Search form

2 Samuel 22

Rey Davidpa kꞌari Tachi Akꞌõre–itꞌee pꞌãda

(Salmos 18.1-50)

1Tachi Akꞌõrepa David uchia atakꞌãri Saúl juadeepa mãikꞌaapa awaraa kꞌĩra unuamaa iru pꞌanapatapꞌedaarã juadeepa, Davidpa na kꞌari iru–itꞌee pꞌãji.

2‘‘Tachi Akꞌõre, mɨ–itꞌee pɨ mãu choma bɨkꞌa bɨ, mɨ jɨ̃apari perã. Pɨa mɨ kꞌaripa atapari mɨ kꞌĩra unuamaa iru pꞌanapataarã juadeepa. Pɨa mɨ uchiapipari ne–inaa kꞌachia ooyaa beerã juadeepa. 3Pɨ mɨchi Akꞌõre Waibɨa. Mãu choma bɨkꞌa bɨ maa–e pɨrã escudokꞌa bɨ, mɨ jɨ̃apari perã. Ne–inaa kꞌachiadeepa pɨa mɨ kꞌaripa atapari. Eperã mãu tede miruparikꞌa, mãga pɨkꞌa mɨ pɨde miru pɨkꞌapari, chĩara peepataarãpa mɨ peenaadamerã. 4Maperã mɨa pɨmaa pedee pia jarapari. Pɨ jõmaarã kꞌãyaara waibɨara bɨ. Mɨa pɨmaa ɨtꞌaa iidikꞌãri, pɨa mɨ kꞌaripa atapari mɨ kꞌĩra unuamaa iru pꞌanapataarã juadeepa.

5‘‘Pꞌusapa mɨ pɨra pɨkꞌa ata baji mãikꞌaapa pꞌusa mɨ ɨ̃rɨ che pɨkꞌa baji. Mapa mɨ pꞌera nɨ̃baji, piui jĩakꞌaapa. 6Lazopa bigi bɨɨrɨde jõi ataparikꞌa, mãga pɨkꞌa mɨchi piudapa mɨ jõi pɨkꞌa iru baji. 7Mãga nɨde mɨ audú kꞌĩsia nɨ̃bakꞌãri, pɨmaa ɨtꞌaa iidiji. Pɨ, mɨchi Akꞌõre Waibɨamaa mɨa kꞌaripa iidiji. Mãpai pɨ tedeepa pɨa mɨ biapi ũriji. ¡Pɨ baparimaa mɨ biapi panaji!

8‘‘Mãpai pɨ kꞌĩraudaikꞌãri na eujã golpe wëredachi, ee kꞌarra paara. 9¡Audú kꞌĩrau bada perã, pɨ kꞌɨ̃deepa nari uchia nɨ̃baji; pɨ itꞌaideepa tꞌɨpɨtau urua uchia nɨ̃baji mãikꞌaapa okꞌokꞌĩra paara urua uchiapachi! 10Pɨa pajã ewaraa kꞌobɨpiji mãikꞌaapa baai cheji. Jɨ̃arara tꞌãmaa pꞌãriu nɨ̃bɨ ɨ̃rɨ bainɨ̃ beeji. 11Querubín+ isia paraa bɨ ɨ̃rɨ bataupꞌeda, nãude wãabai wãji. 12Tachi teeda mirudaiparikꞌa, mãga pɨkꞌa pɨ mirudachi jɨ̃arara tꞌãmaa pꞌãriu kꞌoira nɨ̃bada beede. 13Pɨ badamãiipa pa tau pꞌorepꞌore uchia nɨ̃baji mãikꞌaapa okꞌokꞌĩra urua baai chejida.

14‘‘Ɨtꞌariipa pɨ, Jõmaarã Akꞌõre Waibɨa pedeeji pa jĩwaa nɨ̃bɨde. 15Soldaopa ematrɨma trɨparikꞌa, mãga pɨkꞌa pɨa pa baaipiji mɨ kꞌĩra unuamaa iru pꞌanapataarã ɨ̃rɨ. Mãgá ãchi jërekꞌooji mɨ badamãiipa. Pariatua jĩchoodachida. 16¡Pɨ kꞌĩrau pedee jĩwaa bɨpa pꞌusa jã mãikꞌaapa na pꞌekꞌau eujã basa unupiji!

17‘‘Ɨtꞌariipa pɨ jua mɨmaa teeji. Mãgá mɨ uchia ataji pꞌusa nãpɨa bɨdeepa. 18Pɨa mɨ kꞌaripa ataji mɨ kꞌĩra unuamaa iru pꞌanapataarã juadeepa, ãchi mɨ kꞌãyaara juataura pꞌanajida mĩda. 19Mɨ juatau wẽe nepɨrade bakꞌãri, ãchi mɨ ome chõo chejida. Mamĩda pɨ, Tachi Akꞌõrepa mɨ kꞌaripaji. 20Mɨ uchia ataji ãchia mɨmaa ne–inaa kꞌachia oodaitꞌee pꞌanadapꞌedaadeepa mɨ kꞌinia iru bapari perã. 21Pɨ, Tachi Akꞌõrepa mɨ mãgá kꞌaripaji, pɨa jara bɨkꞌa mɨa oopari perã. 22Tachi Akꞌõre, pɨ ode mɨ nipapari. Ãpɨtee wã–e. Mɨa ne–inaa kꞌachia oo kꞌinia–e. Pɨde mɨ ijãa amaa–e paitꞌee. 23Mɨa oopari pɨ leyde jara bɨkꞌa. Pɨa jara bɨkꞌa mɨa oo amaa–e paitꞌee. 24Pɨ kꞌĩrapite mɨ tꞌãri jĩpꞌa nipapari, pꞌekꞌau kꞌachia ooamaa bairã. 25Pɨ kꞌĩrapite mɨ mãgá tꞌãri jĩpꞌa nipapari perã, pɨa mɨ kꞌaripamaa bɨ.

26‘‘Tachi Akꞌõre, pɨa ichita oopari pɨa jara bɨkꞌa chi pɨa jara bɨkꞌa oopataarã ome. Pɨ kꞌachia wẽe bapari chi ne–inaa kꞌachia ooamaa pꞌanapataarã ome. 27Pɨ kꞌĩra jĩpꞌa bapari chi kꞌĩra jĩpꞌa pꞌanapataarã ome. Mamĩda pɨ kꞌĩsia kꞌawaa bapari chi kꞌũrayaa pꞌanapataarã ome. 28Pɨa audua–ee beerã kꞌaripapari. Mamĩda audua beerã chupɨriapipari. 29Tachi Akꞌõre, mɨ–itꞌee pɨ lamparakꞌa bɨ, mɨ bɨmãi pɨa urua pɨkꞌapipari perã. Pɨ kꞌaurepa mɨ pꞌãriu pɨkꞌa bɨde bakꞌaa. 30Pɨa mɨ kꞌaripakꞌãri, mɨ wãi chõode soldaorã chokꞌara ome mãikꞌaapa tꞌĩui ãchi pꞌuuru murallapa tꞌɨakꞌau bɨde.

31‘‘Tachi Akꞌõre o pipɨara bɨ awaraa o kꞌãyaara irua ne–inaa jõma pia oopari perã. Iru pedee jõmaweda pia bɨ, irua jara bɨkꞌa ichita oopari perã. Iru escudokꞌa bɨ irude ijãapataarã–itꞌee, irua ãra jɨ̃apari perã. 32Tachi Akꞌõrekꞌa awaraa Akꞌõre Waibɨa wẽ–e. Awaraa Akꞌõre Waibɨapa tachi pꞌoyaa jɨ̃akꞌaa irua jɨ̃aparikꞌa. 33Iruata mɨ juataura papipari mãikꞌaapa mɨa oo bɨ pia uchiapipari. Irua mɨ kꞌaripapari ne–inaa kꞌachia oonaamerã mãikꞌaapa iru o piade nipapariimerã. 34Iruata mɨ bigikꞌa kꞌapꞌipꞌia pꞌirapipari mɨ kꞌĩra unuamaa iru pꞌanapataarã naa mãikꞌaapa mɨ ee ɨtꞌɨara beede nipakꞌãri, irua mɨ jɨ̃apari. 35Irua mɨmaa jarateepari chõo kꞌawaa bamerã. Juataura papipari ematrɨma broncedee ooda trɨmerã. 36Tachi Akꞌõre, pɨa mɨmaa escudokꞌa teepari, mɨ kꞌachia beerã juadeepa kꞌaripa atakꞌãri. Pɨ tꞌãri pia bapari perã, eperãarã kꞌĩrapite mɨ waibɨara papiji. 37Pɨa mɨ kꞌaripapari mɨ kꞌĩra unuamaa iru pꞌanapataarã juade baainaamerã mãikꞌaapa mɨ ode wãrude tꞌĩutɨnaamerã.

38‘‘Mapa mɨ kꞌĩra unuamaa iru pꞌanapataarã tꞌẽe wãpꞌeda, mɨa ãchi pꞌoyaaji mãikꞌaapa ãchi jõpiji. Ãpɨtee che–e paji mãɨrã jõmaweda jõtꞌaa–emaa. 39¡Mɨa ãchi jõtꞌaaji! ¡Piukꞌoojidapɨ! ¡Mɨ ome waa chõo jɨrɨda–e paitꞌee, mɨa ãchi pꞌoyaada perã! 40Chõodakꞌãri, pɨa mɨ ãchi kꞌãyaara juataura papiji. Mãgá mɨ jua ekꞌari pꞌanadaamaa pꞌanapataarã mɨ kꞌĩrapite bedabaipiji. 41Pɨa mɨ kꞌĩra unuamaa iru pꞌanapataarã ãpɨtee jërekꞌooji. Mãgá mɨa ãchi jõtꞌaaji. 42Ãchia jɨrɨjida ãchi kꞌaripadamerã. Mamĩda apidaapa kꞌaripada–e paji. Tachi Akꞌõre, pɨmaa paara ɨtꞌaa iidijida. Mamĩda pɨa pida ãchi kꞌaripa–e paji. 43Mɨa ãra piarsĩ pɨkꞌaji yooro pꞌora papirumaa mãikꞌaapa ãchi ɨ̃rɨ tꞌɨa pɨkꞌaji eperãpa calle jãdepema yooro susua tꞌɨaparikꞌa. 44Pɨa mɨ pꞌuuru pidaarã juadeepa mɨ uchiapiji, ãchi mɨ jua ekꞌari pꞌanadaamaa pꞌaneedakꞌãri. Pɨa awaraa eujãdepema ijãadakꞌaa beerã mɨ jua ekꞌari bɨji mɨ mimiapataarã pꞌaneedamerã, aɨ naaweda mɨa ãra kꞌawa–e baji mĩda. 45Mɨa ne–inaa jarakꞌãri, mãɨrãpa oopata mɨa jara bɨkꞌa. Kꞌĩra tewaraarã mɨ jua ekꞌari chokꞌekꞌee pꞌanapata. 46Mãgee kꞌĩra tewaraarãpa mɨ audú waawee pꞌanapata perã, kꞌapꞌɨa wëree uchiapata ãchi mirudapꞌedaamãiipa mɨ jua ekꞌari pꞌanapataadaitꞌee.

47‘‘¡Tachi Akꞌõre ichita bapari! ¡Mɨ–itꞌee iru mãu choma bɨkꞌa bɨ, mɨ pi–ia jɨ̃apari perã! ¡Jõmaarãpa iru tꞌɨ̃ tꞌo pꞌanadaipia bɨ, irua mɨ mãgá kꞌaripapari perã! 48Iruata mɨ kꞌaripaji mɨ kꞌĩra unuamaa iru pꞌanapataarã pꞌoyaamerã. Iruata pꞌuuru pidaarã awara–awaraa mɨ jua ekꞌari bɨji. 49Pɨa mɨ uchia atapari mɨ kꞌĩra unuamaa iru pꞌanapataarã juadeepa. Mɨ ome chõo jɨrɨpataarã mɨmaa pꞌoyaapipari mãikꞌaapa ne–inaa kꞌachia oopataarã juadeepa mɨ kꞌaripa atapari. 50Maperã Tachi Akꞌõre, awara–awaraa eujãdepemaarã taide mɨa pɨmaa pedee pia jarapari mãikꞌaapa salmo kꞌaripari. 51Tachi Akꞌõre, pɨata mɨ jɨrɨtꞌeraji rey pamerã mãikꞌaapa awara–awaraa pꞌuuru pidaarã mɨmaa pꞌoyaapipari. Mãga ooji mɨ, David, mɨdeepa uchiadaitꞌeerã paara, ichita kꞌinia iru bapari perã.”

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index