Search form

2 Samuel 8

David ichi eere pꞌanadapꞌedaarã ome chõode wãdapꞌedaa

(1 Crónicas 18.1-13)

1Ma tꞌẽepai Davidpa ichi eere pꞌanadapꞌedaarã ome filisteorã pꞌoyaajida. Mãga oo jõnɨde Méteg Amá pꞌuuru jãri atajida. Maadakꞌãriipa israelitaarã waa pꞌanadakꞌaa paji filisteorã jua ekꞌari. 2Ichiaba Davidpa ichi eere pꞌanadapꞌedaarã ome Moab eujãdepemaarã pꞌoyaajida. Mãgá chõo jõnɨ misa, mãɨrã soldaorã jẽra beepidapꞌeda, cuerdapa chaajida. Chi teesoo ma cuerda omé uchiakꞌãri, peekꞌoopachida. Cuerda teesoo apai uchiakꞌãri, chokꞌai bɨpachida. Mãga oojida jõmaweda soldaorã chaa auparutamaa. Tꞌẽepai ma Moab eujãdepemaarã, chokꞌai pꞌaneedapꞌedaarãpa pꞌaratꞌa tee pëipachida Davidmaa iru jua ekꞌari pꞌaneedapꞌedaa perã.

3Davidpa ichi eere pꞌanadapꞌedaarã ome ichiaba pꞌoyaajida Sobadepema rey Rejob warra Hadad Ezer. Mãgɨ́ ichi soldaorã ome Éufrates to kꞌaitꞌa wã baji ma eujãdepemaarã waya ichi jua ekꞌari bɨitꞌee naawedapemakꞌa. 4Ma chõodapꞌedaade Davidpa ichi eerepemaarã ome atadachida Hadad Ezer jua ekꞌari beerã soldaorã mil setecientos caballode wãdapꞌedaarã mãikꞌaapa veinte mil jĩte wãdapꞌedaarã. Ma awara ãchi carreta jidiupata caballoorã jĩru kꞌõrakꞌoo wãjida. Aba kꞌõrada–e paji caballoorã cien carreta jidiu pꞌanadapꞌedaarã.

5Ma tꞌẽepai Damasco pꞌuuru ikꞌaawa bada eujãdeepa siriorã pachejida Sobadepema rey Hadad Ezer kꞌaripade. Mamĩda Davidpa ichi eerepemaarã ome ma siriorã veintidós mil peejida. 6Maapꞌeda Davidpa soldaorã pëiji ma Damasco eujã jɨ̃ade. Mãgá ma siriorã David jua ekꞌari pꞌaneejida mãikꞌaapa irumaa pꞌaratꞌa pꞌaapachida. Maapai David chõonada chaa Tachi Akꞌõrepa kꞌaripaji iru eere pꞌanadapꞌedaarãpa pꞌoyaadamerã.

7Hadad Ezer soldaorã pꞌoyaapꞌeda, Davidpa iru jɨ̃apatapꞌedaarã escudo nẽedee ooda jãri ataji mãikꞌaapa Jerusalendee ateeji. 8Ichiaba Davidpa Tébaj+ mãikꞌaapa Berotay pꞌuurudepema netꞌaa broncedee ooda chokꞌara jãri ataji. Ma pꞌuuru Hadad Ezer jua ekꞌari pꞌanajida.

9Jamatdepema rey Toupa kꞌawaa atakꞌãri Davidpa rey Hadad Ezer iru soldaorã ome pꞌoyaada, 10ichi warra Jorán Davidmaa pëiji. Iru ome tee pëiji netꞌaa pꞌaratꞌadee ooda, nẽedee ooda mãikꞌaapa broncedee ooda. Salude jara pëiji mãikꞌaapa jara pëiji ichi o–ĩa bɨ David ome, ma Hadad Ezer pꞌoyaada perã. Mãgá o–ĩa baji aɨ naaweda ichi ma rey ome chõopachi perã. 11Davidpa ma netꞌaa jõmaweda Tachi Akꞌõre–itꞌee awara bɨji, awaraa netꞌaa nẽedee ooda mãikꞌaapa pꞌaratꞌadee ooda ome. Ichi eere pꞌanadapꞌedaarãpa ma netꞌaa jãri atajida jura chõodakꞌãri nãgɨ́ eperãarã ome: 12Edom eujãdepemaarã, Moab eujãdepemaarã, amonitaarã, filisteorã, amalecitaarã mãikꞌaapa Sobadepema Rejob warra rey Hadad Ezer eere pꞌanadapꞌedaarã ome.

13Maapai jõmaarãpa rey David tꞌo pꞌanapachida siriorã ome chõo bapꞌeda, ãpɨtee chewãdade dieciocho mil Edomdepemaarã pꞌoyaadapꞌedaa perã eujã jewedaa ‘de la Sal’ apatapꞌedaade. 14Ma tꞌẽepai Davidpa soldaorã pëiji Edom eujã jõmaade jɨ̃a pꞌanapataadamerã. Mãgá Edomdepemaarã jõmaweda David jua ekꞌari pꞌaneejida. Tachi Akꞌõrepa David kꞌaripa baji iru wãrumaa chõo pꞌoyaamerã.

Poro waibɨarã David jua ekꞌari pꞌanadapꞌedaa

(2 Samuel 20.23-26; 1 Crónicas 18.14-17)

15David Israel eujã jõmaadepema rey paji. Ichi jua ekꞌari pꞌanadapꞌedaarã jõmaweda pia akꞌɨpachi Tachi Akꞌõrepa kꞌinia badakꞌa. 16Iru soldaorã poro waibɨara bada Sarvia+ warra Joab paji. Ajilud warra Josafat rey secretario paji. 17Ajitob warra Sadoc mãikꞌaapa Abiatar warra Ajimélec iru jua ekꞌari pꞌaareerã paji. Seraías reypa oopariida pꞌãpari paji. 18Joyadá warra Benaías rey jɨ̃apataarã, quereteorã mãikꞌaapa peleteorã poro waibɨa paji. Jõdee David warrarã ichi jua ekꞌari mimiapatapꞌedaarã poro waibɨarã paji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index