Search form

Ester 3

Amanpa judiorã kꞌĩra unuamaa iru bada

1Ma tꞌẽepai rey Asueropa Agagdeepa uchiada Hamedata warra tꞌɨ̃jarapatapꞌedaa Amán bɨji ichi jua ekꞌari beerã poro waibɨarã kꞌãyaara poro waibɨara pamerã. 2Mãpai reypa jaraji ichi palaciodepema puerta jɨ̃apataarã jõmaarãmaa bedabaipataadamerã mãikꞌaapa ɨ̃jaabaipataadamerã Amán unudakꞌãri. Mamĩda Mardoqueopa mãga ookꞌaa paji.

3Mãga unudakꞌãri, rey akꞌɨpataarãpa Mardoqueomaa iidijida:

—¿Sãapꞌeda pɨa reypa jaradakꞌa oo–e bɨma? ajida.

4Ewari chaa mãga iidipachida.

Mamĩda Mardoqueopa atꞌãri ookꞌaa paji reypa jaradakꞌa. Ãramaa mãgaji:

—Judío eperã kꞌĩrapite bedabaiikꞌaraa bɨda aji.

Maperã jarakꞌoonajida Amanmaa kꞌawaadaitꞌee irua kꞌãata ooi Mardoqueo ome.

5Amán kꞌĩraudachi kꞌawaakꞌãri Mardoqueo ichi kꞌĩrapite bedabaikꞌaa mãikꞌaapa ichi unukꞌãri, ɨ̃jaabaikꞌaa. 6Kꞌĩsiaji Mardoqueo peetꞌaaitꞌee. Mamĩda kꞌawaakꞌãri Mardoqueo judiota maa bɨ, kꞌĩsia awara ataji; judiorã jõmaweda rey Asuero jua ekꞌari pꞌanapatapꞌedaarã+ peekꞌooitꞌee.

Amanpa ley ooda judiorã jõtꞌaadamerã

7Mãgá Asuero doce año rey bɨde naarapema atane nisande Amán kꞌĩrapite suerte+ jemenejida kꞌawaadaitꞌee chisãgɨ́ ewate ma kꞌĩsia iru bada oodaipia bɨ. Jemenedakꞌãri, ewari trece atane doce adarde uchiaji.

8Mãpai Amanpa rey Asueromaa mãgaji:

—Mɨchi Rey Waibɨa, pɨ jua ekꞌari awaraa eujãdepemaarã chokꞌara pꞌanapata. Mamĩda madepema ũkꞌuru awara pꞌanapata apemaarã kꞌãyaara. Ley awara iru pꞌanɨ perã, pɨa jara bɨkꞌa ooda–e pꞌanɨ. Mapa pɨ jua ekꞌari pꞌanapataadaikꞌaraa bɨ. 9Rey Waibɨa, pɨa kꞌinia bɨ pɨrã, jõmaweda pɨ jua ekꞌari pꞌanapataarãmaa jara pëiipia bɨ ma eperãarã peekꞌoodamerã. Mɨa pꞌaratꞌa trescientos treinta mil kilos pꞌaaitꞌeeda aji, pɨ pꞌaratꞌa juasiapataarãmaa ãrapa ma mimia oorutaarãmaa pꞌaadamerã.

10(Maapai Persia eujãdepemaarã reyrãpa sortija jɨ̃pachida mãikꞌaapa mãgɨpa tauchaa bɨpachida ley pꞌãdakꞌãri.) Rey Asueropa ũrikꞌãri ma Agagdeepa uchiada Hamedata warra Amanpa jarada, chi sortija ẽra ataji mãikꞌaapa ma judiorã kꞌĩra unuamaa iru bada Amanmaa teeji. 11Mãga bɨde reypa mãgaji:

—Ma pꞌaratꞌa iru béeji. Ma eperãarã ome pɨchia kꞌĩsia iru bɨkꞌa oopáde aji.

12Mãgá ewari trece naarapema atanede rey secretario tꞌɨ̃ pëijida Amanpa jarada pꞌã pëidamerã awaraa eujã rey Asuero jua ekꞌari beerã poro waibɨarãmaa. Ma jarada pꞌãjida awaraa pedeede pia kꞌawaadamerã kꞌãata jara bɨ. Rey Asuero tꞌɨ̃de ma kꞌartꞌa jõmaweda firmaajida mãikꞌaapa cerapa sellaadapꞌeda, aɨde rey sortijapa tauchaa bɨjida. 13Maapꞌeda ma kꞌartꞌa tee pëijida rey jua ekꞌari eujã bee chaa. Ma kꞌartꞌade jara pëijida ewari abaade judiorã jõmaweda peekꞌoodamerã, kꞌũtrãarã, chonaarã, wẽraarã, warrarã paara mãikꞌaapa ãchi netꞌaa jõmaweda jãri atadamerã. Jarajida ewari trece atane doce adar ma–itꞌee awara bɨdapꞌedaa. 14Ma pꞌãda bɨjida Persiadepemaarã ley pꞌãda ome mãikꞌaapa chi copia pëijida awaraa eujã jõmaade rey jua ekꞌari pꞌanapatapꞌedaarãmaa mãikꞌaapa pꞌuurude pꞌanapatapꞌedaarãmaa kꞌawaadamerã ma ewate judiorã peekꞌoodaitꞌee. 15Ma kꞌartꞌa pꞌãdapꞌeda Susa ciudadelade, reypa jaraji aweda pëidamerã. Susa ciudadeladepemaarãpa ma kꞌartꞌade jara bɨ kꞌawaadakꞌãri, kꞌawada–e paji kꞌãata kꞌĩsiadaitꞌee. Mamĩda ma kꞌartꞌa pëidapꞌedaa tꞌẽepai, rey Asuero Amán ome su–akꞌɨ pꞌaneejida tꞌãri o–ĩa ne–inaa todaitꞌee.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index