Search form

2 Samuel 24

Davidpa israelitaarã juasiapida

(1 Crónicas 21.1-17)

1Tachi Akꞌõre waya kꞌĩrau beeji israelitaarã ome. Maapai irua David israelitaarã ome kꞌachiade baaipiji nãga jarakꞌãri: “Jõmaweda israelitaarã mãikꞌaapa Judá ëreerãdepemaarã pɨ jua ekꞌari pꞌanapata juasiapáde” aji. 2Rey Davidpa mãga ooji. Chi soldaorã poro waibɨa Joabmaa mãikꞌaapa awaraa soldaorã poro waibɨarãmaa nãga jaraji:

—Wãdapáde aji, israelitaarã ëreerã eujã chaa; Dan pꞌuurudeepa Berseba pꞌuurude parumaa. Ma eujãdepema ɨmɨkꞌĩraarã soldaorã mimia–itꞌee juasiadapáde aji, mɨa kꞌawaitꞌee jõmasaa pꞌanɨ.

3Mamĩda Joabpa pꞌanauji:

—Rey Waibɨa, pia bakꞌaji pɨ Akꞌõre Waibɨapa soldaorã pɨ jua ekꞌari pꞌanɨɨrã chokꞌaraara papida paara, ewari cherude audú chokꞌara uchiadamerã, pɨ atꞌãri chokꞌai bɨ misa. Mamĩda, Rey Waibɨa, ¿kꞌãare–itꞌee kꞌinia bɨma aji, na pꞌuuru pidaarã ɨmɨkꞌĩraarã juasiadamerã?

4Mãga iidiji mĩda, oojida Davidpa jaradakꞌa. Mapa Joab awaraa soldaorã poro waibɨarã ome rey palaciodeepa uchiajida Israeldepema ɨmɨkꞌĩraarã soldaorã mimia–itꞌee juasiade. 5Jordán to sĩajida mãikꞌaapa ãchi carpa eebai jẽra bɨjida Aroer pꞌuuru kꞌaitꞌa. Maadamãiipa mãikꞌaapa awaraa pꞌuuru ma eujã jewedaa esajĩakꞌa badamãiipa, Gad ëreerã eujãde norte eeree juasia wãjida, Jazer pꞌuurude parutamaa. 6Mamãikꞌaapa Galaad eujãde wãyaajida, Cades pꞌuurude parutamaa. Ma pꞌuuru hititaarã eujãde baji. Mamãikꞌaapa Dan ëreerã eujãde wãyaadapꞌeda, pꞌɨrrabaijida wãdaitꞌee Sidón pꞌuurudee. 7Mamãikꞌaapa wãjida Tiro pꞌuurudee soldaorã pꞌanapatapꞌedaamãi mãikꞌaapa wãyaajida heveorã pꞌuurude, cananeorã pꞌuurude, uchiarutamaa Judá ëreerã eujã sur eere Néguev apatapꞌedaa, eujã jewedaade bada Berseba pꞌuurude. 8Atane nueve, ewari veinte wãyaarude israelitaarã eujãde nipajida, ɨmɨkꞌĩraarã juasiamaa. Maapꞌeda ãpɨtee chejida Jerusalendee.

9Pachedakꞌãri, Joabpa reymaa chi pꞌãda tee cheji. Soldaorã mimia–itꞌee ochocientos mil ɨmɨkꞌĩraarã espadapa chõo kꞌawaa beerã paji Israel eujãdepema ëreerã jõmaade. Judá ëreerã eujãde quinientos mil paji. 10Mamĩda ma tꞌẽepai David kꞌĩsia pꞌua nɨ̃beeji ma juasiapida kꞌaurepa. Mapa Tachi Akꞌõremaa mãgaji:

—Tachi Akꞌõre, mɨa pꞌekꞌau audú kꞌachia oojida aji, mãgá ɨmɨkꞌĩraarã jõmaweda juasiapikꞌãri. Ma ne–inaa kꞌachia mɨ, pɨ mimiaparipa ooda ãyaa bɨpáde aji, mɨa mãga ooda perã, kꞌĩsia kꞌawa–ee.

11Aɨ norema David pꞌirabai naaweda, Tachi Akꞌõrepa ichi pedee kꞌawapiji ichi pedee jarapari Gadmaa. Mãgɨ́ David ũraapari paji. Irumaa Tachi Akꞌõrepa mãgaji:

12—Wãpáde aji, Davidmaa. Jarapáde aji, mɨa iru miapiitꞌee, irua ma ne–inaa kꞌachia ooda perã. Jaráji ne–inaa kꞌachia õpeedepema irua aba jɨrɨtꞌeramerã mɨa irumaa ooitꞌee.

13Maapꞌeda David kꞌĩrapite Gad wãji mãikꞌaapa iidiji:

—¿Kꞌãata kꞌinia bɨma aji, Tachi Akꞌõrepa pɨmaa oomerã, pɨa kꞌachia ooda kꞌaurepa? ¿Kꞌinia bɨkꞌã aji, irua jarra pëimerã eujã pɨ jua ekꞌari bɨde año õpee wãyaarude, maa–e pɨrã pɨ kꞌĩra unuamaa iru pꞌanapataarãpa pɨ jɨrɨdamerã peedaitꞌee atane õpee wãyaarude maa–e pɨrã irua kꞌayaa kꞌachia eujã pɨ jua ekꞌari bɨde pëimerã kꞌãima õpee wãyaarude? Kꞌĩsiapꞌeda, nãgaweda jarapáde aji, mɨa jaramerã mɨ pëidamaa.

14Davidpa pꞌanauji:

—¿Sãgapɨ ooima aji, mɨa? Eperãarã juade mɨ baaidai kꞌãyaara, piara bɨ tachi Tachi Akꞌõre juade baaidamerã, irua eperãarã chupɨria kꞌawaapari perã.

15Maperã Israel eujãde Tachi Akꞌõrepa kꞌayaa kꞌachia pëiji. Ma ewateweda baripiji mãikꞌaapa kꞌãima õpee taarãji irua jaradakꞌa. Dan pꞌuurudeepa Berseba pꞌuurude parumaa, setenta mil israelitaarã kꞌiniijida. 16Tachi Akꞌõrepa ángel pëida mãgá eperãarã peemerã Jerusalén pꞌuuru kꞌaitꞌa pakꞌãri, Tachi Akꞌõre tꞌãri pꞌua nɨ̃beeji, Jerusalendepemaarã jõpi kꞌinia–e bada perã. Mapa chi angelmaa mãgaji:

—¡Jãgapaida! aji. ¡Waa peenaapáde! aji.

Irua mãga jara bɨde ma ángel jebuseo tꞌɨ̃jarapatapꞌedaa Arauna eujãde baji, netꞌa tau chi edeepa ãyaa atapatamãi. 17Davidpa ma angelpa eperãarã kꞌayaapi wã unukꞌãri, Tachi Akꞌõremaa mãgaji:

—¡Mɨata ne–inaa kꞌachia oojida! aji. ¡Mɨ pajipɨ! ¡Jã eperãarã ovejaarã́kꞌapɨ pꞌanɨ; maarepida ne–inaa kꞌachia ooda–ee pꞌanadairã! ¡Mɨa chupɨria iidi nɨ̃bɨda aji, pɨa ma kꞌachia pëimerã mɨmaa mãikꞌaapa mɨchideerãmaa!

Davidpa altar ooda

(1 Crónicas 21.18-27)

18Ma ewateweda Gad wãji David kꞌĩrapite mãikꞌaapa jaraji altar oonamerã jebuseo Arauna apatapꞌedaa eujãde, netꞌa tau chi edeepa ãyaa atapatamãi. 19Aramãgá David wãji oode Tachi Akꞌõrepa jaradakꞌa Gad kꞌapꞌɨa pari. 20Arauna ichi netꞌa tau chi edeepa ãyaa atapatamãi baji. Irua unukꞌãri rey David cheru ichi jua ekꞌari beerã ome, reymaa wãpꞌeda, bedabaidachi ichi tau bɨɨrɨ eujãde tꞌõbairumaa 21mãikꞌaapa mãgaji:

—Rey Waibɨa, ¿sãapꞌeda mɨmaa chejima? aji. Mɨ pɨchi mimiaparipɨ.

Davidpa pꞌanauji:

—Mɨa pɨ eujã; na netꞌa tau edeepa ãyaa atapatamãi neto kꞌinia bɨda aji. Nama altar ooitꞌeeda aji, mãikꞌaapa aɨde Tachi Akꞌõre–itꞌee ne–animalaarã paa jõpiitꞌee. Mãgapɨ irua kꞌayaa kꞌachia waa baripi–e paitꞌeeda aji, mɨ pꞌuuru pidaarãmaa.

22Araunapa mãgaji:

—Rey Waibɨa, atapáde aji, eujã pɨa kꞌinia bɨta. Mɨa pꞌakꞌa nama iru bɨda aji, peedapꞌeda, altarde Tachi Akꞌõre–itꞌee paa jõpimerã. Nama ichiaba tabla mãikꞌaapa yugo paraa tꞌɨpɨ–itꞌee. 23Rey Waibɨa, jõma pɨmaa pari teeyada aji. ¡Taawa Tachi Akꞌõrepa pia akꞌɨyada aji, pɨa ooru!

24Mamĩda reypa pꞌanauji:

—Pɨ tꞌãri pia bɨda aji. Mamĩda mɨa ma jõma neto kꞌinia bɨ chi valor pari. Tachi Akꞌõre–itꞌee pꞌoyaa ne–animal paa jõpi–eda aji, pꞌaa–e bɨ pɨrã.

Mãgá Davidpa ma eujã neto ataji chi pꞌakꞌaarã ome. Pꞌaratꞌa tau cincuenta pꞌaaji. 25Mama altar ooji mãikꞌaapa ma ne–animalaarã peepꞌeda, Tachi Akꞌõre–itꞌee paa jõpiji. Ichiaba awaraa ne–animalaarã paaji, jedekꞌoitꞌee arii pꞌanadapꞌedaa israelitaarã ome. Tachi Akꞌõrepa mãga unukꞌãri mãikꞌaapa Davidpa ɨtꞌaa iidida israelitaarã pari ũrikꞌãri, ma kꞌayaa kꞌachia wẽpapiji israelitaarã eujãdeepa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index