Search form

2 Samuel 6

Davidpa Tachi Akꞌõre baaltekꞌa bɨ ateeda

(1 Crónicas 13.5-14)

1Davidpa waya Israeldepema soldaorã pipɨara pꞌanadapꞌedaarã treinta mil chipꞌe ataji. 2Mãɨrã chipꞌe ataji ichi ome wãdamerã Judá eujãdepema Balá pꞌuurudee Tachi Akꞌõre baaltekꞌa bɨ+ atade, Tachi Akꞌõre ma baaltekꞌa bɨ ɨ̃rɨ bapachi perã. 3Tachi Akꞌõre baaltekꞌa bɨ bɨjida carreta chiwidide mãikꞌaapa ateejida Abinadab te ee nokꞌode badadeepa. Abinadab warrarã Uza mãikꞌaapa Ajío ma carreta ome jĩte wãjida chi o jaratee wãdaitꞌee. 4Ajío Tachi Akꞌõre baaltekꞌa bɨ nokꞌoore wã nipaji; jõdee Uza aɨ ikꞌaawa wã nipaji. 5Ma carreta atee wãda misa, David israelitaarã ome o–ĩapa audú kꞌari wãjida mãikꞌaapa pëira wãjida nãgee chaa pꞌanɨde: arpa, salterio, pandereta, castañuela mãikꞌaapa címbalo. 6Eperã tꞌɨ̃jarapatapꞌedaa Nacón eujãde ichi netꞌa tau jariparimãi panadakꞌãri, pꞌakꞌa ma carreta jidiu atee wãdadapꞌedaarãpa tꞌẽneudachida. Mapa Uzapa Tachi Akꞌõre baaltekꞌa bɨ jitaji baaipiamaapa. 7Mamĩda Tachi Akꞌõre kꞌĩraudachi Uza ome, ma baaltekꞌa bɨ tꞌõbaida perã. Mapa iru mama peetꞌaaji. (Tachi Akꞌõre leyde jara baji apidaapa ichi baaltekꞌa bɨ tꞌõbainaadamerã.) Mãgá Uza ma carreta ikꞌaawa piu baaiji.

8Mãga unukꞌãri, David kꞌĩraudachi Tachi Akꞌõrepa Uza peeda perã. Maperã Davidpa ma punto tꞌɨ̃ bɨji Peres Uza+ Atꞌãri mama mãga tꞌɨ̃jarapata. 9Ma ewateweda David ãchobeedachi. Mãgaji: “Mãga pɨrã, mɨa Tachi Akꞌõre baaltekꞌa bɨ pꞌoyaa atee–eda” aji. 10Davidpa Tachi Akꞌõre baaltekꞌa bɨ David pꞌuuru+ apatapꞌedaadee atee kꞌinia–e pada perã, jaraji Obed Edom temaa ateedamerã. Ma eperã Gat pꞌuurudepema paji. 11Mãgá Tachi Akꞌõre baaltekꞌa bɨ atane õpee mama beeji. Mama bɨde Tachi Akꞌõrepa Obed Edom mãikꞌaapa ichi tedepemaarã bendiciaji.

Tachi Akꞌõre baaltekꞌa bɨ Jerusalende ateedapꞌedaa

(1 Crónicas 15.1–16.6)

12Rey Davidmaa nepɨrɨdakꞌãri Tachi Akꞌõre baaltekꞌa bɨ kꞌaurepa Obed Edom te pidaarã, ichi netꞌaa paara bendiciada, iru mamaa wãji mãikꞌaapa ma baaltekꞌa bɨ aneeji David pꞌuuru apatapꞌedaadee. Iru mãikꞌaapa iru ome nipadapꞌedaarã jõmaweda o–ĩa pꞌanajida. 13Chi baaltekꞌa bɨ atee wãdapꞌedaarã tꞌɨada seis tꞌɨadapꞌeda, Davidpa pꞌakꞌa mãikꞌaapa pꞌakꞌa kꞌaipee poree bada peepꞌeda, Tachi Akꞌõre–itꞌee paapiji. 14Ma chewãdade Davidpa efod linodee ooda jɨ̃ baji mãikꞌaapa audú o–ĩapa Tachi Akꞌõre–itꞌee pëira chewãji. 15Davidpa mãikꞌaapa israelitaarãpa Tachi Akꞌõre baaltekꞌa bɨ mãgá atee wãdakꞌãri, o–ĩapa bia chewãjida mãikꞌaapa trompeta chaa chewãjida.

16Tachi Akꞌõre baaltekꞌa bɨ David pꞌuurude pachekꞌãri, Saúl kꞌau, Micalpa+ ventanadeepa akꞌɨji. Irua unukꞌãri David Tachi Akꞌõre–itꞌee jɨ̃tɨ mãikꞌaapa pëira bɨ, David ome tꞌãri ãrii beeji.

17Ma baaltekꞌa bɨ bɨnajida te ne–edee oodade, Davidpa ma–itꞌee oopidamãi mãikꞌaapa Davidpa ne–animalaarã peepꞌeda, Tachi Akꞌõre–itꞌee paa jõpiji mãikꞌaapa awaraa ne–animalaarã paapiji ichi aukꞌaarã ome jedekꞌodaitꞌee. 18Maapꞌeda Jõmaarã Akꞌõre Waibɨa kꞌapꞌɨa pari Davidpa pedee pia jaraji arii pꞌanadapꞌedaa israelitaarãmaa. 19Mãpai arii pꞌanadapꞌedaarã ɨmɨkꞌĩraarãmaa, wẽraarãmaa paara Davidpa teeji pan, ne–inaa pꞌepꞌedee bɨ aba datiljõdee ooda mãikꞌaapa ne–inaa pꞌepꞌedee bɨ aba uva pꞌoodadee ooda. Maapꞌeda jõmaweda ãchi temaa erreu wãjida.

20David ichi temaa wãkꞌãri ichideerãmaa pedee pia jarade, Saúl kꞌau, Mical uchiapꞌeda, iru ɨtrɨaji:

—¿Pɨ–itꞌee pia bɨkꞌã aji, pɨ Israeldepema rey bɨta, kꞌĩra nejasia wẽe beerãkꞌa ãkꞌadaa pëira chekꞌãri pɨ mimiapataarã jua ekꞌari beerã esclavaarã taide?

21Davidpa pꞌanauji:

—Tachi Akꞌõre taide mɨ o–ĩapa pëira baji. Iruata mɨ rey bɨji pɨ akꞌõre pari mãikꞌaapa irudeerã jõmaarã pari. Irua kꞌinia baji mɨta israelitaarã poro waibɨa pamerã. Maperã mɨ iru–itꞌee pëira baji 22mãikꞌaapa mãgá pɨ taide mɨ audupɨara ekꞌariara beeru pɨjida, mɨa mãga oo bɨde jã esclavaarãpa mɨ pia akꞌɨdaitꞌee.

23Maperã Saúl kꞌau Mical warra tꞌo–ee piuji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index