Search form

2 Samuel 4

Isboset peedapꞌedaa

1Saúl warra Isbosetpa kꞌawaakꞌãri Abner piuda Hebronde, ãchobeedachi, awaraa israelitaarã paara. 2Maapai Isbosetpa ichi jua ekꞌari ɨmɨkꞌĩraarã omé iru baji. Mãɨrã nechɨapataarã poro waibɨarã paji. Aba tꞌɨ̃jarapachida Baná; chi apema Recab. Mãɨrã Berot pꞌuurudepema Rimón warrarã paji mãikꞌaapa Benjamín ëreerãdepemaarã paji, 3chonaarãweda Berot pꞌuurudepemaarã Guitayin pꞌuurude miru pꞌananadapꞌedaa perã. Mama awaraa eujãdepemaarãkꞌa pꞌaneejida. Atꞌãri mama pꞌanapata.

4(Saúl warra Jonatanpa warra iru baji. Mãgɨ́ tꞌɨ̃jarapachida Mefiboset. Bɨɨrɨ omeeweda chiwa baji. Mefiboset año joisomaa iru baji, Jezrel eujãdeepa jara chedakꞌãri Saúl Jonatán ome piudapꞌedaa. Mãga ũrikꞌãri, chi akꞌɨparipa isapai iru awara ãyaa ateerude, juadeepa baaidachi. Mãgá iru bɨɨrɨ omeeweda chiwa beeji.)

5Ewari aba ma Berot pꞌuurudepema Rimón warrarã Baná Recab ome wãjida Isboset temaa. Imatꞌɨpa panajida hora wãsiara bɨde. Ma horade 6ãrapa seewatapai iidinadaitꞌee paji teeda tꞌĩupimerã trigo atade. Mamĩda chi puerta jɨ̃apari trigo jari bapꞌeda, aukꞌa kꞌãidai baji. Mapa irua unu–e paji mãɨrã teeda tꞌĩudakꞌãri. 7Mãgá Isboset ichi camade kꞌãi bɨde su peetꞌaajida mãikꞌaapa chi poro tꞌɨɨ atadapꞌeda, ãchi ome ateejida. Ma pꞌãrikꞌua Arabá eujã apatapꞌedaa wãyaapari ode wãjida.

8Rey David badamãi Hebronde panadakꞌãri, irumaa mãgajida:

—Rey Waibɨa, nama iru pꞌanɨda ajida, Saúl warra Isboset poro. Saulpa pɨ kꞌĩra unuamaa iru bapachi mãikꞌaapa pɨ peepi kꞌinia bapachi. Mamĩda ma pari idi Tachi Akꞌõrepa Sauldeerã kꞌachia ooji.

9Mamĩda Davidpa Rimón warrarã Recabmaa mãikꞌaapa Banamaa mãgaji:

—Tachi Akꞌõre, chi ichita chokꞌai bɨpa mɨ kꞌaripapari kꞌachiade baainaamerã. Iru kꞌĩrapite mɨa nãga juraa bɨ. 10Eperãpa Saúl piuda mɨmaa jara chekꞌãri mɨ o–ĩa beei jĩakꞌaapa, ma kꞌãyaara mɨ tꞌãri pꞌua baji rey piuda perã. Maperã Siclag pꞌuurude ma jara cheda atapipꞌeda, peepiji. 11Ɨ̃rá audupɨara mɨa mãga ooitꞌee parã ne–inaa kꞌachia ooyaa beerã ome, parãpa Isboset peedapꞌedaa perã ichi tede kꞌãi bɨde, irua parãmaa ne–inaa kꞌachia oo–e paji mĩda. Tꞌãri kꞌachiapa parãpa iru peetꞌaajida. Ɨ̃rá parã jida irukꞌa piudaitꞌeeda aji.

12Aramata Davidpa ichi jɨ̃apataarãmaa jaraji ãchi omeeweda peetꞌaadamerã. Ma kꞌapꞌɨa piuda jua, bɨɨrɨ ome tꞌɨapꞌejida mãikꞌaapa chi kꞌapꞌɨa baijira bɨjida Hebrón pꞌuurudepema pania tꞌɨpatamãi kꞌaitꞌa. Mamĩda Isboset poro ateejida Hebronde ɨadaitꞌee Abner ɨadapꞌedaamãi.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index