Search form

Ester 2

Rey Asueropa Ester reina papida

1Ma tꞌẽepai rey Asuero kꞌĩrau wẽpakꞌãri, chi wẽra pada Vasti kꞌirãpaji. Kꞌirãpaji ichia ooda Vastimaa mãikꞌaapa ichia jarada Vasti ãpɨte.

2Maapai chi akꞌɨpataarãpa irumaa mãgajida:

—Awẽraarã kꞌĩra wãree, waide ɨmɨkꞌĩra ome kꞌãi–ee beerã jɨrɨpipáde ajida, mãɨrãdepema aba reina papimerã. 3Pɨ jua ekꞌari eujã bee chaa eperã bɨipia bɨ mãgee awẽraarã aneedamerã pɨchi wẽraarã palaciode, Susa ciudadelade. Mãpai ma awẽraarã bɨipia bɨ pɨ ekꞌari beerãdepema eunuco Jegay jua ekꞌari, ma awẽraarã jɨ̃amerã pɨchi wẽraarã awaraarã ome. Mãpai Jegaymaa jaraipia bɨ irua ma awẽraarãmaa ne–inaa oopimerã audupɨara kꞌĩra wãree pꞌaneedamerã. 4Maapꞌeda pɨa chi wẽra pi–iara bɨ jɨrɨtꞌeraipia bɨ mãikꞌaapa Vasti pari reina papiyada ajida.

Reypa ma ũraa ũrikꞌãri, ijãaji mãikꞌaapa ooji mãɨrãpa jaradapꞌedaakꞌa.

5Ma Susa ciudadelade bapachi judío aba, tꞌɨ̃jarapatapꞌedaa Mardoqueo. Mãgɨ́ eperã Yaír warra paji. Simideepa uchiada mãikꞌaapa Benjamín ëreerãdepema Cisdeepa uchiada paji. 6Ma judío Susade bapachi Babiloniadepema rey Nabucodonosorpa ichi chonaarã aneeda perã awaraa Jerusalendepemaarã ome mãikꞌaapa Judadepema rey Jeconías ome. 7Mardoqueopa ichi prima wari wãji, ma awẽra akꞌõreerã jai–idaadapꞌedaa perã. Ichi kꞌaukꞌa iru baji. Hebreo pedeede ma awẽra tꞌɨ̃jarapachida Jadasá; Persiadepemaarã pedeede tꞌɨ̃jarapachida Ester. Kꞌĩra wãree baji; kꞌapꞌɨa jida pi–ia baji. 8Rey jua ekꞌari pꞌanapatapꞌedaarãpa irua jara pëida ũridakꞌãri, awẽraarã chokꞌara ateejida rey palaciode Susa ciudadelade. Ma awẽraarã bɨjida rey wẽraarã akꞌɨpari Jegay jua ekꞌari. Ester jida jɨrɨtꞌerajida. 9Jegaypa Ester unukꞌãri, pi–ia unuji. Mapa aweda ne–inaa oopiji kꞌĩra wãreera beemerã. Ichiaba Estermaa chikꞌo piara teepachi. Awẽraarã mimiapataarã siete jɨrɨtꞌeraji Ester jua ekꞌari bɨitꞌee mãikꞌaapa Ester ãra ome awara bɨji rey wẽraarã palaciodepema pipɨara bɨ cuartode pꞌanapataadamerã.

10Maapai Esterpa maarepida ichi aukꞌaarãde wa chi akꞌõreerãde jara–e paji, Mardoqueopa jarada perã mãgee nepɨrɨnaamerã. 11Ewari chaa Mardoqueo rey wẽraarã palacio kꞌĩrapite wãpachi Ester iidide. Irua mãga oopachi kꞌinia bada perã Ester pia akꞌɨ pꞌanadamerã.

12Atane doce wãyaarude Jegaypa ne–inaa oopiji ma awẽraarã rey wẽraarã palaciode pꞌanadapꞌedaarãmaa, kꞌĩra wãreera pꞌaneedamerã. Chi naapema atane seis wãyaaru misa, ãchi kꞌapꞌɨa pꞌurupiji aceite mirradee oodapa. Apema atane seis wãyaaru misa, ãra kꞌapꞌɨa pꞌurupiji kꞌerapa mãikꞌaapa awaraa ne–inaa wẽraarãpa pꞌurupatapa. Mãga oodapꞌeda, ma awẽraarã aba–abaa ateeji rey Asuero kꞌĩrapite irua pia akꞌɨmerã. 13Rey wẽraarã palaciode netꞌaa pꞌe iru pꞌanadapꞌedaadepema ãramaa teeji, mãgá ãchi rey kꞌĩrapite wãdakꞌãri, ãchia atee kꞌiniata ateedamerã. 14Pꞌãrikꞌua ma wẽraarã aba–abaa tꞌĩujida rey palaciode. Mãpai aɨ norema waya wãjida rey wẽraarã palaciodee mãikꞌaapa awaraa cuartode pꞌaneejida rey jua ekꞌari beerãdepema eunuco tꞌɨ̃jarapatapꞌedaa Sasgaz jua ekꞌari. Mãgɨpa akꞌɨpachi reypa awaraa wẽraarã iru bada. Wẽra rey kꞌĩrapite bapꞌeda, irumaa waya wãkꞌaa paji, irua tꞌɨ̃ pëi–emãi. Ma wẽra kꞌinia bakꞌãri, waya tꞌɨ̃ pëipachi.

15Ester Abijaíl kꞌau paji. Chi chĩapa Mardoqueo paji. Ester rey kꞌĩrapite wãkꞌãri, ichi akꞌɨpari Jegaypa Estermaa netꞌaa reypa audú kꞌinia badata ateepiji. Irua mãga ooji rey pia kꞌawa bada perã. Maapai Ester kꞌawa pꞌanadapꞌedaarãpa iru pia akꞌɨpachida.

16Asuero siete año rey bɨde atane diez tebetde Ester ateejida rey palaciode iru kꞌĩrapite. 17Rey Asueropa Ester unukꞌãri, iru pia akꞌɨji mãikꞌaapa kꞌinia beeji. Awaraa awẽraarã kꞌinia–e paji Ester kꞌinia badakꞌa. Maperã rey Asueropa Ester jɨrɨtꞌeraji awaraa awẽraarã ɨmɨkꞌĩraarã ome waide kꞌãi–ee pꞌanadapꞌedaarã kꞌãyaara mãikꞌaapa irua Ester porode reina poro jɨ̃ra, Vastide pada jɨ̃ bɨji. 18Ma tꞌẽepai rey Asueropa fiesta waibɨa ooji Ester–itꞌee. Jara pëiji poro waibɨarã mãikꞌaapa mimiapataarã ichi jua ekꞌari beerã jõmaweda ma fiestade chedamerã. Ichi jua ekꞌari pꞌanapatapꞌedaarãmaa jara pëiji ma ewate ɨ̃idamerã. Ma fiestade reypa netꞌaa pia chokꞌara teeji.

Mardoqueopa kꞌawa atada kꞌachia beerãpa pedeeteedapꞌedaa rey peetꞌaadaitꞌee

19Awẽraarã waya chipꞌe atadakꞌãri ateedaitꞌee awara cuarto rey wẽraarã palacio pꞌanapatapꞌedaade, Mardoqueo su–akꞌɨ baji+ rey palaciodepema puerta kꞌaitꞌa. 20Mardoqueopa ũraadakꞌa Esterpa maarepida ichideerãde wa ichi aukꞌaarãde jara–e paji. Iru ome bapariikꞌãri oopariidakꞌa ichita ne–inaa jõmaweda Mardoqueopa jaradakꞌa oopachi.

21Mardoqueo mama rey palaciodepema puerta kꞌaitꞌa su–akꞌɨ bɨde, ma puerta jɨ̃apataarã pedee pꞌanajida. Ma eunucoorã rey jɨ̃apataarã omé paji: Bigtán mãikꞌaapa Teres. Mãɨrã kꞌĩrau pꞌanadapꞌedaa perã rey Asuero ome, pedeetee pꞌanajida iru peetꞌaadaitꞌee. 22Mardoqueopa kꞌawaa atakꞌãri, Reina Estermaa jarakꞌooji. Mãpai Esterpa reymaa jaranaji Mardoqueopa ichimaa jarada. 23Rey jua ekꞌari beerãpa jɨrɨdakꞌãri kꞌawaadaitꞌee wãara wa seewa, kꞌawaajida wãara ma eunuco omeerãpa pedeetee pꞌanadapꞌedaa rey peetꞌaadaitꞌee. Mapa ma rey jua ekꞌari pꞌanadapꞌedaarãpa ma eperãarã otaude jɨ̃ nɨ̃bɨjida ɨ̃yapa jɨ̃adarutamaa. Mãga oodapꞌeda, rey kꞌĩrapite ma eperãarãpa oodapꞌedaa pꞌãpijida Persiadepema reyrãpa oopatapꞌedaa pꞌãpatapꞌedaade.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index