Search form

2 Samuel 5

David awaraa israelitaarã rey pada

(1 Crónicas 11.1-3)

1Ma tꞌẽepai Israel eujãdepema ëreerã chaadepemaarã wãjida Hebrondee David ome pedeede. Mãgajida:

—Rey Waibɨa, tachi aukꞌaarãda ajida. 2Naaweda Saúl tai rey paji mĩda, pɨta soldaorã ome wãpachi awaraa eujãdepemaarã ome chõode tai kꞌapꞌɨa pari. Ma awara Tachi Akꞌõrépata pɨmaa nãga jaraji: “Pɨa mɨ pꞌuuru pidaarã akꞌɨpariitꞌeeda aji, ovejaarã akꞌɨparipa ichi ovejaarã akꞌɨparikꞌa mãikꞌaapa ãra poro waibɨa paitꞌee.”

3Mãgá Hebrón pꞌuurude israelitaarã poro waibɨarã jõmaweda David ome pedeejida. Mãpai Tachi Akꞌõre kꞌĩrapite Davidpa ãra ome pacto ooji. Tꞌẽepai ãrapa aceite weejida David poro ɨ̃rɨ akꞌɨpidaitꞌee iru awara bɨ pꞌanɨ Israel eujãdepemaarã rey pamerã.

4David treinta año iru baji rey pakꞌãri. Cuarenta año rey paji. 5Siete año apꞌeda, atane seis David Judá ëreerãdepemaarã rey paji. Maapai Hebrón pꞌuurude bapachi. Ma tꞌẽepai treinta y tres año iru Judá ëreerãdepemaarã mãikꞌaapa awaraa Israeldeepa uchiadapꞌedaarã jõmaarã rey paji. Maapai Jerusalén pꞌuurude bapachi.

Davidpa jebuseorã pꞌuuru Jerusalén pꞌoyaada

(1 Crónicas 11.4-9)

6Mãgá David israelitaarã jõmaarã rey papꞌeda, ichi soldaorã ome uchiaji chõode. Wãjida jebuseorã pꞌuuru Jerusalendee. Ma jebuseorãpa kꞌĩsia pꞌanajida David ãchi pꞌuurude pꞌoyaa tꞌĩu–e pai. Maperã mãgajida: “Pɨ pꞌoyaa tꞌĩu–eda ajida, tai pꞌuurude. Tau pꞌãriu beerãpa, chiwa beerãpa paara parã tꞌĩupida–e paitꞌeeda” ajida. 7Mamĩda Davidpa jãri ataji ma pꞌuuru sur eere murallapa tꞌɨakꞌau bada soldaorã pꞌanadapꞌedaamãi, Sión apatapꞌedaa. Maadakꞌãriipa ma soldaorã pꞌanapatapꞌedaamãi tꞌɨ̃jarapachida David pꞌuuru.

8Ma ewate Davidpa mãgaji:

—Ma jebuseorã ome chõodaitꞌeerã, tꞌĩ́utɨ to chakꞌekꞌa wãyaa bɨ eere. Ma pꞌuurude panadakꞌãri, peekꞌoodapáde aji, jõmaweda ma tau pꞌãriu beerã apata mãikꞌaapa chiwa beerã apata, mɨa ãra kꞌĩra unuamaa iru bairã.

Maadamãiipa eperãarãpa jarapachida tau pꞌãriu beerã mãikꞌaapa chiwa beerã rey palaciode tꞌĩuda–e paitꞌeeda apachida.

9Ma pꞌuuru jãri atadapꞌedaa tꞌẽepai, David mama banaji soldaorã pꞌanapatapꞌedaamãi. Tꞌɨ̃ bɨji ‘David pꞌuuru’ mãikꞌaapa muralla oopiji mãgɨ́ pꞌuuru tꞌɨakꞌau beemerã, ee bideepa ichi palaciode parumaa.

Tirodepema rey Hirampa Davidmaa ne–inaa tee pëida

(1 Crónicas 14.1-2)

10David waibɨara pa wãji jõmaarã poro waibɨarã kꞌãyaara, Jõmaarã Akꞌõre Waibɨa iru ome bapachi perã. 11Maperã Tiro pꞌuurudepema rey Hirampa ichi jua ekꞌari beerã Davidmaa pëiji cedro pakꞌuru pia irumaa teedamerã. Ichiaba pëiji pakꞌuru tꞌẽ kꞌawaa pꞌanadapꞌedaarã mãikꞌaapa mãu sĩ kꞌawaa pꞌanadapꞌedaarã mãɨrãpa David–itꞌee te pi–ia oodamerã. 12Davidpa mãga unukꞌãri, wãara kꞌawaaji Tachi Akꞌõrepa ichi pꞌuuru pidaarã kꞌinia iru bada perã, iru israelitaarã rey papiji mãikꞌaapa ne–inaa jõmaade bendiciaji.

Davidpa awaraa warrarã ooda

(1 Crónicas 3.5-9; 14.3-7)

13David Hebrondeepa uchiakꞌãri Jerusalende banaitꞌee, awaraa wẽraarã ataji, wẽra kꞌãipariirã paara. Mãɨrã ome awaraa warrarã mãikꞌaapa kꞌaurã ooji. 14Nãgɨ́ warrarã tꞌojida Jerusalén pꞌuurude: Samúa, Sobab, Natán, Salomón, 15Ibjar, Elisúa, Néfeg, Jafía, 16Elisama, Eliadá mãikꞌaapa Elifelet.

Davidpa filisteorã pꞌoyaada

(1 Crónicas 14.8-17)

17Filisteorãpa kꞌawaadakꞌãri Israel eujãdepemaarãpa David rey papidapꞌedaa, chõode chejida. Mamĩda Davidpa mãga kꞌawaa atakꞌãri, ichi soldaorã ome tꞌĩuji ãchi soldaorã pꞌanapatapꞌedaamãi murallapa tꞌɨakꞌau badade. 18Mãpai ma filisteorã pꞌananajida Refayin eujã jewedaa jõmaade.

19Mãga kꞌawaakꞌãri, Davidpa Tachi Akꞌõremaa iidiji:

—¿Filisteorã ome chõode wãipia bɨkꞌã? aji. ¿Pɨa ãra mɨ juade baaipiitꞌeekꞌã? aji.

Tachi Akꞌõrepa pꞌanauji:

—Ãra ome chõode wãipia bɨda aji, mɨa ãra pɨmaa pꞌoyaapiitꞌee perã.

20Mãpai David ichi soldaorã ome chõonajida Baal Perazinde. Mama mãɨrã pꞌoyaajida. Maperã Davidpa mãgaji: “To kꞌida chaareepa to i ɨrapiparikꞌa, mãga pɨkꞌa Tachi Akꞌõrepa mɨ kꞌĩra unuamaa iru pꞌanapataarã mɨmaa pꞌoyaapijida” aji. Ma chõo pꞌanadapꞌedaamãi tꞌɨ̃ bɨji Baal Perasín, jara kꞌinia bɨ ‘Tachi Akꞌõrepa ɨrapida’. 21Ma filisteorã jĩchoo wãdakꞌãri, ãchi netꞌaa aɨ kꞌĩrapite ɨtꞌaa tꞌɨ̃pata atabaibëijida. Mãpai Davidpa ichi soldaorã ome ma netꞌaa pꞌe atajida.

22Mamĩda tꞌẽepai filisteorã waya chõo chejida eujã jewedaa Refayin jõmaade. 23Davidpa mãga kꞌawaakꞌãri, Tachi Akꞌõremaa waya iidiji.

Mãpai Tachi Akꞌõrepa pꞌanauji:

—Kꞌĩrapite eereepa chõonáaji. Ãra pꞌanɨmãi pꞌɨrrabai atapꞌedata, ãpɨteikꞌa eereepa wãpꞌeda bálsamo pakꞌuru jẽra bɨmãi, ãra ɨ̃rɨ wã́ji. 24Ma pakꞌuru ɨtꞌɨ́ biukꞌa ũrikꞌãri soldaorã tꞌɨapatakꞌa, ãra ome chõonapáde aji, mɨ parã naa wãitꞌee perã ma filisteorã soldaorã peede.

25Davidpa ooji Tachi Akꞌõrepa jaradakꞌa. Mãgá filisteorã soldaorã pꞌoyaa wãjida Gabaondeepa Guezerde parumaa.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index