Search form

2 Samuel 7

Tachi Akꞌõrepa Davidmaa jarapida

(1 Crónicas 17.1-7)

1Maapai rey David ichi palaciode kꞌãiwee bapachi, chõo–ee ichi kꞌĩra unuamaa iru pꞌanapatapꞌedaarã ome.

2Mãga nɨde rey Davidpa jaraji Tachi Akꞌõre pedee jarapari Natanmaa:

—Pɨa unu bɨkꞌa, mɨ palacio pi–ia cedro pakꞌurudee oodade bapari. Jõdee Tachi Akꞌõre baaltekꞌa bɨ jĩpꞌa cortina teesoo tꞌɨakꞌau bɨde bɨda aji.+

3Natanpa pꞌanauji:

—Rey Waibɨa, pɨa oo kꞌinia bɨta ooipia bɨda aji, Tachi Akꞌõre pɨ ome bapari perã.

4Mamĩda ma ewate pꞌãrikꞌua Tachi Akꞌõrepa Natanmaa mãgaji:

5—Nãga jaranapáde aji, mɨ mimiapari Davidmaa: “Tachi Akꞌõrepa nãga jara bɨ: ‘Pɨata mɨ–itꞌee te oo–e paitꞌee, mɨ aɨde bapariimerã. 6Mɨa israelitaarã Egipto eujãdeepa uchiapidakꞌãriipa ɨ̃rá parumaa, mɨ te pakꞌurudee oodade bakꞌaa. Jĩpꞌa ãra wãrutamaa mɨ bapari te ne–edee oodade. 7Mɨ ãra ome nipakꞌãri mãikꞌaapa ãra poro waibɨarãmaa jarakꞌãri ãra akꞌɨpataadamerã oveja akꞌɨparipa ichi ovejaarã akꞌɨparikꞌa, maarepida iidi–e paji mɨ–itꞌee te cedrodee oodamerã.’ 8Maperã nãga jarapáde aji, mɨ mimiapari Davidmaa: ‘Jõmaarã Akꞌõre Waibɨapa jara bɨ: Mɨa pɨ uchiapiji ovejaarã akꞌɨ badamãiipa israelitaarã poro waibɨa papiitꞌee. 9Mɨ pɨ ome bapari pɨchi wãrumaa. Pɨ kꞌapꞌɨa mɨa ãra kꞌĩra unuamaa iru pꞌanapataarã jõpiji. Idideepa jõmaarãpa pɨ tꞌɨ̃ tꞌo pꞌanadaitꞌee na eujãdepemaarã poro waibɨara beerã tꞌɨ̃kꞌa. 10Mɨa na eujã awara bɨji mɨ pꞌuuru pidaarã, israelitaarã aɨde kꞌãiwee pꞌanapataadamerã. Ne–inaa kꞌachia ooyaa beerãpa ãra pꞌerapida–e paitꞌee naawedapemakꞌa, 11mɨa poro waibɨa awara–awaraa bɨda jua ekꞌari pꞌanadakꞌãri. Pɨa mɨ pꞌuuru pidaarã akꞌɨ bapariitꞌee. Ma awara mɨa pɨ jɨ̃aitꞌee pɨ kꞌĩra unuamaa iru pꞌanapataarã juade baainaamerã mãikꞌaapa pɨmaa warrarã oopiitꞌee.+ 12Pɨ piukꞌãri mãikꞌaapa pɨ ɨadakꞌãri pɨchi akꞌõreerã ɨadapꞌedaamãi, mɨa pɨdeepa uchiada aba rey bɨitꞌee pɨ pari, mɨ pꞌuuru pidaarã akꞌɨ bapariimerã. 13Mãgɨ́pata mɨ–itꞌee te ooitꞌee. Mɨa iru bɨitꞌee ichita rey pamerã. 14Mɨ iru akꞌõre paitꞌee; jõdee iru mɨ warra paitꞌee. Irua ne–inaa kꞌachia ookꞌãri, mɨa iru miapiitꞌee, akꞌõre jĩpꞌaapa ichi warra ome ooparikꞌa. 15Mamĩda mɨa iru ichita kꞌinia iru bapariitꞌee. Iru ikꞌaawaapa ãyaa wã–e paitꞌee mɨ Saúl ikꞌaawaapa ãyaa wãdakꞌa, iru pari pɨ rey bɨkꞌãri. 16Pɨdeepa uchiadaitꞌeerã ichita rey padaitꞌeeda aji, mɨa ichita ãra akꞌɨ bapariitꞌee perã.’ ”

17Mãpai Natanpa Tachi Akꞌõrepa kꞌawapida jõmaweda Davidmaa jaranaji.

David ɨtꞌaa tꞌɨ̃da

(1 Crónicas 17.16-27)

18Davidpa mãga ũrikꞌãri, Tachi Akꞌõre baaltekꞌa bɨmãi tꞌĩuji mãikꞌaapa nãga ɨtꞌaa tꞌɨ̃ji:

—Jõmaarã Akꞌõre Waibɨa, pɨ Tachi Akꞌõre. ¿Kꞌaima aji mɨ, pɨa mɨchideerã nãgá audú pia akꞌɨ bamerã? 19Jõmaarã Akꞌõre Waibɨa, pɨ Tachi Akꞌõre. Pɨa mɨmaa pia ooji mɨ israelitaarã rey bɨkꞌãri. Ɨ̃rá ma kꞌãyaara piara jara bɨ mɨdeepa uchiadaitꞌeerã pia ooitꞌee. Jõmaarã Akꞌõre Waibɨa, Tachi Akꞌõre, ¿nãgata pɨa eperãarã pia ooparikꞌã? ¡Awaraa pɨkꞌa wẽ–e! 20Jõmaarã Akꞌõre Waibɨa, mɨchi Akꞌõre Waibɨa, ¿mɨa waa kꞌãata jaraima? Pɨa mɨ, pɨchi mimiapari, pia kꞌawa bɨda aji. 21Pɨa kꞌinia bada perã, na ne–inaa pi–ia jõmaweda ooji pɨa jaradakꞌa, mɨa ma jõma kꞌawaamerã. 22Jõmaarã Akꞌõre Waibɨa, wãara pɨ jõmaarã kꞌãyaara waibɨara bɨ. Taipa ũridooda wãara; awaraa Akꞌõre Waibɨa pɨkꞌa wẽ–e. Awaraa eujãdepemaarã akꞌõre waibɨa apataarãpa maarepida pꞌoyaa ooda–e pɨa ooparikꞌa. 23Ichiaba awaraa pꞌuuru pidaarã wẽ–e pɨa pꞌuuru pidaarã jɨrɨtꞌerada, israelitaarãkꞌa. Pɨa pɨ pꞌuuru pidaarã uchiapiji Egipto pidaarã juadeepa pꞌanapataadamerã pɨa kꞌinia bɨkꞌa. Ma awara ãra–itꞌee ne–inaa pi–ia ooji; ne–inaa eperãarãpa pꞌoyaa oodakꞌaa ãchi juadoopa. Mapa jõmaarãpa pɨ pꞌuuru pidaarã tꞌo pꞌanapata. Pɨa na eujãdepemaarã ãchi akꞌõre waibɨa apataarã ome jërekꞌooji pɨ pꞌuuru pidaarã naa. 24Mãga ooji israelitaarã pɨchi pꞌuuru pidaarã ichita padamerã mãikꞌaapa pɨ ãra Akꞌõre Waibɨa ichita pamerã.

25’Jõmaarã Akꞌõre Waibɨa, Tachi Akꞌõre, ichita pɨa jaradakꞌa óoji mɨdeepa uchiadaitꞌeerã ome. Mɨ pɨ mimiapari. Óoji pɨa jaradakꞌa. 26Mãgá eperãarãpa pɨ tꞌɨ̃ tꞌo pꞌanadaitꞌee mãikꞌaapa jaradaitꞌee: ‘‘¡Jõmaarã Akꞌõre Waibɨa israelitaarã Akꞌõre Waibɨa!’’ Mɨ, pɨ mimiaparipa kꞌinia bɨ pɨa ichita mɨdeepa uchiadaitꞌeerã rey papimerã. 27Jõmaarã Akꞌõre Waibɨa, israelitaarã Akꞌõre Waibɨa, pɨata mɨmaa kꞌawapiji mɨdeepa uchiadaitꞌeerã ichiaba rey padaitꞌee. Mapa mɨ, jĩpꞌa pɨ mimiapari bɨ mĩda, pɨmaa nãga ɨtꞌaa tꞌɨ̃maa bɨ. 28Mɨchi Akꞌõre Waibɨa, pɨ ichita Jõmaarã Akꞌõre Waibɨa paitꞌee. Pɨa ichita oopari pɨa jaradakꞌa. Jaraji mɨ, pɨ mimiapari pia ooitꞌeeda aji. 29Mapa mɨ, pɨ mimiaparipa chupɨria iidimaa bɨ pɨa mɨdeepa uchiadaitꞌeerã bendiciamerã, mãgá ãchi pɨ jua ekꞌari ichita pia pꞌanapataadamerã. Pɨ, Jõmaarã Akꞌõre Waibɨapa mɨmaa mãga jaraji. Pɨa ãra mãgá bendiciakꞌãri, ichita ãra pia pꞌanapataadaitꞌeeda aji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index