Search form

Éxodo 1

Israelitaarã Egipto pidaarã juade

1Israelitaarã+ ãchi te pidaarã paara Jacob ome Egiptode pachejida. Ma israelitaarã nãgɨɨrã paji: 2Jacob warrarã Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad mãikꞌaapa Aser. 5Jacobdeepa uchiadapꞌedaarã setenta paji. Chi warra José ichideerã ome Egiptode pꞌanapachida.

6José, chi ɨ̃pemaarã paara mãikꞌaapa ma generacióndepemaarã jõmaweda piujida. 7Mamĩda ãradeepa uchiadapꞌedaarã chokꞌara ĩwajida. Mãgá israelitaarã Egiptode chokꞌara ĩwa wãjida.

8Taarã pakꞌãri, awaraa rey beeji Egiptode. Mamĩda irua José kꞌawa–e baji. Mãgɨpa israelitaarã Egiptode chokꞌara ĩwa wãda unukꞌãri, 9ichi akꞌɨpataarãmaa mãgaji: “Pɨchá akꞌɨ́tɨ, jã israelitaarã tachi kꞌãyaara chokꞌaraara pꞌanadairã, tachi pꞌoyaadai. 10Maperã ne–inaa oodáma ãchi waa ĩwanaadamerã. Maa–e pɨrã ãchi tachi kꞌĩra unuamaa iru pꞌanapataarã eere padaridai tachi ome chõodaitꞌee mãikꞌaapa na eujãdeepa jirabododayada” aji.

11Maperã Faraonpa+ mãikꞌaapa poro waibɨarã ichi jua ekꞌari beerãpa israelitaarã mimiapijida. Israelitaarã awara–awaraa bɨkꞌoojida mãikꞌaapa Egipto pidaarã aba–abaa bɨji ma awara bɨdapꞌedaa chaa akꞌɨdamerã. Mimia chaaree oopipachida. Oopijida pꞌuuru omé, Pitón mãikꞌaapa Ramsés, Faraón netꞌaa aɨde ɨadaitꞌee. 12Mãgá Egipto pidaarãpa ãchi jua ekꞌari israelitaarã kꞌachia iru pꞌanapachida mĩda, Tachi Akꞌõre ãra ome bapachi. Mapa israelitaarã waapɨara ĩwa wãpachida. Maperã Egipto pidaarãpa ãra waawee pꞌanapachida mãikꞌaapa kꞌĩra unuamaa iru pꞌanapachida.

13Maapai israelitaarã Egipto pidaarã esclavoorã paji. Egipto pidaarã jua ekꞌari chupɨria pꞌanapachida. 14Egipto pidaarãpa ladrillo yoorodee oopipachida mãikꞌaapa oopipachida mimia chaaree kꞌĩra tꞌãdoo pꞌuurudeepa taawa. Mãgá israelitaarã kꞌachia oo iru pꞌanapachida ãchi jua ekꞌari.

15Ma awara Egiptodepema reypa tꞌɨ̃ pëiji hebreo+ wẽraarã partera tꞌɨ̃jarapatapꞌedaa Sifrá Fuvá ome mãikꞌaapa ãramaa mãgaji:

16—Parãpa hebreorã warrarã tꞌopidakꞌãri, akꞌɨ́tɨ kꞌawadaitꞌee ɨmɨkꞌĩra warra wa wẽra kꞌau. Ɨmɨkꞌĩra pɨrã, peetꞌáatɨ. Mamĩda wẽra pɨrã, ichiakꞌau bɨdapáde aji, chokꞌai beemerã.

17Mamĩda ãrapa mãga oo kꞌiniada–e paji Tachi Akꞌõre waawee pꞌanadapꞌedaa perã. Egiptodepema reypa jaradakꞌa oodakꞌaa paji. Ɨmɨkꞌĩra warrarã chokꞌai bɨpachida.

18Mãpai Egipto pidaarã reypa ma parteraarã waya tꞌɨ̃ pëiji mãikꞌaapa iidiji:

—¿Sãapꞌeda ɨmɨkꞌĩra chakꞌeerã peeda–e pꞌanɨma? aji.

19Ãrapa pꞌanaujida:

—Hebreorã wẽraarã Egiptodepema wẽraarãkꞌa bee–e. Chaareera pꞌanɨ. Tai panadai naaweda, ãrapa warra tꞌopatada ajida.

20Mãgá israelitaarã waapɨara ĩwa wãpachida. Ma awara Tachi Akꞌõrepa ma parteraarã pia akꞌɨji, 21ichi waawee pꞌanadapꞌedaa perã mãikꞌaapa israelitaarã kꞌaripadapꞌedaa perã. Mapa irua ãradeepa warrarã chokꞌara uchiapiji.

22Ma tꞌẽepai Faraonpa jõmaarãmaa nãga jara pëiji: “Ma hebreorã warra chakꞌeerã tꞌorutaarã jõmaweda toidaa batꞌakꞌóotɨ. Mamĩda wẽra kꞌau chakꞌeerã chokꞌai atabëidapáde” aji.

Tachi Akꞌõre Pedee Chonaarãwedapema

©Wycliffe Bible Translators, Inc.

More Info | Version Index