Search form

2 Samuel 9

Davidpa Mefiboset pia akꞌɨ bada

1David jura chõo bapꞌeda, ichi pꞌuurude beeji.

Ewari aba chi mimiapataarãmaa nãga iidiji:

—¿Saúl ëreerã atꞌãri paraakꞌã aji, mɨa pia ooitꞌee Jonatán kꞌapꞌɨa pari?

2Mãpai iru mimiapataarãpa jara pëijida Saúl mimiapataarã poro waibɨa pada, Siba Davidmaa chemerã.

Ma Siba David kꞌĩrapite pakꞌãri, Davidpa iidiji:

—¿Pɨkꞌã aji, Siba?

Sibapa pꞌanauji:

—Rey Waibɨa, mɨda aji. Pɨa jara bɨkꞌa oo kꞌinia bɨda aji.

3Mãpai reypa iidiji:

—¿Sauldeepa uchiada apida baparikꞌã aji, mɨa chupɨria kꞌawaaitꞌee Tachi Akꞌõrepa kꞌinia bɨkꞌa?

Mãpai Sibapa pꞌanauji:

—Jonatán warra aba baparida aji. Mãgɨ́ jĩru omeeweda chiwa bɨda aji.

4Mãpai Davidpa iidiji:

—¿Sãma bɨma? aji.

Irua pꞌanauji:

—Lo Debar pꞌuurude baparida aji, Amiel warra Maquir tede.

5Mãpai rey Davidpa jaraji Lo Debardee wãdapꞌeda, Amiel warra Maquir tedeepa Jonatán warra aneedamerã. 6Mãgɨ́ Saúl ãichakꞌe, Jonatán warra Mefiboset David kꞌĩrapite pakꞌãri, bedabaidachi ichi tau bɨɨrɨ eujãde tꞌõbairumaa akꞌɨpiitꞌee David waawee bɨ.

Mãpai Davidpa iidiji:

—¿Pɨ Mefibosetkꞌã? aji.

Irua pꞌanauji:

—Pɨa jara bɨkꞌa oo kꞌinia bɨda aji.

7Davidpa mãgaji:

—Waaweenáaji. Pɨ akꞌõre Jonatán kꞌaurepa mɨa pɨ pia akꞌɨ bapariitꞌee. Pɨ akꞌõchona Saúl eujã jõma iru bada pɨmaa teeitꞌee. Ma awara pɨ ichita mɨ ome mɨchi mesade nekꞌopariitꞌeeda aji.

8Mãpai Mefiboset waya bedabaidachi mãikꞌaapa mãgaji:

—¿Sãapꞌeda kꞌĩsia bɨma aji, mɨ, pɨ mimiapari, kꞌaripaitꞌee? Pɨ kꞌĩrapite mɨ usa piudakꞌa bɨda aji.

9Mefibosetpa mãga jaraji mĩda, rey Davidpa Saúl mimiapataarã poro waibɨa pada Siba tꞌɨ̃piji mãikꞌaapa mãgaji:

—Pɨ chipari pada ãichakꞌemaa mɨa tee bɨda aji, ne–inaa jõmaweda Sauldeerãpa iru pꞌanadapꞌedaa. 10Maperã mɨa nãga jara bɨ pɨa oomerã. Pɨ, pɨchi warrarã ome mãikꞌaapa pɨ mimiapataarã ome ma eujãde mimiadaitꞌee Mefiboset pari. Netꞌa tau ewadakꞌãri, irudeerã–itꞌee ɨa bɨdaitꞌee. Mamĩda Mefiboset ichita mɨchi mesade nekꞌopariitꞌeeda aji. (Maapai Sibapa warrarã quince mãikꞌaapa mimiapataarã veinte iru baji.)

11Mãpai Sibapa reymaa pꞌanauji:

—Rey Waibɨa, jõmaweda pɨa mɨmaa jara bɨkꞌa mɨa ooitꞌeeda aji.

Maadakꞌãriipa Mefiboset nekꞌopachi rey mesade, rey warrarãkꞌa. 12Mefibosetpa warra aba iru baji; tꞌɨ̃jarapachida Micaías. Sibadeerã jõmaweda mimiapachida Mefiboset pari. 13Mamĩda Mefiboset, chi bɨɨrɨ omeeweda chiwa bada, Jerusalende bapachi, rey mesade nekꞌopachi perã.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index