Search form

Ester 5

Ester rey kꞌĩrapite wãda

1Kꞌãima õpee wãyaada tꞌẽepai, Esterpa reina pꞌaru jɨ̃ beeji mãikꞌaapa tꞌĩuji rey palacio edajãde patio badade. Akꞌɨnɨ̃ banaji rey su–akꞌɨ beepari cuartodepema puertamãi. Ma cuartode chi puerta kꞌĩrapite rey su–akꞌɨ baji rey su–akꞌɨ beeparide. 2Irua unukꞌãri Ester mama akꞌɨnɨ̃ bɨ, tꞌãri o–ĩadachi mãikꞌaapa cetro nẽedee ooda ichi juade iru badapa Estermaa ɨaji ichi kꞌĩrapite wãmerã. Mãpai Ester rey kꞌaitꞌa wãpꞌeda, ma cetro kꞌɨ̃ tꞌõbaitꞌaaji. 3Mãpai reypa iidiji:

—¿Sãga nɨ̃bɨma reina Ester? ¿Kꞌãata kꞌinia bɨma? Mɨ jua ekꞌari pꞌanɨdepema eujã esa–aukꞌa iidi kꞌinia bɨ pɨrã, ¡mɨa pɨmaa teeyada! aji.

Mãpai Esterpa pꞌanauji:

4—Mɨchi Rey Waibɨa, mɨa kꞌinia bɨ pɨ idi mɨmaa nekꞌode chemerã, pɨ–itꞌee chikꞌo pia joopida perã. Ichiaba kꞌinia bɨ Amán pɨ ome chemerã.

Mãpai reypa ichi mimiapataarãmaa mãgaji:

5—Isapai Amán jɨrɨnadapáde aji, reina Esterpa kꞌinia bɨkꞌa oodaitꞌee perã.

Mãgá rey, Amán ome Estermaa nekꞌode wãjida.

6Vino tomaa pꞌanɨde, reypa Estermaa mãgaji:

—Iidipáde aji, pɨchia iidi kꞌiniata. ¿Kꞌãata kꞌinia bɨma? ¡Mɨ jua ekꞌari pꞌanɨdepema eujã esa–aukꞌa teeyada! aji.

7Mãpai Esterpa pꞌanauji:

—Mɨchi Rey Waibɨa, mɨa nãgapai iidiitꞌee: 8Wãara pɨa mɨ pia akꞌɨ bɨ pɨrã mãikꞌaapa mɨa kꞌinia bɨkꞌa oo kꞌinia bɨ pɨrã, mãgara nu waya Amán ome mɨmaa nekꞌode chepáde aji, mɨa parã–itꞌee chikꞌo pia joopiitꞌee perã. Mãpaita mɨa pꞌanauitꞌeeda aji, pɨa iidida.

Amanpa Mardoqueo ɨ̃yapa jɨ̃apitꞌaaitꞌee pada

9Amán uchiakꞌãri Ester ome nekꞌodapꞌedaamãiipa, tꞌãri o–ĩa baji, reinapa ichi waya rey ome nekꞌode wãpáde ada perã. Mamĩda rey palaciodeepa uchiarude, ichia unuji Mardoqueo mama puerta kꞌaitꞌa su–akꞌɨ bɨ. Mardoqueo bainɨ̃ bee–e pada perã mãikꞌaapa eperã poro waibɨa wãyaakꞌãri oopatakꞌa oo–e pada perã, Amán iru ome audupɨara kꞌĩraudachi. 10Mãgaweda kꞌawapi–e paji iru ome kꞌĩrau bɨ. Mamĩda ichi temaa panakꞌãri, ichi kꞌõpꞌãyoorã mãikꞌaapa chi wẽra Zeres tꞌɨ̃ pëiji. 11Maapꞌeda ichi audua pedeeji ichia pꞌaratꞌara, netꞌaara, warrarã chokꞌara iru bada perã mãikꞌaapa reypa ichi awaraa poro waibɨarã rey jua ekꞌari beerã kꞌãyaara waibɨara papida perã.

12Ichiaba mãgaji:

—Ma awara idi reinapa jaraji mɨ ichi temaa rey ome nekꞌode wãmerã. Awaraa rey ekꞌari beerãmaa mãga jarakꞌaa; mɨmaa aupaita mãga jaraji. Ma awara reinapa jaraji nu waya ichimaa nekꞌode wãmerã. 13Mãgá mɨ pia wãru mĩda, tꞌãri o–ĩa ba–e paitꞌee jã judío Mardoqueo rey palaciodepema puerta kꞌaitꞌa su–akꞌɨ bɨ misa.

14Mãpai Amán wẽrapa mãikꞌaapa chi kꞌõpꞌãyoorãpa irumaa mãgajida:

—¿Sãapꞌeda otau jɨ̃nɨ̃ bɨpata torre oopi–ema? ajida. Oopíji veintidós metros chi ɨtꞌɨa mãikꞌaapa nu tapꞌedaweda reymaa iidíji Mardoqueo otau made jɨ̃nɨ̃ bɨpimerã. Mãgá pɨ rey ome nekꞌode wãi, mãgɨde kꞌĩsia–ee.

Amanpa ijãaji ãrapa jaradapꞌedaa. Aramata ma otau jɨ̃nɨ̃ bɨpata torre oopiji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index