolá pꞌuurudepema Barzilay warra Adriel ome ooda. 9Mãɨrã teepꞌeda ma Gabaón pidaarãmaa, ãchia ma Sauldeepa uchiadapꞌedaarã ɨ̃yapa jɨ̃ajida ee bɨde Tachi Akꞌõre kꞌĩrapite. Mãgá ma eperãarã siete piujida, ma eujãdepemaarãpa ewaa cebada tau ewadakꞌãri.

10Maapꞌeda Ayá kꞌau pꞌẽtrãa Rizpapa chi–ɨapata pꞌarupa carpa ooji mãikꞌaapa aɨ ekꞌari ma peñade jẽra beeji. Mama beeji, ma cebada tau ewa pꞌaneedakꞌãriipa kꞌoijara parumaa. Mama bɨde ãstaawa ipanaarã ma piudapꞌedaarã kꞌapꞌɨa piuda kꞌaitꞌa chepi–e paji mãikꞌaapa pꞌãrikꞌua ne–animalaarã kꞌachia beerã jërekꞌooji. 11Saúl wẽra kꞌãipari pada Rizpapa mãgá ooda Davidmaa nepɨrɨ chedakꞌãri, 12iru wãji Saúl mãikꞌaapa Jonatán bɨɨrɨ atade ãra ɨadapꞌedaamãiipa. (Saúl Jonatán ome piudapꞌeda, Galaad eujãdepema Jabés pꞌuurudepemaarãpa ãra kꞌapꞌɨa jãri atanajida filisteorã juadeepa ãchi pꞌuuru Betsandeepa. Saúl pꞌoyaadapꞌeda mãikꞌaapa Guilboa eedeepa mamaa ateedapꞌeda, filisteorãpa ma kꞌapꞌɨa piuda ãchi pꞌuuru tꞌĩupatade baijira bɨjida.) 13-14Ma kꞌapꞌɨa piuda bɨɨrɨ beeda atapipꞌeda ma Jabés pꞌuurudepemaarã juadeepa, Davidpa jaraji ateedamerã chi ɨ̃yapa jɨ̃adapꞌedaa kꞌapꞌɨa piuda ome ɨadaitꞌee Saúl akꞌõre Cis ɨadapꞌedaamãi. Ma jãɨra Benjamín ëreerãdepemaarã eujãde baji Zela pꞌuuru kꞌaitꞌa. Ma jõma oojida reypa jaradakꞌa. Ma tꞌẽepai Tachi Akꞌõrepa waya ũriji israelitaarãpa ɨtꞌaa iididapꞌedaa ãchi eujã pari.

Abisaypa David kꞌaripada piunaamerã

15Waya filisteorãpa chõo jɨrɨ pꞌaneejida israelitaarã ome. Mapa David ichi soldaorã poro waibɨarã ome uchiajida chõode. Chõo jõnɨde David juatau wẽe beeji. 16Mãga bɨde gigante Refadeepa uchiada, tꞌɨ̃jarapatapꞌedaa Isbibenobpa David peeitꞌee paji. Ichi miasu broncedee ooda kilo õpee waa chɨkꞌɨa baji mãikꞌaapa ichi kꞌɨrrɨde espada chiwidi anipaji. 17Mamĩda Sarvia warra Abisay wãji David kꞌaripade. Ma filisteo ɨ̃rɨ wãji mãikꞌaapa peeji.

Ma chõoda tꞌẽepai David soldaorãpa jarajida:

—Rey Waibɨa, taipa juraa pꞌanɨda ajida, pɨ waa tai ome uchia–e paitꞌee chõode pɨ piunaamerã, Israel eujãde pɨ lamparakꞌa bairã.

Jura chõodapꞌedaa giganteerã ome

(1 Crónicas 20.4-8)

18Ma tꞌẽepai waya chõojida filisteorã ome Gob pꞌuurude. Ma chõodapꞌedaade jusatita, tꞌɨ̃jarapatapꞌedaa Sibecaypa giganteerãdeepa uchiada Saf peeji. 19Awaraa chõodapꞌedaade filisteorã ome Gob pꞌuurude, Belén pꞌuurudepema Yaré Oreguín warra, Eljananpa Gatdepema gigante Goliat apatapꞌedaa+ peeji. Mãgɨ́ gigante miasu nẽchoma baji. Nẽchoma baji pakꞌuru pꞌaru kꞌapatadepemakꞌa.

20Gat pꞌuurude ichiaba chõojida. Made gigante choma baji. Mãgɨ́ audú ɨtꞌɨa baji mãikꞌaapa jua kꞌɨ̃ veinticuatro iru baji; seis jua chaa, seis bɨɨrɨ chaa. Mãgɨ́ ichiaba gigante Refadeepa uchiada paji. 21Mãgɨpa israelitaarã ome chõo jɨrɨ bada perã, David ɨ̃pema Simá warra, Jonatán apatapꞌedaapa peeji. 22Ma gigante kꞌĩmari uchiajida Gat pꞌuurudepema gigante Refadeepa. Mãgá ãra gigantedeepa uchiajida mĩda, Davidpa ichi jua ekꞌari poro waibɨarã ome ma jõmaweda pꞌoyaajida.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index